Dakład zrobleny namahańniami ekśpiertaŭ i analitykaŭ z vyviednaj supolnaści ZŠA — siamnaccaci ŭradavych biuro, jakija zajmajucca zboram źviestak dla amierykanskaha ŭrada, piša Tut.by. Siarod transnacyjanalnych pahroz u dakumiencie nazvanyja pandemija COVID-19, źmianieńnie klimatu i zabrudžvańnie navakolnaha asiarodździa, handal narkotykami i arhanizavanaja złačynnaść, mihracyja, suśvietny teraryzm i mnohija inšyja. Taksama kinuć vyklik biaśpiecy ZŠA i ich sajuźnikaŭ mohuć čatyry krainy.
Rasija moža «ŭvarvacca ŭ Biełaruś, kali paličyć heta nieabchodnym»
Jak havorycca ŭ dakładzie, «Rasija budzie praciahvać padryvać upłyŭ ZŠA, unosiačy raskoł u ich adnosiny z zachodnimi sajuźnikami, a taksama budzie raźvivać svoj vajskovy, jadzierny, kaśmičny i vyviedny patencyjał». Tym nie mienš, analityki kažuć, što Rasii treba nie pramoje sutyknieńnie z ZŠA, a kampramis na ŭmovach uzajemnaha nieŭmiašańnia va ŭnutranyja spravy i pryznańnia rasijskaj śfieraj upłyvu bolšaj častki byłoha SSSR.
U im taksama adznačajecca, što Maskva budzie ŭžyvać roznyja mietady dla pašyreńnia ŭpłyvu: «Infarmacyjnyja kampanii, vyviedku i kontrterarystyčnaje supracoŭnictva, apieracyi uzbrojenych sił i najmitaŭ, zabojstvy, handal zbrojaj». Taksama Rasija budzie ŭmiešvacca ŭ kryzisy, jakija ŭźnikajuć, kali jaje intaresy buduć pastaŭleny pad pahrozu, a cana takoha ŭmiašańnia budzie nie zanadta vysokaj. Čakajecca praciah supracoŭnictva Rasii z Kitajem, rost jaje ŭpłyvu ŭ Siryi i Livii, Vieniesuele i na Kubie, a taksama ŭ inšych krainach Łacinskaj Amieryki za košt enierhietyčnych kantraktaŭ i pastavak zbroi. Jak havorycca ŭ dakładzie, adnym ź instrumientaŭ dla prasoŭvańnia svajoj paviestki i pasłableńnia ŭpłyvu ZŠA budzie vykarystańnie enierharesursaŭ — ad 2006 hoda Rasija bačyć enierhietyku ŭ jakaści instrumienta mižnarodnaj palityki (u tym liku pastaŭki hazu i pahrozu ich mahčymaha prypynieńnia ŭ Jeŭropu, a taksama budaŭnictva AES u roznych krainach śvietu).
«U byłym Savieckim Sajuzie Maskva maje dobryja mahčymaści pavysić svaju rolu na Kaŭkazie, uvarvacca ŭ Biełaruś, kali paličyć heta nieabchodnym, a taksama praciahvać destabilizujučyja namahańni suprać Ukrainy, u toj čas jak pieramovy ab urehulavańni pa-raniejšamu nie prasoŭvajucca i tam praciahvajucca bai nizkaj intensiŭnaści», — havorycca ŭ dakładzie.
Analityki adznačajuć, što, niahledziačy na niaźmienny, a ŭ niekatorych abłaściach i źmienšany vajskovy biudžet, Rasija vałodaje sučasnymi vajskovymi technałohijami i moža razharnuć svaje ŭzbrojenyja siły ŭ stratehična važnych rehijonach — praŭda, čym jany buduć dalej ad Rasii, tym mienš efiektyŭnyja buduć u mahčymych sutyknieńniach. Dadatkovy ryčah dla Maskvy — PVK, kantralavanyja «blizkimi da Kramla aliharchami», adnak ich efiektyŭnaść aceńvajecca ekśpiertami nie zanadta vysoka. Adznačajecca, što ŭ jadziernych uzbrajeńniach Rasija zastaniecca samym bujnym spabornikam ZŠA ŭ ahladnaj budučyni.
U halinie kibierbiaśpieki amierykanskija ekśpierty bačać hałoŭnaj pahrozaj mienavita rasijskich chakieraŭ. Na ich dumku, «Rasija praciahvaje atakavać važnyja abjekty infrastruktury, takija jak sistemy pramysłovaha kiravańnia, u ZŠA i ich sajuźnikaŭ». Dziejańni rasijskajvyviedki, jak adznačajecca, mohuć paŭpłyvać na pryniaćcie rašeńniaŭ amierykanskimi vybarščykami na vybarach, a sama jana moža padzialicca svaimi technałohijami i vopytam z supiernikami ZŠA.
Rasija i ŭ kosmasie zastajecca adnym z hałoŭnych hulcoŭ, praciahnie stvarać zbroju dla baraćby sa spadarožnikami, a taksama ŭdaskanalvać sistemu najaŭnych u krainy spadarožnikaŭ dla vyviedki i nazirańnia.
Kitaj — hałoŭny supiernik ZŠA ŭ śviecie
KNR, na dumku amierykanskich ekśpiertaŭ, svajo supraćstajańnie z ZŠA ŭsprymaje jak hieapalityčnaje i razhladaje miery, jakija prymajucca z 2018 hoda amierykancami, jak sprobu strymać jaho rost. Ale, tym nie mienš, lidary Kitaja buduć šukać mahčymaść pamienšyć napružańnie ŭ dvuchbakovych adnosinach, kali heta budzie adkazvać ich intaresam.
Analityki ličać, što KNR budzie staracca i dalej pazbavicca ad technałahičnaj zaležnaści i stavić metaj dasiahnieńnie pieravahi nad ZŠA ŭ hetaj śfiery da 2030 hoda. Kitaj zastaniecca hałoŭnaj pahrozaj amierykanskamu technałahičnamu panavańniu, asabliva ŭ śfierach abarony, enierhietyki, finansaŭ, a taksama ŭ mnohich inšych, pryčym vykarystoŭvać jon budzie roznyja instrumienty, ad kapitałaŭkładańniaŭ da špijanažu i adkrytaha kradziažu, kab pamienšyć adryŭ.
U mižnarodnych adnosinach Kitaj praciahnie prasoŭvać inicyjatyvu «Adzin pojas i adzin šlach» dla pašyreńnia svajho palityka-ekanamičnaha ŭpłyvu i vajskovaj prysutnaści ŭ śviecie, a ad nieefiektyŭnych praktyk pastarajecca admovicca. Taksama Piekin budzie ŭmacoŭvać svoj upłyŭ z dapamohaj «vakcynavaj dypłamatyi» — davać siabroŭskim krainam pieravahu ŭ atrymańni kitajskich vakcyn, a svoj pośpiech u baraćbie z pandemijaj padavać jak dokaz pieravahi jaho sistemy.
Na dumku ekśpiertaŭ, zachavajecca vysokaja napružanaść na inda-kitajskaj miažy, dzie letaś adbylisia sutyknieńni. U Paŭdniova-Kitajskim i Uschodnie-Kitajskim morach KNR budzie praciahvać cisk na susiedziaŭ z nahody sprečnych terytoryj, vykarystoŭvajučy vajenna-marskija siły. Taksama čakajecca rost vajennaj aktyŭnaści blizu Tajvania.
Kitaj praciahnie ažyćciaŭlać płan vajskovych reformaŭ, u tym liku fłotu, VPS i rakietnych sił. Asobna ŭ dakładzie havorycca pra jadziernuju zbroju: jaje zapasy Piekin budzie sprabavać padvoić za nastupnyja dziesiać hadoŭ, raŭnamierna raźmiarkoŭvajučy ich u jadziernaj tryjadzie (avijacyja, rakiety, padłodki) — mienavita tamu kraina nie zacikaŭlenaja ŭ pahadnieńniach, skiravanych na pamianšeńnie kolkaści padobnych uzbrajeńniaŭ. Kitaj, jak čakajecca, praciahnie supracoŭničać z Rasijaj u abaronnaj i ekanamičnaj śfierach.
Taksama KNR adkryta kinie vyklik ZŠA ŭ kosmasie — ekśpierty prahnazujuć, što jana stvoryć svaju arbitalnuju stancyju pamiž 2022 i 2024 hadami, praciahnucca daśledavańni Miesiaca i navat mahčyma budaŭnictva tam pastajannaj bazy. Adznačajecca, što kitajskaje vajennaje viedamstva ŭžo zaraz vałodaje zbrojaj, zdolnaj zmahacca sa spadarožnikami ZŠA i ich sajuźnikaŭ.
Taksama havorka ŭ dakładzie idzie ab aktyŭnaści Kitaja ŭ hłabalnaj sietcy: kibieršpijanažy i napadach chakieraŭ, nakiravanych na ZŠA, a taksama padaŭleńni internet-kantentu z ZŠA ŭnutry krainy ŭ ideałahičnych metach. Ekśpierty ličać, što Kitaj vałodaje mahčymaściami pravodzić takija kibierataki, jakija mohuć pryvieści jak minimum da časovaha i łakalnaha zboju najvažniejšaj amierykanskaj infrastruktury. Akramia hetaha, najaŭnyja ŭ Piekina technałohii kantrolu nad nasielnictvam (sistemy nazirańnia) mohuć ekspartavacca ŭ inšyja krainy.
Z dapamohaj vyviednaj dziejnaści Kitaj budzie sprabavać padarvać aŭtarytet ZŠA va Uschodniaj Azii, a taksama na Tajvani. Taksama čakajecca, što Piekin z dapamohaj vyviedki budzie prykładać bolš namahańniaŭ dla źmieny amierykanskaha palityčnaha klimatu i cisku na asobnych niepažadanych amierykanskich palitykaŭ. U cełym supiernictva z Kitajem amierykanskija ekśpierty razhladajuć u jakaści najvažniejšaha kirunku.
Iranskija špijony i padtrymka hrupovak
Iran, jak prahnazujuć analityki, budzie praciahvać padtrymlivać šyitaŭ za miažoj, umacoŭvać upłyŭ u susiednich krainach, sprabavać asłabić mižnarodny cisk i źvieści da minimumu pahrozy režymu. Adnak iranskaja ekanomika, jakaja adčuvaje padzieńnie, i drennaja reputacyja ŭ rehijonie stvarajuć ciažkaści dla vykanańnia hetych metaŭ. Iran, ličać ekśpierty, budzie kambinavać dypłamatyju z pahrozami pašyreńnia jadziernaj prahramy, zakupkami ŭzbrajeńniaŭ i tajemnymi vajennymi apieracyjami.
Jany pradkazvajuć, što Iran moža pajści na ryzyki, jakija mohuć uzmacnić napružanaść i pahražać intaresam ZŠA i sajuźnikaŭ (pierš za ŭsio Izraila) u bližejšym hodzie. Adnak u Tehierana niama žadańnia pravakavać adkryty kanflikt z ZŠA ci stavić pad pahrozu mahčymaje pasłableńnie dziejnych sankcyj.
Adnak chutčej za ŭsio ŭłady krainy nie siaduć z ZŠA za stoł pieramoŭ, pakul jany nie asłabiać sankcyi i znoŭ nie viernucca ŭ jadziernuju ŭhodu, ź jakoj vyjšli ŭ 2018 hodzie. Choć, pa dadzienych amierykanskich ekśpiertaŭ, Iran u ciapierašni čas nie pravodzić klučavyja dla stvareńnia jadziernaj zbroi pracy, jon moža pačać uzbahačeńnie ŭranu da značeńniaŭ, nie praduhledžanych pahadnieńniem — jak jon i pahražaŭ raniej.
Hałoŭnym miescam, kudy budzie nakiravany iranski ŭpłyŭ, na praciahu niekalkich bližejšych hadoŭ zastaniecca Irak, dzie Tehieran budzie praciahvać padtrymlivać uzbrojenyja hrupy šyitaŭ i siabroŭskija palityčnyja partyi, što moža pahražać amierykanskamu piersanału, jaki dysłakujecca ŭ krainie. Taksama Iran raźličvaje na stałuju vajskovuju prysutnaść i ekanamičnyja kantrakty ŭ Siryi, kali vajna tam spynicca — adtul i ź Livana rukami hrupoŭki «Chiezbała» jon moža pahražać Izrailu. Jemien zastaniecca arenaj sutyknieńnia Irana z Saudaŭskaj Aravijaj — jašče adnym sajuźnikam ZŠA: Tehieran padtrymlivaje tam paŭstancaŭ-chusitaŭ z dapamohaj pastavak zbroi, u tym liku rakiet. Taksama Iran naładžvaje suviazi ŭ Afhanistanie jak z centralnym uradam, tak i z pradstaŭnikami ruchu «Taliban», kab u vypadku pieramohi luboha z bakoŭ zastacca ŭ vyjhryšy.
Aŭtary dakładu śćviardžajuć, što ŭ Irana samyja vialikija mahčymaści prymianieńnia balistyčnych rakiet u rehijonie, i jon praciahnie ich udaskanalvać navat niahledziačy na prablemy ŭ ekanomicy. Tajemnyja vajskovyja apieracyi i niepramoje ŭzajemadziejańnie z uzbrojenymi farmiravańniami dazvalajuć jamu bolš upeŭniena damahacca pastaŭlenych metaŭ.
Pahrozu ZŠA taksama ŭjaŭlaje imknieńnie Irana stvaryć vyviednuju sietku nie tolki na Blizkim Uschodzie, ale i ŭ Amierycy — za apošnija niekalki hadoŭ mnostva ludziej tam byli aryštavanyja pavodle padazreńnia ŭ suviaziach ź iranskaj vyviedkaj. Taksama ŭ krainy jość mahčymaści dla kibieršpijanažu i napadaŭ — da prykładu, viasnoj 2020 hoda, jak śćviardžajecca, iranskija chakiery atakavali izrailskija abjekty vodazabieśpiačeńnia. Aściarohi ekśpiertaŭ, tym nie mienš, zvodziacca da šyrokich mahčymaściaŭ Irana pašyrać u siecivie dezinfarmacyju pra ZŠA.
Paŭnočnaja Kareja — jadziernaja bomba i rakiety
Hałoŭnymi pahrozami z boku KNDR pa-raniejšamu źjaŭlajucca jaje jadziernaja i rakietnaja prahramy. Ekśpierty ličać, što paŭnočnakarejski lidar Kim Čen Yn sprabuje damahčysia pryznańnia krainy jadziernaj dziaržavaj u tym liku z dapamohaj umacavańnia armii ŭ cełym i jaje madernizacyi — heta moža być niebiaśpiečna dla Paŭdniovaj Karei i Japonii, amierykanskich sajuźnikaŭ.
Adnak niahledziačy na admovu na słovach u śniežni 2019 hoda ad uziatych na siabie abaviazacielstvaŭ nie pravodzić novyja vyprabavańni jadziernaj zbroi, Kim z tych časoŭ tak i nie ažyćciaviŭ nivodnaha, jak nie było i vyprabavańniaŭ rakiet vialikaj dalokaści. Usio heta pakidaje mahčymaści dla pieramoŭ Paŭnočnaj Karei z ZŠA. Kim Čen Yn, ličać analityki, płanuje publična ŭzdymać pytańnie adnaŭleńnia vyprabavańniaŭ, kab nacisnuć na ZŠA i prymusić ich uzajemadziejničać z KNDR na jaje ŭmovach.
Paŭnočnakarejskija chakiery, jak śćviardžajecca ŭ dakładzie, ładzili pa ŭsim śviecie kibierataki na finansavyja ŭstanovy, u tym liku źviazanyja z kryptavalutami. Pavodle acenak ekśpiertaŭ, byli skradzienyja sotni miljonaŭ dołaraŭ — mahčyma, dla ŭradavych prajektaŭ, u tym liku jadziernaj i rakietnaj prahram.
