Siarhiej Koršun
Heta mierkavanyja administratary kanału Siarhiej Jaraševič i Antanina Kanavałava, a taksama błohiery Siarhiej Koršun i Jaŭhien Pryvałaŭ. Razam ź imi, pavodle paviedamleńnia Viarchoŭnaha sudu ab nakiravańni spravy ŭ Mienski abłasny sud, na łavie padsudnych budzie i aktyvist «Narodnaj hramady» Siarhiej Sparyš. Jaho vinavaciać jašče i ŭ pieraškodzie pracy Centravybarkamu.
«Vałodaje kamputaram na ŭzroŭni karystalnika»
Siastra błohiera telehram-kanału «Armija z narodam» Siarhieja Koršuna Volha zaŭvažaje, što jaje brat, chutčej za ŭsio, nia viedaje inšych fihurantaŭ spravy, u tym liku aktyvista Siarhieja Sparyša. «Jak ich mohuć sudzić razam?» — pytajecca jana.
«Brat nikoli nie kazaŭ, što kahości ź ich viedaje ci chacia b sustrakaŭ raniej. I pra vočnyja staŭki ŭžo padčas śledztva ŭ mianie niama źviestak. Ale, vidać, heta dla tych, chto daŭ zahad pačać spravu, nia važna», — miarkuje Volha.
Bratu Volhi Siarhieju Koršunu 43 hady. Dziesiać hadoŭ tamu jon słužyŭ u milicyi, u patrulna-pastavoj słužbie, zvolniŭsia ŭ zvańni kapitana. Pracavaŭ achoŭnikam u budaŭničaj kramie, a napiaredadni prezydenckich vybaraŭ 2020 hodu pastupova ŭklučyŭsia ŭ hramadzkuju aktyŭnaść, padpisaŭsia pa telehram-kanały, u tym liku na «Armiju z narodam».
Pavodle Volhi, Siarhiej Koršun nia moh być administrataram «Armii z narodam», chiba što błohieram.
«U jaho vałodańnie kamputaram na ŭzroŭni karystalnika. Viedaju, što raz vystavili jahony post pra strukturu milicyi, malunki da jaho ź internetu ŭziaŭ — całkam zvyčajnaja infarmacyja», — miarkuje Volha.
U toje, što brat kahości rychtavaŭ da biesparadkaŭ, žančyna rašuča nia vieryć.
«Jon spraviadlivy da inšych, ale i sam zakon nie parušaje», — kaža Volha. Ź jaje słovaŭ, Siarhieja za ŭmieńnie spačuvać vielmi lubiać usie svajaki, i małyja, i staryja. Ich babula Zinaida Mikałajeŭna, jakoj było 96 hadoŭ, pajšła z žyćcia ŭ śniežni, tak i nie dačakaŭšysia vychadu lubimaha ŭnuka na volu.
«Usio prasiła nas pieradać u milicyju, kab jaje pasadzili zamiest jaho. Tak i nie dačakałasia ŭnuka… My doŭha ad jaho chavali hetuju viestku, u listach u turmu nie paviedamlali, ale jon adčuŭ niešta nia toje, i daviałosia pryznacca», — zhadała Volha.
Siarhieja Koršuna zatrymali letaś u lipieni, kali jon byŭ sa svajakami na leciščy ŭ Smalavickim rajonie. Stała viadoma, što Siarhieja Koršuna vinavaciać pavodle 342 artykuła — ab parušeńni hramadzkaha paradku. Spačatku svajaki mierkavali, što jon prachodziŭ pa spravie Siarhieja Cichanoŭskaha, ale potym daviedalisia pra źmienu abvinavačańnia na 293 artykuł — ab padrychtoŭcy da masavych biesparadkaŭ.
«Viny nie pryznaje nijakaj»
Ciapier Siarhieju Koršunu pahražaje 8 hod źniavoleńnia. Siastra Volha viedaje, što vinavatym jon siabie nie pryznaje. Adznačaje, što brat maralna hatovy vytrymać luboje źniavoleńnie.
«Spačatku ŭ listach zaŭvažali, što jamu było maralna ciažka, tym bolš sam były milicyjant. Ale pastupova ton listoŭ źmianiŭsia, stała bolš aptymizmu i pierakanańnia, što pakuty niedaremnyja. Trymajecca mužna, raźvivajecca. Šmat čytaje, i navat pačaŭ składać vieršy, čaho nikoli nie było. U adnym liście napisaŭ, što jany tam «siadziać za toje, što raspluščyli vočy», — adznačyła Volha.
U SIZA na Vaładarskaha Volha mieła z bratam Siarhiejem adno spatkańnie. Zhadvaje, što papiarednie musiła aznajomicca sa śpisam temaŭ, pra jakija nielha budzie havaryć.
«Pra niekatoryja rečy prosta žestami ci mimikaj daviałosia «razmaŭlać». Zrazumieła hetak, što fizyčnuju siłu da jaho nibyta nie ŭžyvali, u karcary dyk dakładna nia byŭ, ale staŭleńnie administracyi da palityčnych viaźniaŭ bolš žorstkaje. I ŭsio roŭna ni na što nia skardzicca, zdarovy, viery ŭ vyzvaleńnie i pieramohu nie hublaje», — skazała pra Siarhieja Koršuna jahonaja siastra Volha.
Viadoma, što zatrymańniem padpisčykaŭ telehram-kanału «Armija z narodam» zajmalisia supracoŭniki HUBAZiKa, jakim tady kiravaŭ Mikałaj Karpiankoŭ.
Jak adznačała načalnica ŭpraŭleńnia infarmacyi i hramadzkich suviaziaŭ MUS Volha Čamadanava ŭ interviju «SB», za telehram-kanałam «Armija z narodam» viedamstva nazirała z červienia.
«U čacie aktyŭna zaklikali da siłavoha ŭździejańnia na pradstaŭnikoŭ MUS i ŭnutranych vojskaŭ u dzień mahčymych masavych pratestaŭ, zboru i kaardynacyi ŭ peŭnym miescy hatovych da aktyŭnych dziejańniaŭ radykalna nastrojenych hramadzian. Abmiarkoŭvalisia kankretnyja sposaby procidziejańnia, mahčymyja pravakacyi ŭ dačynieńni da pravaachoŭnikaŭ», — kazała Volha Čamadanava.
Biełaruskija pravaabaroncy pryznali Siarhieja Koršuna i Siarhieja Sparyša palitviaźniami.
