Hetaje pytańnie jon staŭ vyvučać paśla historyi ŭ Homielskaj aptecy: naviednik abazvaŭ zahadčycu apteki durnicaj i idyjotkaj, ale milicyja nie ŭhledzieła ŭ jaho dziejańniach administracyjnaha pravaparušeńnia.

Čytač vyrašyŭ pacikavicca, ci źjaŭlajecca zvarot da supracoŭnikaŭ pravaachoŭnych orhanaŭ sa słovami «idyjot» i «durań» abrazaj. Dla hetaha jon nakiravaŭ adpaviedny zapyt u MUS — pa jaho słovach, pieršaja pryjšła na jaho reakcyja była «biez kankretyki». Zatym mužčyna vyrašyŭ spytać ab tym ža samym Hienprakuraturu, jakaja pieranakiravała zapyt znoŭ u MUS. Narešcie, čytaču adkazali.

«Pa vynikach pravierki paviedamlajem, što słovy, vyjaŭlenyja ŭ nieprystojnaj formie, u tym liku nazvanyja Vami ŭ zvarocie źjaŭlajucca abrazaj słužbovaj asoby dziaržaŭnaha orhana pry vykanańni im słužbovych paŭnamoctvaŭ, jakija ciahnuć administracyjnuju adkaznaść pa art. 24.4 KaAP Respubliki Biełaruś u siłu asablivaha statusu supracoŭnika MUS Respubliki Biełaruś», — havorycca ŭ adkazie orhanaŭ MUS (hramatyka i punktuacyja aryhinała zachavanyja).

U śniežni minułaha hoda ŭ adnoj z aptek Homiela zdaryŭsia kanflikt pamiž žančynaj-pravizaram i 64-hadovym piensijanieram. Mužčyna, pa słovach supracoŭnicy, pryjšoŭ z praterminavanym receptam, a kali nie zmoh atrymać pa im nieabchodnyja preparaty, abazvaŭ žančynu «durnicaj, idyjotkaj i kaźlinaj».

Pravizar napisała zajavu ŭ milicyju, ale tam paviedamili, što ŭ dziejańniach pažyłoha mužčyny niama składu administracyjnaha pravaparušeńnia. Pry hetym u aficyjnym adkazie spasyłajucca na słoŭnik Ožehava, u jakim słovy «durnica» i «idyjotka», choć i ličacca źniavažlivymi, ale abrazaj nie źjaŭlajucca, majuć značeńnie «asoba, jakaja pakutuje prydurkavataściu» i ŭjaŭlajuć saboj «krytyčnuju acenku asoby, vyjaŭlenuju ŭ prystojnaj, choć i rezkaj formie».

«Ciapier atrymlivajecca, što zvarot takim čynam da farmaceŭta apteki Homiela nie źjaŭlałasia abrazaj, a kali tak źviarnucca da supracoŭnika MUS — heta ŭžo abraza», — zrabiŭ vysnovu naš čytač.

Клас
Панылы сорам
Ха-ха
Ого
Сумна
Абуральна