Fota Nadziei Bužan
Daśledavańnie, apublikavanaje ŭ Brytanskim časopisie spartyŭnaj miedycyny (British Journal of Sports Medicine), składajecca z analizu źviestak 50 tysiač darosłych, jakija pierachvareli na kavid. Navukoŭcy vyjavili, što tyja, chto pryśviačaŭ prynamsi 150 chvilin na tydzień fizičnaj aktyŭnaści, mieli značna mienšuju śmiarotnaść ad kavidu i radziej mieli patrebu ŭ špitalizacyi.
Fizičnaja aktyŭnaść palapšaje imunnuju funkcyju, uzmacniaje lohkija i sardečna-sasudzistuju sistemu, a taksama palapšaje psichičnaje zdaroŭje. Dziakujučy hetym pieravaham sportu źmianšajecca ciažkaść simptomaŭ karanavirusa, piša CNN.
Kab dasiahać 150-chvilinnaj aktyŭnaści štotydzień, nieabchodna vyłučać chacia b 22 chviliny na sport štodnia. Z dapamohaj pravilnych stratehij hetaj štodzionnaj mety možna dasiahnuć biez parušeńnia zvykłaha ładu žyćcia.
Voś piać praktyčnych parad, jakija dapamohuć vyłučać 22 chviliny na fizičnuju nahruzku štodnia:
1. Rehularna adpraŭlajciesia na prahułku.
Prahułka — samy dastupny vid fizičnaj aktyŭnaści.
Chutčej za ŭsio chadźba prysutničaje ŭ vašym štodzionnym hrafiku. Adnak pasprabujcie dadać dziesiać ci piatnaccać chvilin da vašaj zvyčajnaj normy, kab pavialičyć fizičnuju aktyŭnaść za dzień.
Taksama možna sumiaščać prahułki z zaniatkami, jakija vam padabajucca i jakija b vy chacieli rabić čaściej. Naprykład, razmaŭlać ź siabram pa telefonie abo słuchać muzyku, padkasty ci aŭdyjaknihi. Kali dadać da prahułak lubimy zaniatak, chadźba jašče praściej upišacca ŭ vaš štodzionny hrafik.
2. Praktykujcie karotkija ŭsploski aktyŭnaści
Nieabaviazkova treniravacca 22 chviliny zapar. Možna raźbić hety čas na tyja pramiežki času, jakija padychodziać vam bolš za ŭsio.
Ź siadziačym ładam žyćcia 20-chvilinnyja treniroŭki mohuć napačatku vyklikać składanaści. Tamu možna raźbić praktykavańni na vosiem padychodaŭ, a štohadziny vyłučać na ich usiaho tolki try chviliny.
3. U doŭhich treniroŭkach niama patreby
Isnuje mierkavańnie, što, kab padtrymlivać dobruju fizičnuju formu, nieabchodna štodnia vyłučać prynamsi hadzinu na sport. Adnak niadaŭnija daśledavańni pakazali, što 22 chviliny na dzień — dastatkova, kab być u tonusie.
Efiektyŭny i zdarovy dla serca sposab atrymać štodzionnuju normu fizičnaj aktyŭnaści — chutkaja intervalnaja treniroŭka, jakaja moža ŭklučać u siabie bazavyja praktykavańni nakštałt prysiadańniaŭ, adciskańniaŭ i skačkoŭ.
4. Viartajciesia da hulniaŭ
Valejboł, futboł, baskietboł i inšyja hulni, jakija prynosiać vam asałodu, daduć nieabchodnuju fizičnuju aktyŭnaść u vaša žyćcio.
Kali ŭ vas jość dzieci, to možna praktykavacca razam ź imi. Lubyja dziciačyja kłasičnyja hulni na śviežym pavietry daduć vašamu arhanizmu nieabchodnuju fizičnuju nahruzku.
5. Adsočvajcie svaju aktyŭnaść
Isnuje šmat roznych technałohij i mabilnych dadatkaŭ, jakija dapamahajuć adsočvać fizičnuju aktyŭnaść. Fitnes-trekiery dapamohuć vam adsočvać prahres i zastavacca na pravilnym šlachu ŭ dasiahnieńni svajoj mety. Bolš za toje, vy zaŭsiody budziecie viedać, ci dastatkova vaš arhanizm atrymaŭ fizičnaj nahruzki za dzień.
