Padčas suda Siarhiej raspavioŭ, što adrazu paśla ŭziaćcia pad vartu abviaściŭ haładoŭku. Z 2013 hoda jon pierajšoŭ na raślinnaje charčavańnie, i ježu ŭ SIZA składana nazvać adpaviednaj takomu ładu žyćcia i pryncypam Siarhieja.

Blizkija ŭ listach prasili, kab palitviazień spyniŭ haładoŭku, bo heta niebiaśpiečna dla žyćcia, na što adnojčy atrymali adkaz: «Kali žyć u niavoli, to navošta naohuł tak žyć».

Haładoŭku ŭ SIZA-7 Siarhiej pratrymaŭ 11 dzion, ale ŭ nastupnym usio ž vyrašyŭ spynić. Dla biaśpiečnaha vychadu z haładańnia mužčynu patrebnyja była sadavina i peŭnyja pradukty, ale, sa słoŭ blizkich, pieradać ich tady tak i nie ŭdałosia: «Vychodziŭ ź situacyi jon jak i čym moh».

Dla Siarhieja Sałochi charčavańnie maje asablivaje značeńnie. Paśla zakančeńnia 9 kłasaŭ budučy pradprymalnik praciahnuŭ vučobu ŭ Drahičynskaj sielskahaspadarčaj prafvučelni, i tady ŭ jaho pačalisia prablemy sa zdaroŭjem: pastajanna baleła ruka, potym źjavilisia sutarhi. Dva hady daktary pryznačali jamu surjoznaje miedykamientoznaje lačeńnie, ale heta nie dapamahała. Z časam ruka amal całkam atrafavałasia, ničoha ciažej za šarykavuju ručku ŭ toj momant Siarhiej užo trymać nie moh. Daktary chacieli navat amputavać ruku, ale Siarhiej admoviŭsia ad apieracyi i paźniej całkam adnaviŭsia svaimi siłami. Taksama, sa słoŭ blizkich, z dapamohaj uśviadomlenaha padychodu da siłkavańnia palitviazień vylečyŭsia ad varykozu vien. «Jon prarabiŭ šlach niemaleńki ŭ hetym płanie», — kažuć jany.

Siarhiej Sałocha. Fota ź jaho sacyjalnych sietak, 2016

Siarhiej Sałocha. Fota ź jaho sacyjalnych sietak, 2016

Z-za taho, što palitviazień admaŭlaŭsia prymać nieadpaviednuju jaho pierakanańniam ježu, jaho ŭ SIZA-7 adpravili da psichołaha. Tam Siarhieju zadavali šmat pytańniaŭ, adzin ź ich byŭ pra sproby samahubstva. Mužčyna ščyra skazaŭ, što «niejak adzin raz u dziacinstvie, z-za kachańnia da dziaŭčyny». Paśla mužčynu vyklikali da načalstva SIZA, pastavili na ŭlik jak «schilnaha da suicydu». Choć padobnych dziejańniaŭ u izalatary Siarhiej nie rabiŭ, i padkreślivaŭ, što toj epizod byŭ «u dziacinstvie».

Potym Siarhiej byŭ śviedkam vusnaha kanfliktu sukamiernika i rabotnika SIZA-7. Sutnaść sprečki była ŭ tym, što ŭ izalatary nie vydajucca papiery z pravami asob, jakija ŭtrymlivajucca pad vartaj. Sałocha raskazvaŭ na sudzie, što paličyŭ rabotnika niespraviadlivym, zastupiŭsia za tavaryša. Tak mužčyna atrymaŭ ad SIZA charaktarystyku «schilny da ekstremizmu».

Naohuł Siarhiej sprabavaŭ uździejničać na ŭmovy, u jakich znachodzicca, zakonnymi sposabami. Prasiŭ jaho pieravieści ŭ kamieru, dzie mienš abo naohuł niama tych, chto palić. Mužčyna sprabavaŭ vyrašyć pytańnie z vydačaj dadatkovaha naža dla narezki chleba, bo za adviedzieny čas heta nie ŭsie paśpiavali zrabić. Jašče jon rabiŭ sproby daviedacca ŭ rabotnikaŭ SIZA pravy asob, jakija znachodziacca pad vartaj, i kali nie atrymaŭ tłumačeńniaŭ, prasiŭ siabra vysłać jamu hetyja pravy listom (siabar vykonvaŭ prośbu, adnak paźniej akazałasia, što zamiest hetaha Siarhieju pieradavali… čystyja listy). U vyniku mužčynu časta pieravodzili z kamiery ŭ kamieru, takim čynam akazvajučy na jaho cisk.

Ciapier svajaki adznačajuć, što Siarhiej Sałocha adaptavaŭsia da turemnaha žyćcia, pa listach prykmietna, što nastroj u jaho lepšy: «Ciapier jon u dobrym stanie. Charčavańnie jaho źmianiłasia, viadoma, ale miasnyja pradukty jak jon nie jeŭ, tak i nie jeść. Adzinaje, kazaŭ, što časam, kali niama sadaviny i aharodniny, a taksama hrošaj na rachunku, davodzicca jeści turemnuju ježu. Napisaŭ, što ŭ apošni čas naohuł jeść mała, bo ŭ jaho małaruchomy ład žyćcia».

Siarhiej na płantacyi čarnic

Siarhiej na płantacyi čarnic

Zhodna z SAAZ, minimum sadaviny i aharodniny — jaki treba ŭžyvać kožny dzień, — nie mienš za 400 h, biez uliku bulby. Pastanova ad 25.03.2021 ab ustanaŭleńni normaŭ charčavańnia asob, jakija ŭtrymlivajucca pad vartaj u SIZA, IČU i CIP abviaščaje, što harodniny na adnaho čałavieka na sutki maje być 120 h kapusty, 40 h burakoŭ, 30 h morkvy, 40 h cybuli i 20 h ahurkoŭ/zielaniny/tamataŭ. Usio heta składaje tolki 0.55 ad minimalnaj normy. Sadavina adsutničaje naohuł. Pa sutnaści, asnovaj racyjonu, dastupnaha dla Siarhieja, źjaŭlajecca tolki bulba. Charčavańnie ŭ SIZA značna paharšaje zdaroŭje luboha čałavieka. Dla źniavolenaha z raślinnym typam charčavańnia znachodžańnie ŭ miescach pazbaŭleńnia voli moža stać pytańniem vyžyvańnia.

Najlepšy sposab dapamahčy Siarhieju — pieravieści hrošy na turemny rachunak, bo praktyčna ŭvieś jaho racyjon składajecca z «atavarki» ŭ kramie.

Padrabiaznaja instrukcyja, jak heta zrabić, i rekvizity dla SIZA-6 Baranavičy možna znajści tut.

Taksama Siarhieju Uładzimiraviču Sałochu možna napisać list z padtrymkaj pa adrasie: 225413, h. Baranavičy, vuł. Bresckaja, 258 u, SIZA-6.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?