Tydzień tamu, padčas respublikanskaha subotnika, Łukašenka anansavaŭ padpisańnie važnaha dekreta. Tady jon kazaŭ, što hety dakumient pavinien stać adnym z najvažniejšych rašeńniaŭ za hady jaho prezidenctva.
«Skažycie, kali zaŭtra niama prezidenta, vy harantujecie, što ŭsio budzie narmalna? Nie. Tamu na hety vypadak ja padpišu ŭ najbližejšyja dni dekret, jak budzie vybudavanaja ŭłada ŭ Biełarusi, pieradaje BiełTA..
Prezidenta zastrelili — na zaŭtra Rada biaśpieki budzie nadzielena paŭnamoctvami. Treba ŭvodzić nadzvyčajnaje stanovišča imhnienna, až da vajennaha, kali chtości na miažy varušycca. I Rada biaśpieki pavinna prymać rašeńnie, — patłumačyŭ Alaksandr Łukašenka. — Tamu ja kazaŭ, što padpišu hety dekret i vyznaču, chto budzie kiravać krainaj «kali raptam».
«Ja pavinien praduhledzieć usio. Tamu budzie padpisany hety dekret. U nas budzie faktyčna kalektyŭny prezident u vyhladzie Rady biaśpieki.
Tak, staršynia budzie: kali niama prezidenta, vykonvaje abaviazki premjer. Jon budzie staršynstvavać, ale ŭsie rašeńni buduć prymacca tajemnym hałasavańniem, kab nie było cisku.
Kali buduć prezidenckija vybary pryznačanyja, uvodzić ci nie ŭvodzić nadzvyčajnaje stanovišča, jak dziejničać i hetak dalej — voś cyvilnyja i vajskoŭcy ŭ Radzie biaśpieki vyrašać», — padkreśliŭ Alaksandr Łukašenka.
Pa ciapierašniaj Kanstytucyi ŭ vypadku śmierci ci niedziejazdolnaści prezidenta ŭłada pierachodzić da premjer-ministra. U varyjancie, pra jaki zajaviŭ Łukašenka, uładu piarojmie orhan, dzie bolšaść składajuć siłaviki. Adnak pytańnie jašče i ŭ tym, što Kanstytucyju nielha mianiać dekretam, dla hetaha patrebnaje rašeńnie parłamienta ci refierendum.
