Fota Tut.by
«Uvieś čas, kolki jana znachodziłasia za kratami, my maryli, što ŭ dzień jaje vychadu skupim usie kvietki na Kamaroŭcy i budziem čakać jaje na voli ź jarkimi achapkami, — piša telehram-kanał Tut.by. — Učorašnija padziei, jakija adbylisia z redakcyjaj, źmianili našy płany.
Fota Tut.by
Pobač z homielskaj kałonijaj, kudy Kaciu etapavali ŭ apošnija dni jaje źniavoleńnia, nas niašmat, ale my dačakalisia jaje — z pryvitańniami ad usich supracoŭnikaŭ kampanii».
Fota Tut.by
Sustreča prajšła spakojna, paviedamlajuć kalehi Kaciaryny, choć a 7 ranicy, kali jany pryjšli da ŭvachodu ŭ žanočuju kałoniju, kala jaje ŭbačyli charakterny bus, a taksama lehkavik, u jakim znachodziŭsia čałaviek u pahonach. Prykładna a 7:24 ranicy Kacia vyjšła z varot kałonii ź dźviuma vialikimi sumkami.
Pieršaj jana patelefanavała 18-hadovaj dačce Dašy, jakaja zaraz čakaje mamu razam ź inšymi rodnymi ŭ Minsku. Kaciaryna raspaviała, što doŭha nie mahła zabrać usie listy, a atrymała jana ich za paŭhoda kala 500.
Ciapier Kacia razam sa svaimi kalehami, jana ŭ cudoŭnym nastroi. Supracoŭniki kałonii pavodzili siabie maksimalna karektna — jany navat prapanavali padnieści sumki i vyklikać taksoŭku.
«U kałonii vysadžvała vasilki»: pieršaje intervju Kaciaryny Barysievič na voli
Kryminalnuju spravu ŭ dačynieńni da Kaciaryny Barysievič i doktara Arcioma Sarokina raspačali 19 listapada 2020 hoda. Ich abvinavacili ŭ razhałošvańni miedyčnaj tajamnicy, što, na dumku Hienprakuratury, paciahnuła ciažkija nastupstvy.
13 listapada 2020 hoda za aŭtarstvam Kaciaryny Barysievič vyjšaŭ artykuł, u jakim sa spasyłkaj na miedycynskija dakumienty i kamientar lekara śćviardžałasia, što ŭ kryvi Ramana Bandarenki nie było vyjaŭlena etanołu. Pieršyja asoby zajaŭlali, što pamierły chłopiec byŭ pjany.
