Hetaje rašeńnie stała nieabchodnym u suviazi z aryštam kiraŭnika BNF Ryhora Kastusiova. Ad 12 krasavika jon znachodzicca ŭ «amierykancy» pa spravie ab «zamachu na Alaksandra Łukašenku».
Vadzim Sarančukoŭ. Fota «Novy čas».
«Nijakich źmien faktyčna nie adbyłosia. Staršynioj byŭ i zastajecca Ryhor Kastusioŭ. Ja nie kiruju partyjaj, partyjaj kiruje Sojm. Taksama jość uprava, jakaja rašaje biahučyja pytańni. Dla vykanańnia techničnych funkcyj nam patrebny vykanaŭca abaviazkaŭ. Heta chutčej techničnaje pryznačeńnie, a nie palityčnaje rašeńnie», — kaža Vadzim Sarančukoŭ.
Ci nie strašna jamu ŭ takich palityčnych umovach uskładvać na siabie novyja abaviazki?
«U siońniašnich umovach usio, što ja rablu, lažyć u pravavym poli. Mnie nie strašna ni za što, čym ja zajmajusia».
Jakija hałoŭnyja zadačy na hety momant stajać pierad Partyjaj BNF?
«Samaje asnoŭnym, što my ciapier robim — heta zabieśpiačeńnie dziejnaści arhanizacyi, vyzvaleńnie palitviaźniaŭ i arhanizacyja pracesaŭ, uskładzienych na palityčnuju partyju. Ciapier idzie dyskusija pa farmacie ŭdziełu ŭ palityčnych kampanijach, nakolki heta mahčyma i metazhodna. Rašeńniaŭ pakul što niama. Tym nie mienš ihnaravać palityčnyja pracesy, što adbyvajucca ŭ krainie, partyja nie maje prava».
Ci pačaŭsia ŭžo praces pierarehistracyi BNF, pra jakuju nieadnarazova havaryła kiraŭnictva krainy? «Na siońnia aficyjnych papier ab pačatku pierarehistracyi my nie atrymlivali. Pra heta šmat havorycca, ale maja jurydyčnaja adukacyja nie dazvalaje skazać, što my ciapier znachodzimsia ŭ stanie pierarehistracyi. Usie papiarednija zapyty Ministerstva justycyi my zadavolili ŭ tych abjomach, jakija adpaviadajuć zakanadaŭstvu», — havoryć Sarančukoŭ.
Pa adukacyi Vadzim pravaznaŭca, skončyŭ jurydyčny fakultet Hrodzienskaha ŭniviersiteta. Na hety momant pracuje ramieśnikam. U hramadskim žyćci Sarančukoŭ biare ŭdzieł z 1998 hoda. Byŭ aktyvistam «Maładoha frontu». U 2002 hodzie navat vyłučaŭsia na staršyniu arhanizacyi, ale prajhraŭ vybary Paŭłu Sieviaryncu. Ad 2017 hoda źjaŭlajecca namieśnikam staršyni Partyi BNF. Žanaty, maje traich dziaciej.
