Ministerstva zamiežnych spraŭ na bazie Nacyjanalnaha pres-centra zładziła bryfinh «pa aktualnych pytańniach dla pradstaŭnikoŭ srodkaŭ masavaj infarmacyi».
Na im prysutničali kiraŭniki Departamienta pa avijacyi Ministerstva transpartu i kamunikacyj Biełarusi, Śledčaha kamiteta, Ministerstva abarony, Dziaržaŭnaha pahraničnaha kamiteta, Upaŭnavažany pa spravach relihij i nacyjanalnaściaŭ pry Saviecie Ministraŭ Respubliki Biełaruś.
Siensacyjaj stała prysutnaść na bryfinhu Ramana Pratasieviča. Niepasredna pierad bryfinham šyldačku ź jaho imiem prynios i pastaviŭ na stoł pres-sakratar MZS Anatol Hłaz.
«Heta prosta śmiešna», — tak Raman Pratasievič prakamientavaŭ pytańnie BiełaPAN pra toje, ci praŭda, što ŭ SIZA jaho źbivaŭ asabista Alaksandr Łukašenka.
Paškodžańni na rukach jon nazvaŭ śladami ściažak, jakimi z-za adsutnaści naručnikaŭ ściahnuli jaho ruki ŭ aeraporcie.
Pratasievič šmat razoŭ paŭtaryŭ, što jaho nichto nie źbivaŭ, palcam nie kranuŭ, što jon adčuvaje siabie cudoŭna.
Pratasievič zajaviŭ, što jaho supracoŭnictva sa śledstvam źviazana z uśviedamleńniem, «jaki ŭron ja nanios nie tolki dziaržavie, ale i krainie». «Ja nikomu nie zdradžvaju, ja dapamahaju svajoj krainie», — kazaŭ Pratasievič.
«Raman, ja vam ščyra spačuvaju. Vam ščyra spačuvajuć mnohija vašy kalehi ŭ Biełarusi. Ja mahu ŭjavić, što z vami mahli zrabić. I nivodnamu vašamu słovu ja nie vieru. Prosta trymajciesia, prosta pieražyvicie heta», — skazała Pratasieviču žurnalistka BiełaPAN Taćciana Karaviankova.
Apazicyjny žurnalist Raman Pratasievič byŭ zatrymany ŭ minskim aeraporcie paśla prymusovaj pasadki samalota avijakampanii Ryanair, jaki lacieŭ z Afinaŭ u Vilniu nad Biełaruśsiu. Pratasievič byŭ źmieščany ŭ SIZA KDB.
