Aficyjna razyšlisia pa zhodzie bakoŭ, ale kažuć, što Vaskrasienski prosta nie zachacieŭ razdźmuvać skandał.
Illa Biahun u haściach u Marata Markava. Skryn z telekanała ANT
Praŭładny błohier z Bresta Alaksiej Holikaŭ ahučyŭ takuju viersiju: «Zusim niadaŭna ŭ Minsku adbyłasia adna viadomaja vystava, da jakoj Biahun pavinien byŭ padrychtavać infarmacyjnaje supravadžeńnie. Mała taho, što jon nie vykanaŭ uziatyja na siabie abaviazki, jon jašče pierastaŭ adkazvać na telefanavańni. To-bok prosta źnik. Prychapiŭšy z saboj usie paroli sajta KSDS Vaskrasienskaha. Uvieś kalektyŭ byŭ šakavany nieprahnazavanymi dziejańniami Biehuna».
Sam Illa Biahun u kamientary «NN» tak patłumačyŭ svoj sychod z KSDS: «Heta moj asabisty pohlad. Ja našmat mienš libieralny i demakratyčny za Juryja. Razumiejecie, heta trošku dziŭna, kali arhanizacyja nazyvaje siabie Kruhły stoł demakratyčnych siłaŭ, a ja, chutčej, bolš kansiervatyŭnych pohladaŭ».
Što tyčycca viersii Holikava, to Biahun kaža nastupnaje: «Och… Heta viasiołaja historyja, jakija jon tam sabie nadumaŭ paroli — čysta jahonaja sprava. Paciarpiełaha boku niama — zajavy niama. Nie isnuje nijakaha paniatku «skradzienyja paroli» — heta navat hłupa hučyć. Usiu ŭnutranuju sistemu, fajły, schoviščy — ŭsio nastrojvaŭ sam. Ja da hetaha staŭlusia prosta: sabaki brešuć — karavan idzie».
Sam kiraŭnik KSDS Juryj Vaskrasienski admoviŭsia kamientavać viersiju z parolami. Adznačym, što sajt KSDS nie adnaŭlaŭsia ad 21 maja da 11 červienia.
Paśla taho jak Biahun razyšoŭsia z KSDS, jon staŭ krytykavać «Biełuju Ruś», jakuju jon nazvaŭ «zboryščam babroŭ, što hryzuć biudžet i ničoha nie robiać. Asabliva hetyja simulanty, što ŭ nory schavalisia ŭ žniŭni minułaha hoda, dobra padychodziać pad katehoryju trackistaŭ, što padčas vajny ŭ tavaryša Stalina naohuł pajšli b da ścienki — bo raskładajecca dziaržava znutry», — napisaŭ Biahun.
Illa Biahun — u minułym prahramist, aktyvist štaba Capkały, byŭ palitemihrantam. Paśla vybaraŭ źjechaŭ u Litvu, ale ŭ pačatku 2021 hoda viarnuŭsia ŭ Biełaruś, uklučyŭsia ŭ pracu KSDS, a taksama staŭ hościem dziaržaŭnych telekanałaŭ, dzie brudna vykazvaŭsia pra apazicyju.
Čytajcie taksama: Chto taki Illa Biahun, jaki na dziaržaŭnym TB vylivaje brud na fondy salidarnaści i štab Cichanoŭskaj?
