Fota: citydog.by

Zaviaršyłasia ździełka pa kupli 100% akcyj chołdynhavaj kampanii MTB INVESTMENTS HOLDINGS LIMITED, jakoj naležyć bolš za 99% akcyj ZAT «MTBank». Pakupnikom vystupiła kampanija Stoneva Limited biznesmiena Ramea Abdo. Jon viadzie biznes jak u Biełarusi, tak i ŭ krainach Azii, Afryki i Jeŭropy z pryjarytetami ŭ siektarach telekamunikacyj, infarmacyjnych technałohij i kamiercyjnaj nieruchomaści.

U Biełarusi Ramea Abda źjaŭlajecca adnym z zasnavalnikaŭ hrupy kampanij BNK Estate, jakaja pabudavała ŭ Minsku handlova-zabaŭlalny centr Galileo, biznes-centry Rubin Plaza i Silver Tower. Rašeńnie ab nabyćci kantrolnaha pakieta ŭ ZAT «MTBank» było pryniata z ulikam inviestycyjnaj pryvabnaści banka i vopytu inviestycyj u bankaŭski siektar partnioraŭ pa biznesie.

Partniory pa biznesie Ramea Abda raniej brali ŭdzieł u stvareńni ŭ Biełarusi zakrytaha akcyjaniernaha tavarystva «Bank mižnarodnaha handlu i inviestycyj» (ZAT «Miežhandalbank»). Paśla ZAT «Miežhandalbank» byŭ nabyty kansorcyumam «Alfa-Hrup». Ciapier partniory biznesmiena źjaŭlajucca saŭładalnikami dvuch bujnych bankaŭ Niepała.

Čakajecca, što pryciahnieńnie inviestara dazvolić banku vyjści na novyja mižnarodnyja rynki finansavych resursaŭ, u tym liku krain Blizkaha Uschodu i Azii.

Akcyi byli nabytyja ŭ raniejšych bienieficyjarnych ułaśnikaŭ ZAT «MTBank» — kampanij Enierha-Oił i Biełnaftahaz, jakija vałodali bankam z 2015 hoda. Hetyja kampanii — biznes siamji Alaksieja Aleksina. U studzieni hetaha hoda paviedamlałasia, što biznesoviec pierapisaŭ hetyja kampanii na synoŭ. Mierkavałasia, što pryčyna — u pahrozie jeŭrapiejskich sankcyj. Ciapier u schiemie bienieficyjarnych ułaśnikaŭ na sajcie MTBanka paznačana, što pa 40% doli ŭ Enierha-oił prypadaje na Vitala i Dźmitryja Aleksinych, jašče 20% — na Inu Aleksinu (žonku biznesmiena).

Što tyčycca ciapierašniaj ździełki, to na sajcie MTBanka ŭdakładniajecca:

— Niahledziačy na niaprofilnaść bankaŭskaha biznesu ŭ inviestycyjnym partfieli i hatoŭnaść da patencyjnaha prodažu banka, papiarednija ŭłaśniki razhladali finansavy instytut jak pryjarytetny biznes-kirunak. Za 6 hadoŭ bank prajšoŭ istotnuju transfarmacyju, pieratvaryŭšysia ź pieravažna roźničnaha banka va ŭniviersalny bank, i ŭzmacniŭ svaju prysutnaść u biznes-siehmiencie. Za hety čas byŭ zapuščany ceły šerah novych praduktaŭ, mnohija ź jakich stali ŭnikalnymi dla finansavaha rynku Biełarusi. Pośpiechi ZAT «MTBank» paćviardžajucca rostam kapitału bolš čym u 3 razy i niadaŭniaj ździełki pa nabyćci ZAT «Ideja Bank» u Getin Holding S. A. i Getin International S. A. (Polšča).

Клас
Панылы сорам
Ха-ха
Ого
Сумна
Абуральна