Spravy 42-hadovaj Mai Šatochinaj i 26-hadovaha Juryja Klimašeŭskaha razhladzieła sudździa Julija Čyž. Minčukoŭ abvinavacili ŭ «vyražeńni svaich palityčnych intaresaŭ šlacham raźmiaščeńnia na aknie adnaho biełaha arkuša papiery». Za heta pravaparušeńnie Maju i Juryja zatrymali doma. Pry hetym, u chłopca padčas pieratrusu kanfiskavali dva telefony i dva noŭtbuki.

Na sudzie jany paćvierdzili, što vyviešvali arkušy na akno, ale ź inšaj metaj. Pa słovach Šatochinaj, arkuš papiery jana źniała adrazu paśla taho, jak patelefanavali ź milicyi, i navat zrabiła videa, na jakim bačna, što na papiery jość piśmovyja zaŭvahi. U Juryja, ź jaho słovaŭ, taksama na papiery byli zapisy.

U vyniku, sudździa Čyž pakarała Maju i Juryja 15-sutačnymi aryštami pa art. 24.23 KaAP.

34-hadovaha Dzianisa Kulikova i 31-hadovaha Andreja Muraŭjova zatrymali taksama doma. Na nastupny dzień ich spravy razhladzieła sudździa Frunzienskaha rajona Maryja Jarochina.

Zhodna z pratakołam, na aknie ŭ Dzianisa visieli dva arkušy papiery, a ŭ Andreja — čatyry. Sudździu Jarochinu cikaviła «sensavaja nahruzka» papiery na aknie. Ale mužčyny śćviardžali, što vyviešvali ich nie z-za palityčnych pohladaŭ.

Sudździa paličyła vinu mužčyn pa art. 24.23 KaAP całkam dakazanaj i aryštavała Dzianisa na 13 sutak, a Andreja — na 28 sutak.

Клас
0
Панылы сорам
0
Ха-ха
0
Ого
0
Сумна
0
Абуральна
0