Viciebski enierhietyk
Piatruša rodam ź Viciebska, tam skončyŭ technałahičny ŭniviersitet u 2006 hodzie, u 2012 hodzie — Akademiju kiravańnia.
Pracoŭnuju dziejnaść pačaŭ u 2006 hodzie majstram słužby ekspłuatacyi hazavaj haspadarki filijała «Viciebskaje vytvorčaje ŭpraŭleńnie hazavaj haspadarki «RUP» Viciebskabłhaz».
U pieryjad z 2008 pa 2016 hady praciahnuŭ pracu na pradpryjemstvie «Viciebskabłhaz» na kirujučych pasadach.
Ź lipienia 2016 pa červień 2018 pracavaŭ na «Biełpalivahazie» na pasadzie namieśnika hienieralnaha dyrektara — načalnika ŭpraŭleńnia i pierśpiektyŭnaha raźvićcia i inviestycyj dziaržaŭnaha vytvorčaha abjadnańnia pa palivie i hazifikacyi.
Samy małady kiraŭnik u stalicy
U 2018 hodzie Piatruša byŭ pryznačany na pasadu kiraŭnika Centralnaha rajona Minska, źmianiŭšy byłoha BRSMaŭca Ihara Buzoŭskaha (toj syjšoŭ u Mininfarm). Na toj momant 34-hadovy Piatruša byŭ samym maładym kiraŭnikom rajona ŭ stalicy.
Ź siamji čynoŭnika
Baćka maładoha čynoŭnika taksama dziarsłužačy — siońnia Viktar Piatruša ŭznačalvaje pradpryjemstva «Hałoŭdziaržbudekśpiertyza».
Dźmitry Piatruša žanaty, maje dvaich dziaciej: syna i dačku. Žonka taksama rodam ź Viciebska.
Kazaŭ, što bieł-čyrvona-biełyja ściahi možna viešać na bałkonach
U vieraśni 2020 Piatruša pravioŭ vyjazny pryjom hramadzian, dzie jaho spytali, čamu ludziam zabaraniajuć źbiracca ŭ dvarach i raźviešvać bieła-čyrvona-biełyja ściahi. Čynoŭnik adkazaŭ: simvolika nie zabaronienaja, pytańni, maŭlaŭ, uźnikajuć tolki kali ściahi viešajuć na fasad.
«Časam zakryvajuć navat vokny susiedziam, jany skardziacca. Tady my prosim ściahi samim źniać, kali nie chočuć, to pryciahvajem da administratyŭnaj adkaznaści, — skazaŭ jon. — Nie čapajem fasad, a doma, kali jość žadańnie, — kali łaska. Ale ž śviatła budzie mienš traplać».
Sprabavaŭ «spynić pieramieny»
Najbolšuju viadomaść Dźmitry Piatruša nabyŭ uletku 2020 hoda. Na praŭładnym mierapryjemstvie, jakoje prachodziła ŭ Kijeŭskim skviery Minska, chłopcy z Pałaca moładzi, jakija stajali za dydžejskim pultam, niečakana ŭklučyli pieśniu Viktara Coja «Pieramien». Ludzi na płoščy žyva adreahavali na heta, pačali apładziravać.
Piatruša padlacieŭ da kałonak i pačaŭ vydzirać ź ich draty. Taksama jon paklikaŭ milicyju, dydžejaŭ chutka zatrymali.
Minuŭ hod. Dydžei Kirył Hałanaŭ i Uład Sakałoŭski, jakija ŭklučyli Coja, paśpieli adsiadzieć na sutkach, stać simvałam pratestu i ŭrešcie źjechać z krainy.
A Dźmitry Piatruša zaniaŭ hałoŭnaje kresła na bujnym dziaržpradpryjemstvie.
