Tematyka, ščyra kažučy, va ŭsich amal adnolkavaja: padtrymlivajem dziejnuju ŭładu, asudžajem sankcyi i cisk na krainu, zachaplajemsia chlebarobami, nahadvajem moładzi pra žachi vajny. Akramia taho, pracoŭnyja spravazdačy: pravioŭ pryjom, byŭ na sustrečy, vystupiŭ u škole i hetak dalej. Ale časam traplajucca cikavostki.

Chtości naŭprost kapiruje saviecki «ŭzvyšana-patryjatyčny» styl, jak homielskaja deputatka Iryna Daŭhała. U svaim telehram-kanale (177 padpisčykaŭ) pad nazvaj «Iryna Daŭhała. Za hodnaje žyćcio!» jana dzielicca dumkami i mastackimi narysami. Časam navat zanadta mastackimi.

«STIENOJU V POLE CHLEB STOIT, I ŚPIEŁYM ZVONOM MANIT KOŁOS…», tak — i mienavita vialikimi litarami — nazyvajecca jaje natatka pra zbor uradžaja.

«Siońnia my mieli mahčymaść realna dakranucca da śviatoha… Kołas, zierni jakoha nalityja i miakka schilajucca pad piaščotnym letnim vietrykam. Kambajny ciarpliva čakajuć vychadu ŭ pole paśla daždžu, a kambajniory, pazirajučy ŭ nieba, znoŭ i znoŭ praviarajuć techničnuju spraŭnaść svajoj techniki, — piša Daŭhała. — Kali cełaja kamanda pradstaŭnikoŭ AAT «Miłkavita», rajonnych arhanizacyj «Biełaja Ruś», BRSM, Sajuza žančyn i inšyja pryjechali da sapraŭdnych hierojaŭ žniva, to jany byli pryjemna ździŭleny. Akramia zaŭsiody patrebnych u pracy i ŭ pobycie rečaŭ, jakija pryvieźli dla miechanizataraŭ, byli kranalnyja listy ad dziaciej-haradžan, miedaljony ŭ vyhladzie ziarniatak, — usio heta pieradali ŭsim, chto pracuje ŭ poli».

U baranavickaj deputatki Ludmiły Žałnierčyk (byłaja supracoŭnica SK) padpisčykaŭ pakul niašmat — usiaho 47 čałaviek.

Ale heta nie pieraškadžaje joj amal štodnia vinšavać rabotnikaŭ z prafiesijnymi śviatami i pościć svaje fotazdymki z namienkłaturnych mierapryjemstvaŭ. Nu i dziakavać chlebarobam za chleb, samo saboju.

Niekatoryja vybirajuć instahram, jak mahiloŭskaja deputatka Natalla Tarasienka.

Jana raskazvaje 228 padpisčykam pra pracoŭnyja pajezdki i sustrečy, nie zabyvaje chvalić unutranuju stabilnaść i asudžać «źniešniuju ahresiju» i sankcyi. Dzielicca vyrašanymi zadačami: «Sa svaim pytańniem — akazańniem dapamohi ŭ ramoncie dziciačych arelaŭ u Čavusach pa vuł. Leninskaj, 5 — źviarnuŭsia samy małady ŭdzielnik schodu. Pry vyjeździe na miesca akazałasia, što słužbaj ŽKH areli apieratyŭna z ranicy adramantavanyja, i na ich užo katalisia dzieci. Pryniata rašeńnie ŭmacavać dziciačy abjekt antyvandalnaj śpinkaj, što nie dazvolić złamać siadzieńnie arelaŭ bolš darosłym «dzieciam». Z hetym rašeńniem pahadzilisia i maładyja baćki, jakija pražyvajuć u damach pobač i časta naviedvajuć dziciačuju placoŭku».

A homielski deputat Vitalij Utkin (531 padpisčyk u instahramie) padčas sustreč z pracoŭnymi kalektyvami nie zabyvajecca nahadvać, dziakujučy kamu paśmichajucca biełaruskija dzieci na vulicach: «Naša kraina sutyknułasia z mnostvam raznastajnych i tryvožnych vyklikaŭ, arhanizavanych destruktyŭnymi siłami.

Niahledziačy na heta, naš biełaruski narod na čale z prezidentam Łukašenkam A. R. zachavaŭ mirnaje nieba nad Biełaruśsiu i viarnuŭ mir, spakoj, paradak i dziciačyja ŭśmieški na vulicy našych haradoŭ».

Časam u dopisach deputataŭ možna znajści sapraŭdy karysnyja parady. Łuniniecki deputat Anatol Nasienia, naprykład, siarod spravazdač pra svaje sustrečy z nasielnictvam, zaklikaje vakcynavacca ad kavidu.

Spadziajomsia, jaho 625 padpisčykaŭ prysłuchajucca. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?