Pasiedžańnie pavinna było pačacca ŭ 15.00, adnak jaho pieranieśli na niapeŭny čas — staršynia TBM Alena Anisim 26 žniŭnia padała dakumenty na abskardžvańnie papiaredžańniaŭ i chadajničała ab pieranosie pazovu. Pradstaŭnik Ministerstva justycyi nie piarečyŭ.

14 lipienia ŭ siadzibie TBM adbyŭsia pieratrus. Siłaviki zabrali kalandaryki, vydadzienyja ŭ 2018 hodzie da 100-hodździa BNR, asobnyja knihi, arhtechniku — manitory, systemnyja bloki. Pieratrus adbyvaŭsia z sankcyi namieśnika prakurora Miensku.

Mienavita ŭ hetyja dni Minjust patrabavaŭ ad TBM (dy inšych niaŭradavych arhanizacyj — BAŽ, SBP, ZBS «Baćkaŭščyna») pradstavić dakumentacyju. Buchhaltarskija dakumenty byli ŭ zatrymanaj 8 lipienia Volhi Rakovič — hałoŭnaha buchhaltara «Našaj Nivy», jakaja dapamahała TBM pa damovie padradu.

Hramadzkaja arhanizacyja ŭ toj ža dzień atrymała dva piśmovyja papiaredžańni ad Ministerstva justycyi za niasvoječasova pieradadzienyja dakumenty, jakich čynoŭniki patrabavali ŭ miežach pazaplanavaj pravierki.

«U papiaredžańniach byli farmalnyja pryčepki, ničoha surjoznaha, tamu budziem zmahacca dalej», — skazała Alena Anisim.

U vypadku likvidacyi arhanizacyi taksama spyniacca i zasnavanyja tavarystvam hazety «Naša słova» i «Novy čas».

Tavarystva biełaruskaj movy isnuje z 1989 hodu. Siarod jaho inicyjataraŭ u toj čas byli Sajuz biełaruskich piśmieńnikaŭ, ministerstvy adukacyi i kultury, Akademija navuk, Biełteleradyjokampanija.

9 žniŭnia Viarchoŭny sud likvidavaŭ Biełaruski PEN-centar, na čale jakoha staić Nobeleŭskaja laŭreatka Śviatłana Aleksijevič. 24 žniŭnia tam ža adbyłosia sudovaje pasiadžeńnie ŭ spravie likvidacyi Sajuzu biełaruskich piśmieńnikaŭ, a 25-ha — Zhurtavańnia biełarusaŭ śvietu «Baćkaŭščyna».

27 žniŭnia razhladajecca sprava ab likvidacyi Biełaruskaj asacyjacyi žurnalistaŭ. A na 15 vieraśnia Viarchoŭny sud pryznačyŭ razhlad pazovu ab likvidacyi hramadzkaha abjadnańnia «BNF «Adradžeńnie»».

Клас
0
Панылы сорам
0
Ха-ха
0
Ого
0
Сумна
0
Абуральна
0