Ksienija adpracavała na dziaržaŭnym telebačańni 15 hod. Zdymała dakumientalnyja filmy i histaryčnyja repartažy — pra Druhuju suśvietnuju vajnu, Čarnobylskuju katastrofu. Inšyja jaje prajekt — dakumientalnyja dramy: žyćciovyja apoviedy pra siamju, adzinotu, kachańnie.

U žniŭni 2020 hoda žurnalistka zvolniłasia z BT i chacieła zapuścić alternatyŭny kanał. Dałučyłasia da Kaardynacyjnaj rady, dzie adkazvała za suviazi z presaj. Vidać, tamu i trapiła pad udar.

Detali novaj kryminalnaj spravy pakul nieviadomyja — advakat pad padpiskaj ab nierazhałošvańni.

Siamja Ksienii vielmi niepakoicca za jaje zdaroŭje. U 2012 hodzie žurnalistcy zrabili składanuju apieracyju na hałaŭnym mozhu — vydalali puchlinu. Jašče adna zastałasia, jaje niemahčyma było vyrazać. Ale ŭsio trymali pad kantrolem.

«U jaje było narmalnaje samaadčuvańnie, kožny hod pravodzili abśledavańnie. A za miesiacy ŭ turmie značny rost pajšoŭ. Jaje vazili dva razy na MRT — u mai i ŭ lipieni. Vyniki pakazvajuć, što puchlina pavialičyłasia. Dačce nieabchodna kansultacyja, my dabivajemsia, kab jaje advieźli na pryjom u centr nieŭrałohii i niejrachirurhii, kab zrazumieć, što i jak rabić dalej.

U Ksienii da 1 vieraśnia paścielny režym. U jaje mocnyja hałaŭnyja boli, pastajanna koluć abiazbolvalnyja. Ja joj tabletki važu kožny paniadziełak», — raskazvaje baćka Aleh Łuckin.

Doma žurnalistku čakaje syn-šaścikłaśnik. Svajo 11-hodździe jon adznačyŭ biez mamy.

«Kožny dzień zadaje pytańnie, kali jana vierniecca. 23 čysła, kali ŭ Ksienii zakančvaŭsia termin utrymańnia pad vartaj, jon mnie zvaniŭ, płakaŭ, a ja skazać ničoha nie moh. «Dzie mama?» — pytaŭsia z takoj pretenzijaj, maŭlaŭ, dziadula, ty maŭčyš, ty niešta chavaješ.

My z Maćviejem razmaŭlajem, jak siabry. Učora hutaryli da pałovy 12-j — i pra mamu, i pra byt, i pra toje, jak treba žyć. Być sumlennym, vieryć u siabie i nie padmanvać nikoha.

Pišam razam ź im listy mamie. Raskazvajem, što schadzili na rečku, pakupalisia, starajemsia nie zasmučać ničym. Ksienija ŭ kožnym liście ŭkładaje dla jaho asobnuju paštoŭku. Jana vielmi chvalujecca za dzicia, jak da škoły sabraŭsia, jak tam inšyja pobytavyja rečy».

Listy ad Ksienii chodziać drenna, choć jana šmat piša. Siamja atrymlivaje karespandencyju raz na dva tydni — adrazu pa try listy.

«Ksienija trymajecca. U kožnym liście zapeŭnivaje: «Usio budzie dobra» — i šle ŭśmieški. Ale za apošnija dva miesiacy ŭ jaje vielmi mocna zdaroŭje ŭpała.

Advakat jaje raz na tydzień naviedvaje. A mnie zabaranili spatkańni. Ja źviartaŭsia trojčy z hetaj prośbaj — usie razy admovili».

Doma ŭ žurnalistki była vialikaja biblijateka. Tamu i za kratami jana šmat čytaje. Z apošniaha — zamaŭlała Poźniera.

U adnym ź listoŭ Ksienija tak zhadvała svaju pracu nad telefilmam pra vajnu:

«Ja ludziej pakazała ŭ tych abstavinach, pieražyć jakija nie ŭsim pad siłu. Dumała pra svaich prodkaŭ, kali pisała. Ciapier — sama ŭ padobnych abstavinach… Bačyš, jak žyćcio pavaročvajecca».

Nahadajem, astatnija fihuranty spravy «Pres-kłuba» vyjšli na svabodu: jany spłacili ŭron, jaki naličyła śledstva, kampiensacyju (ahułam kala 200 tysiač rubloŭ) i padpisali prašeńnie ab pamiłavańnie na imia Łukašenki. Pa infarmacyi «Našaj Nivy», Łuckina admoviłasia padpisvać takoje prašeńnie. 

Adras dla listoŭ Ksienii Łuckinaj: 220030, h. Minsk, vuł. Vaładarskaha, 2. SIZA №1.

Čytajcie taksama:

Historyja Ksienii Łuckinaj, jakaja 15 hod pracavała na BT, a ciapier apynułasia ŭ SIZA za sprobu stvaryć alternatyŭny kanał

Клас
0
Панылы сорам
0
Ха-ха
0
Ого
0
Сумна
0
Абуральна
0