Sud Niaśvižskaha rajona 18 kastryčnika vynies prysud pa kryminalnaj spravie Andreja Łomšy, jakoha vinavacili pavodle troch artykułaŭ Kryminalnaha kodeksa: u paklopie (art. 188 KK), abrazie prezidenta (č. 1 art. 368 KK) i abrazie pradstaŭnika ŭłady (st. 369 UK).
Spravu razhladaŭ sudździa Dźmitryj Hvozd, bok dziaržabvinavačvańnia padtrymlivaŭ Siarhiej Łycin. Paciarpiełymi pa spravie byli pryznanyja sudździa Bresckaha abłasnoha suda Kaciaryna Hruda, supracoŭniki milicyi Viktar Turčynovič i Alaksandr Lisica.
Pavodle abvinavačvańnia, 17 žniŭnia 2020 hoda Andrej Łomša ŭ «Adnakłaśnikach» pastaviŭ łajk na publikacyju karystalnika Alaksandra Pleskaceviča pra kamandzira ŭzvoda DAI h. Baranavičy, kapitana milicyi Alaksandra Lisicu nastupnaha źmiestu:
«Darahija žychary horada Baranavičy, kali vy viedajecie hetaha čałavieka ci jaho svajakoŭ, prašu pieradać, što takija miarzotniki nie pavinny spać spakojna, jon vielmi niebiaśpiečny dla hramadstva, jany źbivajuć žorstka dziaciej i žančyn, zatrymlivajuć prostych ludziej, jakija prachodziać mima. Takija miarzotniki, jak jon, nie zasłuhoŭvajuć žyć u hramadstvie».
25 žniŭnia 2020 hoda Andrej Łomša ŭ dopisie pra namieśnika načalnika pa ideałahičnaj i kadravaj pracy Kobrynskaha RAUS Viktara Turčynoviča pastaviŭ adznaku «kłas», dzie paznačałasia:
«Voś jašče adzin miarzotnik asabista pa-źviersku źbivaje ludziej u izalatary Kobryna. Turčynovič Viktar. Hety biazmozhi kiraŭnik kiravaŭ źbivańniami i katavańniami na terytoryi IČU našaha horada».
Taksama 29 žniŭnia 2020 abvinavačvany pad publikacyjaj pra sudździu na toj momant suda horada Baranavičy Kaciarynu Hrudu pastaviŭ adznaku «kłas» pad tekstam:
«Hruda Kaciaryna Mikałajeŭna — sudździa horada Baranavičy i Baranavickaha rajona sfabrykavała dziasiatki administracyjnych pravaparušeńniaŭ padčas mitynhaŭ u horadzie Baranavičy. Nijakich dokazaŭ nie pradstaŭlała, śviedak nie było, zapisaŭ videakamier taksama, prosta sudzilišča i kanviejer».
Pavodle słoŭ prakurora, svaimi dziejańniami — łajkami dopisaŭ — Andrej Łomša ździejśniŭ złačynstva, praduhledžanaje art. 188 Kryminalnaha kodeksa («Paklop»).
Abvinavačvany padzialiŭsia pakazanymi publikacyjami pra Alaksandra Lisicu i Viktara Turčynoviča na svajoj staroncy ŭ «Adnakłaśnikach», što było kvalifikavana jak abraza pradstaŭnikoŭ ułady (art. 369 KK).
Akramia hetaha, Andrej Łomša 20 žniŭnia 2020 hoda padčas prahladu staronki «Ja suprać hetaha režymu» pastaviŭ adznaku «kłas» pad zmantavanaj vyjavaj Łukašenki ŭ abraźlivym vyhladzie — u nacysckaj formie — i zrabiŭ pierapost zhadanaj infarmacyi.
Hetaje dziejańnie abvinavačanaha było kvalifikavanaje jak abraza prezidenta pavodle č. 1 art. 368 Kryminalnaha kodeksa.
Andrej Łomša kazaŭ, što nie razumieje, jak za paznaku «kłas» možna sudzić, nijakich kamientaroŭ pad pakazanymi publikacyjami jon nie pakidaŭ.
Padčas sprečak bakoŭ prakuror zapatrabavaŭ dla Andreja Łomšy pakarańnie ŭ vyhladzie abmiežavańnia voli z nakiravańniem u papraŭčuju ŭstanovu adkrytaha typu terminam na try hady, a taksama zadavolić zajaŭleny pazoŭ u poŭnym abjomie.
Mienavita taki prysud 18 kastryčnika i vynies sudździa Dźmitryj Hvozd: 3 hady «chimii» i 1000 rubloŭ kampiensacyi maralnaj škody na karyść paciarpiełaha Turčynoviča.
