Pra heta «Miedyjazonie» raspaviali ŭ pres-słužbie arhanizacyi.
Rasijanina adpuścili z bresckaha SIZA №7, dzie jon pravioŭ bolš za dva tydni.
Łanšakova zatrymali 29 vieraśnia i źmiaścili ŭ SIZA. Jak adznačali «Śviedki Ijehovy», ad biełaruskich siłavikoŭ vierniku stała viadoma, što ŭ Rasii jon prachodzić pa kryminalnaj spravie ab arhanizacyi ekstremisckaj arhanizacyi (častka 1 artykuła 282.2 KK RF) i abvieščany ŭ miždziaržaŭny vyšuk.
Z-za «relihijnych represij» u 2020 hodzie Łanšakoŭ źjechaŭ u Biełaruś i žyŭ u Breście bolš za hod. Jon atrymaŭ vid na žycharstva i prasiŭ ab palityčnym prytułku.
«Śviedki Ijehovy» adznačajuć, što chadajnictva ab prytułku MUS Biełarusi razhledzić «u najbližejšyja tydni».
U krasaviku 2020 hoda Hienprakuratura Biełarusi admoviła Rasii ŭ vydačy ijehavista Mikałaja Machaličava. Jaho zatrymali padčas padarožža pa Biełarusi; u Rasii suprać Machaličava rasśledavałasia kryminalnaja sprava pavodle častki 1 artykuła 282.2 KK RF (Udzieł u ekstremisckaj arhanizacyi). Apynuŭšysia ŭ viciebskim izalatary, viernik, jak i Łanšakoŭ, paprasiŭ palityčnaha prytułku. Paśla admovy ŭ vydačy Rasii jaho vyzvalili ź SIZA.
Viasnoj 2017 hoda Viarchoŭny sud Rasii pryznaŭ «Śviedak Ijehovy» ekstremisckaj arhanizacyjaj i zabaraniŭ ich dziejnaść na terytoryi krainy.
Paśla hetaha pa ŭsioj Rasii stali ŭzbudžać kryminalnyja spravy suprać adeptaŭ vieravučeńnia, ich abvinavačvajuć va ŭdziele ŭ zabaronienaj ekstremisckaj arhanizacyi (artykuł 282.2 KK). «Śviedki Ijehovy» rehularna paviedamlajuć pra źbićcio adeptaŭ siłavikami.
