U kamiunikie samitu dziejańni režymu Łukašenki nazvali «hibrydnaj atakaj». Heta termin, jaki z samaha pačatku vykarystoŭvali Litva, Łatvija i Polšča — krainy, kudy pierš za ŭsio prybyvajuć mihranty. Ciapier jaho vykarystoŭvajuć praktyčna paŭsiudna ŭ ES.

«Jeŭrapiejski saviet nie budzie mirycca ź lubymi sprobami trecich krain vykarystoŭvać mihrantaŭ u palityčnych metach. Jon asudžaje hibrydnyja ataki na miežach JEZ i budzie reahavać adpaviedna», — adznačajecca ŭ kamiunikie samitu.

U adkaz na dziejańni režymu Łukašenki Jeŭrasajuz pryhraziŭ «pryniać dalejšyja abmiežavalnyja miery suprać fizičnych i jurydyčnych asob». Choć hetaje pytańnie jon i nazvaŭ «nieadkładnym», nijakich časavych ramak na samicie, jak zvyčajna, nie nazvali. Jak paviedamlali ŚMI raniej, pryniaćcie piataha pakieta sankcyj čakajecca ŭ listapadzie.

Rašeńnie samitu paćvierdziła, što palityčnaja padtrymka novych sankcyj jość. Sprečnym zastajecca praktyčnaje napaŭnieńnie piataha pakieta.

Paśla prymusovaj pasadki samalota Ryanair u Minsku ŭ kancy traŭnia Jeŭrasajuz uvioŭ žorstkija abmiežavańni ŭ dačynieńni da biełaruskich avijakampanij. Im zabaranili vykarystoŭvać pavietranuju prastoru i aeraporty ES. Šerah dziaržaŭ, u pryvatnaści Ukraina, dałučyłasia da hetaj miery.

Ale pry hetym ułasna ŭ sankcyjny śpis Jeŭrasajuz nie ŭnios ni adnu biełaruskuju avijaliniju. Uklučeńnie ŭ hety pieralik aznačaje, što kampanijam i fizičnym asobam ź Jeŭrasajuza budzie zabaroniena pradastaŭlać srodki abo ekanamičnyja resursy pradpryjemstvam, jakija akazalisia pad abmiežavańniami.

Heta važna, tamu što dziaržaŭny biełaruski pieravozčyk vielmi zaležyć ad zachodnich kampanij. Pavodle źviestak profilnaha šviejcarskaha resursu ch-aviation, «Biełavija» vałodaje tolki dzieviaćciu z 29 samalotaŭ svajho kamiercyjnaha fłotu. 20 avijałajnieraŭ jana ŭziała ŭ lizinh, pieravažna ŭ jeŭrapiejskich firmaŭ: pa siem u irłandskich i ŭ dackaj kampanii, i jašče adzin — u rumynskaj.

Astatnija samaloty ŭ lizinh padali try kampanii z ZŠA. Charakterna, što adna ź ich — Air Lease Corporation — u krasaviku hetaha hoda pieradała «Biełavija» ŭ lizinh novy Boeing 737 MAX 8, pieršy taki samalot z partyi ŭ piać adzinak.

Susiednija ź Biełaruśsiu krainy ES jašče ź leta damahajucca zabarony jeŭrapiejskim kampanijam pradastaŭlać pasłuhi «Biełavija». Temu mahčymych sankcyj abmierkavali 18 kastryčnika ministry zamiežnych spraŭ krain ES na pasiadžeńni ŭ Luksiemburhu. Pa jaho vynikach kiraŭnik jeŭrapiejskaj dypłamatyi Žazep Barel zajaviŭ: «My hatovyja implemientavać sankcyi suprać dziaržaŭnaj kampanii Biełarusi («Biełavija». — NN.)».

Adnak Jeŭrasajuz moža ŭvieści sankcyi tolki sa zhody ŭsich 27 jaho dziaržaŭ-členaŭ. Dublin nie źjaŭlajecca prychilnikam mier, jakija mohuć nanieści škodu irłandskim kampanijam. Ale ministr zamiežnych spraŭ Irłandyi Sajman Koŭvieni, razmaŭlajučy ŭ Luksiemburhu z žurnalistami, nieadnarazova padkreślivaŭ, što jaho kraina padtrymlivaje novyja sankcyi ŭ dačynieńni da Biełarusi: «My adkrytyja dla novaha raŭnda sankcyj suprać asob u Biełarusi».

Na dumku Koŭvieni, novyja kantrakty na lizinh samalotaŭ pavinny być zabaronienyja. A voś anulavańnie dziejnych kantraktaŭ jon nazvaŭ składanym pytańniem, pakolki havorka idzie ab «jurydyčnych abaviazacielstvach».

Vidavočna, što zabarona tolki na budučyja kantrakty nijak nie paŭpłyvaje na najaŭnyja ŭ «Biełavija» mahčymaści pierapraŭlać mihrantaŭ u Biełaruś. Znajści rašeńnie zaraz sprabujuć u Saviecie ES na pracoŭnym uzroŭni. A pakolki «Biełavija» ŭziała ŭ lizinh samaloty nie tolki ŭ jeŭrapiejskich kampanij, to kiraŭnik MZS Łatvii Edhars Rynkievičs zajaviŭ, što JEZ varta šukać skaardynavany padychod z krainami, jakija prytrymlivajucca padobnych pohladaŭ, u pryvatnaści ZŠA, Kanadaj, Vialikabrytanijaj.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?