Hetym razam padviedzieny vyniki 9 miesiacaŭ 2021 hoda. Tavaraabarot arhanizacyj handlu za 9 miesiacaŭ skłaŭ 36,4 młrd rubloŭ. Pry hetym prodažy tavaraŭ ajčynnaj vytvorčaści dasiahnuli 21,7 młrd rubloŭ, paviedamlajuć banki24.by.
Udzielnaja vaha biełaruskaj pradukcyi ŭ tavaraabarocie arhanizacyj źniziłasia da 59,5%. Dola ajčynnych tavaraŭ u prodažach stała rekordna nizkaj, kali paraŭnoŭvać jaje z pakazčykami za 9 miesiacaŭ na adrezku 2013-2021 hh.
U studzieni — vieraśni 2013 hoda ŭdzielnaja vaha biełaruskaj pradukcyi jašče dasiahała 71,7%.
Zatym u 2014 hodzie jon upaŭ da 70,7%, u 2015-m — da 69,8%, u 2016-m — da 66,2%, u 2017-m — da 65%, u 2018-m — da 63,4%, u 2019-m — da 61,6% i ŭ 2020-m — da 60,7%.
Prykmietna, što na praciahu 8 hadoŭ zapar vaha ajčynnych tavaraŭ u prodažach pastajanna pamianšałasia.
Heta adbyvałasia niahledziačy na dekłaracyi čynoŭnikaŭ ab impartazamiaščeńni na spažyvieckim rynku. U sumie za pakazany čas dola tavaraŭ made in Belarus skaraciłasia na 12,2 adsotkavaha punkta.
Pa pryniataj u krainie kłasifikacyi tavary byvajuć charčovymi i niecharčovymi.
U pieršuju katehoryju ŭvachodziać charčovyja pradukty, napoi i tytuniovyja vyraby, u druhuju — usio astatniaje.
U abiedźviuch tavarnych hrupach idzie pastupovaje pamianšeńnie doli biełaruskaj pradukcyi. Adnak pa tavarach niecharčovaj hrupy heta adbyvajecca chutčej, i ŭ hetaj katehoryi ajčynnyja vytvorcy ŭžo sastupili hałoŭnaje stanovišča na rynku. Za 2013-2021 hh. udzielnaja vaha biełaruskich charčovych tavaraŭ skaraciłasia z 83,3% da 76,8%.
Paralelna ŭ niecharčovaj hrupie dola ajčynnaj pradukcyi ŭpała z 56,3% da 40,9%
Čamu pradukty charčavańnia ź Biełarusi jašče ŭtrymlivajuć unutrany rynak?
Heta moža być źviazana z łahistykaj dastaŭki charčavańnia ź inšych krain: mnohija tavary chutka psujucca, dy i vydatki na pieravozki ŭ Biełaruś mohuć być zanadta vysokija. Takuju pradukcyju prosta niama sensu ŭvozić u našu krainu. Zrešty, siarod charčovych praduktaŭ usio roŭna jość pazicyi, dzie daminuje impart.
Pa vynikach 9 miesiacaŭ 2021-ha heta śviežyja sadavina i arechi (dola impartu 92,7%), ryba (87,2%), alej (84,8%). Siarod niecharčovych tavaraŭ nizkaja dola biełaruskich fiksavałasia ŭ prodažach aŭtamabilaŭ (13,9%), televizaraŭ (14,5%), pralnych mašyn (15%), parfumierna-kaśmietyčnaj pradukcyi i tualetnych pryład (17,8%).
