Nahadajem, zaraz u kramach jość śpiecyjalnyja asartymientnyja pieraliki tavaraŭ, što abaviazkova pavinny być na palicach. Ale abaviazkaŭ pa dolach prodažu ajčynnych tavaraŭ niama. Inšymi słovami, kramy chočuć abaviazać pradavać peŭny abjom taho ci inšaha biełaruskaha tavaru.
Dla čaho robicca taki zachad? U abhruntavańni da prajekta ŭkaza aŭtary spasyłajucca na Daktrynu nacyjanalnaj charčovaj biaśpieki da 2030 hoda. Jana praduhledžvaje źnižeńnie doli impartnych charčovych tavaraŭ na ŭnutranym rynku da 14% jakraz da 2030 hoda.
U 2020-m abjom impartu ŭ biełaruskim handli skłaŭ 22,9%, adznačajuć čynoŭniki, a ŭdzielnaja vaha ajčynnych praduktaŭ u roźničnym tavaraabarocie źniziłasia da 59,8%.
«Vysokaj zastajecca dola asobnych zamiežnych charčovych tavaraŭ u ahulnym abjomie roźničnaha prodažu asobnych tavaraŭ: sadaviny — 92,8%, aleju — 87,5%, ryby — 82,5%, hrečki — 66,3%, cukrovych kandytarskich vyrabaŭ — 51,9%, fruktovych i harodninnych sokaŭ — 39%, makaronnych vyrabaŭ — 37,4%, dziciačaha charčavańnia — 29,1%», — adznačajuć aŭtary zakonaprajekta.
MARH dadaje: mahutnaści biełaruskich charčovych vytvorcaŭ dazvolać roźničnamu handlu spakojna zabiaśpiečyć minimalnyja doli prodažu ajčynnych praduktaŭ.
Pieralik tavaraŭ i ich doli budzie vyznačać Saviet ministraŭ. Ale raspracoŭščyki ŭžo prapanavali ŭstanavić nastupnyja minimalnyja doli prodažu na nastupny hod: bulba i miasnyja kansiervy — 97%, morkva — 96%, cukar — 95%, buraki — 94%, kapusta — 85%, cybula i ahurki — 84%, mučnyja i kandytarskija vyraby — 76%, dziciačaje charčavańnie — 72%, makarony — 67%, soki — 45%, jabłyki — 20%, alej — 15% i hetak dalej.
«Padčas raźlikaŭ pakazčykaŭ prodažu hetych tavaraŭ uziali najbolšyja značeńni pakazčykaŭ prodažu takich tavaraŭ za apošnija 7 hod (z 2014 pa 2020 hady)», — adznačajuć stvaralniki prajekta ŭkaza.
Nie vykanaŭ — štraf na 500 bazavych
Vykonvać hetyja novaŭviadzieńni buduć abaviazanyja ŭsie jurydyčnyja asoby, što pracujuć u roźničnym handli. Vyklučeńni — mikraarhanizacyi i fiermierskija ci sialanskija haspadarki.
Tyja rytejlery, u jakich ahulnaja dola prodažu ajčynnych tavaraŭ zajmaje mienš za 85% pavinny buduć dadatkova jašče i naroščvać abjomy prodažu biełaruskaha. Na nastupny hod prapanujecca ŭstalavać štokvartalny pryrost na adzin pracentny punkt.
«Miarkujecca, što hetaja miera da 2030 hoda dazvolić dabicca źnižeńnia abjomu prodažu charčovych tavaraŭ zamiežnaj vytvorčaści ŭ abjomie prodažu arhanizacyj handlu na ŭnutranym rynku da 14%», — adznačajuć raspracoŭščyki.
Za nievykanańnie dolaŭ prodažu arhanizacyi rytejła prapanujuć štrafavać. Suma — da 500 bazavych vieličyń ci 14,5 tysiač rubloŭ na siońnia.
Jakija minusy? MARH čakaje rost cen i niezadavolenaści biełarusaŭ
U abhruntavańni prajekta ŭkaza raspracoŭščyki spasyłajucca na praktyku Rasii i Kazachstana, dzie taksama isnujuć minimalnyja doli prodažu ajčynnych tavaraŭ. Adnak takuju mieru dziaržavy — ŭdzielnicy JEAES mohuć traktavać jak abmiežavalnuju mieru, što supiarečyć zakanadaŭstvu ab JEAES.
Taksama raspracoŭščyki adznačajuć, što prapanova supiarečyć šerahu dvuchbakovych i šmatbakovych damoŭlenaściaŭ ab svabodnym handli i handlova-ekanamičnym supracoŭnictvie, a taksama pravu Suśvietnaj handlovaj arhanizacyi.
«Pryniaćcie nazvanych mier moža pryvieści da bolš žorstkaj pazicyi asnoŭnych partnioraŭ pa pieramovach (ZŠA, ES, Kanada i inš.) u miežach pracesu pa dałučeńni Biełarusi da SHA. Pieraličanyja dziaržavy zapatrabujuć ad Biełarusi admieny hetaj miery i niepryniaćcia padobnych mier u budučym», — adznačajecca ŭ abhruntavańni.
Što ž tyčycca spažyŭcoŭ, to MARH apasajecca sacyjalnaj napružanaści. Pa słovach raspracoŭščykaŭ zakona, časta ajčynnyja tavary daražejšyja za impartnyja. Takija, jak śviežaja harodnina rańniaj viasnoj, kandytarskija vyraby i hetak dalej. Što moža pryvieści da pavieličeńnia vydatkaŭ pakupnikoŭ i «jak vynik, rost niezadavolenaści hramadzian i sacyjalnaj napružanaści».
Jakija jašče prapanovy jość ŭ dakumiencie?
Akramia taho čynoŭniki prapanujuć abmiežavać da 5% pamiery bonusaŭ, jakija vytvorcy płaciać za toje, kab trapić na palicy handlovych sietak ci vykarystoŭvać ułasnyja handlovyja marki, karystacca pasłuhami prasoŭvańnia tavaraŭ u sietkach i hetak dalej.
U jakaści abhruntavańnia raspracoŭščyki raskazvajuć, što «ŭ Ministerstva antymanapolnaha rehulavańnia i handlu pastupali zvaroty kancerna «Biełdziaržcharčpram», Minsielhascharča, a taksama ajčynnych vytvorcaŭ ź infarmacyjaj pra toje, što jany vymušanyja płacić bonusy i premii bujnym handlovym sietkam, jakija vałodajuć značnaj rynkavaj uładaj».
Pamiery bonusaŭ vahajucca ad 2% da 20%. Raspracoŭščyki adznačajuć, što časta vypłata takich vysokich bonusaŭ ekanamična niemetazhodnaja i navat škodnaja dla vytvorcaŭ.
Pry hetym, u kramach spažyŭkaapieracyi čynoŭniki prapanoŭvajuć pakinuć raniejšyja pamiery bonusaŭ.
«Faktyčna kožny treci handlovy abjekt spažyvieckaj kaapieracyi stratny i źjaŭlajecca kamiercyjna nieefiektyŭnym sacyjalnym prajektam, ale praciahvaje pracavać u metach zabieśpiačeńnia kamfortnaha spažyvieckaha asiarodździa dla sielskich žycharoŭ», — udakładniajecca ŭ abhruntavańni da prajekta ukaza.
Raspracoŭščyki dadajuć, što bonusy ŭ arhanizacyj sielskaj miascovaści — heta krynica, jakaja «častkova kampiensuje vydatki handlovych arhanizacyj, źviazanyja z realizacyjaj pradukcyi, u pieršuju čarhu, na terytoryi sielskaj miascovaści».
