Foty z «Instahrama» dziaŭčyny

«Administracyja karektna paprasiła prybrać ružovyja vałasy»

19-hadovaja Palina vučycca ŭ kaledžy na apošnim kursie na nastaŭnicu anhlijskaj movy. U škole jana prachodzić praktyku — try razy na tydzień viadzie ŭroki ŭ staršakłaśnikaŭ.

«Pracavać z 11 kłasam było maim pažadańniem. Na minułych praktykach nam davali dziaciej z 5-7 kłasa, i mnie zachaciełasia vybrać štości składaniejšaje», — tłumačyć dziaŭčyna.

Anhlijskuju movu jana lubić ź dziacinstva.

«U mianie ciotka žyvie ŭ Anhlii, i ja maryła da jaje pierajechać. Advučycca, pastupić na «vyšku» na pierakładčyka — i ŭ Łondan. Ale ciapier vyšejšuju adukacyju nie płanuju atrymlivać, źmianilisia intaresy».

Jarki vobraz z ružovymi vałasami i skajsami (strazami) na zubach jana prymieryła dva miesiacy tamu.

«Ja natchniajusia Marhienšternam, i jon skazaŭ cikavuju reč: časam treba adklučać mozh i dumać sercam. U toj momant ja adklučyła mozh i padumała sercam: čaho ja nasamreč žadaju? Prosta nie chaču hublać čas i vybiraju kajfavać.

Reakcyja administracyi była dvajakaja. Jany karektna paprasili prybrać ružovyja vałasy, bo moj źniešni vyhlad nie adpaviadaje praviłam. Nastaŭniki abaročvalisia, hladzieli, čamu heta praktykanty chodziać z ružovymi vałasami, ale mnie asabista ničoha nie kazali.

Maje 11-kłaśniki pastavilisia stanoŭča. Ja dumała, jany nie buduć usprymać mianie ŭsurjoz, ale na majo ździŭleńnie ŭsio prajšło dobra. Ja hutaru ź imi jak piedahoh, ale na ich chvali. Jany mianie pavažajuć. Uzrovień ich viedaŭ nie vielmi vysoki, ale pry hetym jany zaŭsiody starajucca ździvić mianie. Kłasnyja dzieci!

A małodšyja školniki krychu nieadekvatna reahujuć, tykajuć palcam. U kalidorach kryčać: «Boža, heta što, instasamka?».

«Sa staršakłaśnikami damovilisia: kali vy pavažajecie mianie, ja budu pavažać vas»

Jak heta — vieści ŭroki ŭ svaich amal adnahodak? Palina kaža, što niajomkich situacyj z «padkatami nie było».

«Ja siabie pieršapačatkova pastaviła dastatkova stroha. My damovilisia: kali vy budziecie pavažać mianie, ja budu pavažać vas. I ŭsio — dzieci trymajuć dystancyju. Naohuł, starejšyja kłasy — heta samy traŭmavany ŭzrost. I ja b vielmi chacieła, kab mnie ŭ 11 kłasie dali takuju padtrymku, jak daju dzieciam ja. Usie kažuć, što škoła — siamja. Dyk čamu ŭsie pakalečanyja adtul vychodziać pastajanna?»

Vučni pra «Tyktok» nastaŭnicy viedajuć. Niekatoryja navat zdymajucca ź joj u rolikach.

Heta nie pieršy epatažny vobraz maładoha piedahoha. Uletku Palina chadziła ŭ ružovym paryku, ale nie spadabałasia: nie jaje. 

«Dreskod — heta svojeasablivaja dyscyplina dla dziaciej. Ale praź jaje, mahčyma, ja ciapier u takim vobrazie, bo ŭsio padletkavaje žyćcio mianie prymušali źbirać u pryčosku vałasy i adziavacca pa formie.

A kali ja adčuła svabodu, zrabiła ź siabie jarkaha čałavieka. Tamu ja taplu za toje, kab dzieci prajaŭlalisia ŭ škole — lepš pierafarbavacca va ŭsie kolery ŭ hetym uzroście, čym heta rabić u maim. 

U školnym uzroście ja była zaležnaja ad čužoha mierkavańnia, mnie było strašna pakazvać siabie. Chacieła być jak usie — prosta pryhožaj dziaŭčynkaj. Potym padrasła i zrazumieła, što naohuł nie treba dumać, što pra ciabie kažuć».

U volny čas dziaŭčyna cikavicca duchoŭnymi praktykami.

«Pracuju z padśviadomaściu. Joha, miedytacyi — maja tema. Jašče zajmajusia SMM, heta maja asnoŭnaja praca. Zarablaju tym, što prasoŭvaju profili ŭ sacsietkach».

«Chłopca ŭ mianie niama, jany ciapier nie nadta cikaviać»

U Palininym «Instahramie» jość pikantnyja fota. Asudžeńnia jana nie baicca — kaža, jaje i tak užo asudžajuć.

«Kali ŭ mianie krychu ŭźlacieŭ «Tyktok», usie maje siabry źnikli. Ja padtrymku atrymlivaju ad nieznajomych ludziej, jakija padpisanyja na mianie. A tyja, chto raniej byŭ pobač, prosta hladziać maje storyz. Moža, jany nie razumiejuć, što adbyvajecca, ale ŭ ciapierašni čas mnie vielmi patrebnaja padtrymka».

Chłopca ŭ Paliny niama, jany jaje ciapier nie nadta cikaviać. Jana žyvie z baćkami. Uśmichajecca, što starajecca ich asabliva nie paśviačać ŭ toje, čym zajmajecca, ale tyja ŭžo pryvykli da jaje vychadak.

Źviazvać žyćcio sa škołaj dziaŭčyna nie źbirajecca. Choča stać błohierkaj. Videa, dzie jana pryznajecca, što pracuje nastaŭnicaj, sabrała ŭ «Tyktoku» dva miljony prahladaŭ.

«Chaču być paŭsiul, jak Marhienštern. Kab pra mianie havaryli, chaču pravakavać, matyvavać ludziej. Mnie padabajecca vykazvać svajo mierkavańnie, upłyvać na inšych z dobraha boku. Błohinh — heta škoła žyćcia, bo ja vielmi adčuvalnaja. I toje, kolki ciapier vylivajecca na mianie chejtu, vielmi ciažka dla mianie».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?