Fota: sacyjalnyja sietki

Fota: sacyjalnyja sietki

Eduard Babaryka byŭ zatrymany razam z baćkam, kali nakiroŭvaŭsia ŭ CVK dla padačy sabranych podpisaŭ. Zatrymańnie pravodziŭ Departamient finansavych rasśledavańniaŭ Kamiteta dziaržkantrolu. Ceły dzień da zatrymanych nie puskali advakataŭ: u budynku DFR «pravodzilisia vučeńni». U hety ž dzień Eduard Babaryka byŭ źmieščany ŭ SIZA, śledstva viało KDB.

21 červienia 2020 hoda Eduardu Babaryku było pradjaŭlenaje abvinavačvańnie va ŭchileńni ad spłaty padatkaŭ u asabliva bujnym pamiery (č. 2 art. 243 KK — ad 3 da 7 hadoŭ źniavoleńnia zhodna papiaredniaj redakcyi kodeksa, jakaja dziejničała na toj momant).

12 kastryčnika 2021 hoda trom fihurantam spravy źmianili mieru ŭtrymańnia — jany vyjšli na svabodu. Havorka idzie pra kaleh i siabroŭ Viktara Babaryki: Śviatłanu Kuprejevu, Dźmitryja Karaku, Dźmitryja Žardzieckaha. Jany admaŭlajucca kamientavać abstaviny spravy i svajho vyzvaleńnia.

Pa hetaj ža spravie prachodziŭ i sam Viktar Babaryka, jaki pa pieršaj spravie ŭžo adbyvaje termin u kałonii. Pad vartaj zastajecca jaho syn Eduard, advakata jakoha niadaŭna pazbavili licenzii. Viadoma, što aktyŭnych śledčych dziejańniaŭ usie hetyja miesiacy nie pravodziłasia, bolšaść času viaźni byli prosta izalavanyja ad rodnych i hramadstva.

Eduarda Babaryku abvinavačvajuć u ciažkim złačynstvie. U takim vypadku, pa zakonie, utrymlivać pad vartaj mohuć da 18 miesiacaŭ (art. 127 KPK), hety termin chutka skončycca. Paśla spravu pavinny ci pieradać prakuroru dla nakiravańnia ŭ sud, ci źmianić mieru ŭtrymańnia Eduardu na tuju, jakaja nie budzie źviazanaja z abmiežavańniem svabody. 

Na pracesie pa pieršaj spravie Viktar Babaryka kazaŭ, što jaho syna pieraśledujuć praz toje, što baćka vyrašyŭ bałatavacca ŭ prezidenty. Pytańnie, ci pavinny dzieci adkazvać za dziejańni baćkoŭ, uzdymałasia na sustrečy Łukašenki z palitviaźniami ŭ SIZA KDB. Pa słovach vidavočcaŭ, Siarhiej Cichanoŭski zajaviŭ Łukašenku, što jaho dzieci buduć raspłačvacca za ŭčynki baćki.

Łukašenka ŭ adkaz zapiarečyŭ, što syn za baćku nie adkazvaje. Usie prysutnyja pahladzieli ŭ bok Eduarda Babaryki, pačuŭsia śmiech. 

Клас
0
Панылы сорам
0
Ха-ха
0
Ого
0
Сумна
0
Абуральна
0