Ihar Lubavicki

Pad sankcyi trapiŭ adzin z samych maładych sudździaŭ Viarchoŭnaha suda Ihar Lubavicki. Raniej byŭ vajskovym sudździom, pracavaŭ u Barysavie, a kali vajskovyja sudy rasfarmavali, pierajšoŭ u Minski haradski sud, heta adbyłosia ŭ 2014 hodzie. Pryznačeńnie ŭ Viarchoŭny sud atrymaŭ u 2020-m, užo paśla vybaraŭ. Jon syn byłoha vajskovaha prakurora Biełarusi Viačasłava Lubavickaha.

Najbolš viadomym Lubavicki staŭ paśla «spravy Biełhazprambanka», eks-bankiru Viktaru Babaryku jon prysudziŭ 14 hod kałonii. Toj praces adrazu ž pačaŭsia z kurjozu.

Sprava ŭ tym, što žonka sudździ, Alaksandra Lubavickaja, była partnioram u advakackim biuro, jakoje abaraniała adnaho ź fihurantaŭ spravy.

Hrošy, jakija abvinavačany płaciŭ za jurydyčnyja pasłuhi, išli na rachunak biuro i raźmiarkoŭvalisia, u tym liku, pamiž partniorami.

Navidavoku — kanflikt intaresaŭ: sudździa atrymlivaje hrošy ź biudžetu za toje, što razhladaje kryminalnuju spravu, a jahonaja žonka pa hetaj ža spravie mahła atrymlivać hrošy jak partnior biuro ad adnaho ź fihurantaŭ. Advakaty Babaryki zajavili pra heta na pačatku sudovaha pracesu, adnak sudździa Lubavicki nikudy nie syšoŭ.

Byli i inšyja kurjozy ŭ jaho karjery. U 2019 hodzie sudździ daručyli razhladać «makavuju spravu» ab niezakonnaj sietcy raspaŭsiudžvańnia narkotykaŭ.

Praces išoŭ pa standartnaj schiemie, jak niečana vyśvietliłasia, što Lubavicki nie maje prava razhladać spravu. Adzin z abvinavačanych zajaviŭ, što raniej užo byŭ asudžany za niezakonny abarot narkotykaŭ (č. 3 art. 328 KK).

Prakuratura sprabavała abskardzić prysud, nastojvajučy na ​​č. 4 art. 328 KK (raspaŭsiudžvańnie narkotykaŭ u składzie arhanizavanaj hrupy), ale Minharsud dziaržabvinavačvańniu admoviŭ.

U składzie sudovaj kalehii tady byŭ sudździa Ihar Lubavicki, toj samy, jakoha paźniej pryznačyli razhladać «makavuju spravu».

Vyśvietliłasia, što niekatoryja abstaviny spravy jamu byli viadomyja jašče da pačatku pracesu. Jak jon rychtavaŭsia da novaj sudovaj spravy, što nie zaŭvažyŭ, što ŭžo sudziŭ adnaho ź fihurantaŭ, zastajecca niezrazumiełym. Ale ŭ vyniku ŭziaŭ samaadvod. 

U 2016 hodzie Ihar Lubavicki sudziŭ pa pieršaj kryminalnaj spravie błohiera Eduarda Palčysa, jakoha pryznaŭ vinavatym u raspalvańni varožaści, raspaŭsiudžvańni parnahrafičnych materyjałaŭ. Tady dzieviać artykułaŭ ź jaho błoha byli pryznanyja ekstremisckimi. Sud prachodziŭ u zakrytym režymie. Eduard atrymaŭ hod i dzieviać miesiacaŭ «chatniaj chimii» i vyjšaŭ na svabodu ŭ zale suda. 

U 2018 hodzie za raspalvańnie varožaści na nacyjanalnaj hlebie Lubavicki sudziŭ troch aŭtaraŭ rasijskaha sajta REGNUM. Prysud — piać hadoŭ pazbaŭleńnia svabody z adterminoŭkaj na try hady, to-bok taksama vyjšli na svabodu paśla ahałošvańnia rašeńnia. U abvinavačvańni adznačałasia, što ŭ tekstach fihurantaŭ «demanstrujecca pahardlivaje staŭleńnie da biełaruskaj historyi i movy», a ŭ zaklučeńni psichołaha-linhvistyčnaj ekśpiertyzy publikacyj adznačajecca, što «aŭtary cynična abaznačajuć bieł-čyrvona-bieły ściah, jak kałabaracyjaniscki». 

Taksama Lubavicki viadomy pracesami pa karupcyjnych spravach. Naprykład, pa «spravie miedykaŭ» sudziŭ biznesmena Siarhieja Šakucina, heta rodny brat nabližanaha da Łukašenki biznesmena Alaksandra Šakucina, jaki darečy, taksama trapiŭ pad zachodnija sankcyi. 

Siarhiej Hirhiel

Taksama ŭ sankcyjny śpis trapiŭ supracoŭnik Hienieralnaj prakuratury Siarhiej Hirhiel, jaki byŭ abvinavaŭcam pa «spravie Biełhazprambanka».

Viadomy pracesami pa asabliva ciažkich złačynstvach. Naprykład, karupcyjnaja sprava suprać byłoha namieśnika sakratara Rady biaśpieki Andreja Uciuryna (atrymaŭ 12 hadoŭ kałonii), akademika Alaksandra Bialeckaha pa «spravie miedykaŭ» (atrymaŭ 7,5 hadoŭ kałonii, ale sioleta daterminova vyjšaŭ na svabodu).

Jon ža byŭ dziaržabvinavaŭcam pa spravie Uładzisłava Kazakieviča, asudžanaha za napad ź bienzapiłoj na naviedvalnikaŭ handlovaha centra «Novaja Jeŭropa». Hirhiel vystupaŭ pa jaho druhoj spravie — ab napadzie na kantralora škłoŭskaj kałonii (prysud — 22 hady pazbaŭleńnia svabody).

Taksama prakuror byŭ dziaržabvinavaŭcam pa spravie ab zabojstvie niemaŭlaci — maci zachoŭvała trup u maraziłcy. Prysud — 19 hadoŭ kałonii.

Admietnym pracesam, na jakim pracavaŭ prakuror Hirhiel, była karupcyjnaja sprava suprać byłoha supracoŭnika Śledčaha kamiteta Andreja Kačury, jaki za hrošy abiacaŭ znajomamu stanoŭča vyrašyć pytańnie ź jaho kryminalnym pieraśledam.

Hirhiel uvieś čas prasiŭ zrabić praces zakrytym, adnak sudździa Alaksandr Voŭk tolki častkova zakryŭ praces, tak što niekatoryja detali hramadskaści ŭsio ž stali viadomyja.

Tak, Kačura pierakanaŭ znajomaha biznesoŭca dać chabar u 25 tysiač dołaraŭ, kab paźbiehnuć pakarańnia. A ŭ vyniku taho nie vyzvalili, a adpravili na «chimiju». Kačuru sudzili za padbuchtorvańnie da dačy chabaru, dahetul niezrazumieła, a chto ž atrymaŭ hrošy ŭ vyniku i jakoje panios za heta pakarańnie. Śledčy kamitet uparta admaŭlaŭsia kamientavać abstaviny spravy. 

Valancina Kulik

ES prymianiŭ sankcyi nie tolki da sudździaŭ, jakija zajmajucca kryminalnymi i administracyjnymi spravami, jość u śpisie i sudździ z kalehij pa hramadzianskich spravach.

Naprykład, sudździa Viarchoŭnaha suda Valancina Kulik, jakaja adchiliła skarhu Viktara Babaryki, jaki byŭ niazhodny z rašeńniem Centrvybarkama, jaki admoviŭ jamu ŭ rehistracyi kandydatam u prezidenty.

Palityka była daŭno ŭ žyćci sudździ Kulik. U 2003 hodzie jana razhladała spravu ab likvidacyi pravaabarončaha centra «Viasna» (Kamitet pa pravach čałavieka AAN pryznaŭ hetaje rašeńnie niezakonnym).

U 2005 hodzie jana paličyła zakonnym papiaredžańnie Miniusta ŭ adras Niezaležnaha instytuta sacyjalna-ekanamičnych i palityčnych daśledavańniaŭ. U 2008-m vyrašyła, što Miniust zakonna admoviŭ «Ruchu «Za Svabodu» ŭ rehistracyi.

U 2010-m zajaviła, što Miniust mieŭ racyju, što admoviŭ prychilnikam BCHD u rehistracyi partyi. U 2012-m admoviła ŭ zadavalnieńni skarhi palityka Alaksandra Milinkieviča, jakoha nie chacieli rehistravać kandydadam u deputaty. Jašče ŭ 2013-m Valancina Kulik za plonnuju pracu atrymała orden ad Łukašenki.

Siarhiej Jepichaŭ

U sankcyjny śpis trapiŭ i staražył Minskaha abłasnoha suda, sudździa Siarhiej Jepichaŭ, jaki na zakrytym pracesie razhladaŭ spravu suprać Maryi Kaleśnikavaj i Maksima Znaka.

Pieršyja palityčnyja pracesy ŭ jaho karjery byli jašče ŭ 2008-m, ale tady jašče administracyjnyja.

Taksama Jepichaŭ viadomy ŭdziełam u hučnym pracesie ab zabojstvie nastaŭnicy i vučnia ŭ Stoŭbcach — asudžany padletak atrymaŭ 13 hadoŭ kałonii.

U 2018 hodzie Siarhiej Jepichaŭ razhladaŭ spravu ab dziedaŭščynie ŭ vajskovaj častcy ŭ Piečach, dzie pamior Alaksandr Koržyč. Kamandzir roty Pavieł Sukavienka atrymaŭ 6 hadoŭ kałonii, staršyna Artur Virbał — 4 hady. 

U 2021-m sudździa adznačyŭsia śmiarotnym prysudam — na rasstreł byŭ asudžany žychar Słuckaha rajona, jaki ź siabrami žorstka zabiŭ niekalki piensijanieraŭ. Cikava, što vyklučnuju mieru pakarańnia jamu pryznačali dvojčy. Pieršy prysud Minskaha abłasnoha suda ŭ Viarchoŭnym sudzie adchilili, nakiravali spravu na razhlad paŭtorna, ale i druhi raz pryhavor byŭ toj ža. 

Siarhiej Jepichaŭ byŭ i hałoŭnym na pracesie administrataraŭ i ŭdzielnikaŭ telehram-kanała «Armija z narodam», ich abvinavačvali ŭ arhanizacyi masavych biesparadkaŭ, fihuranty, siarod jakich była siamiejnaja para, atrymali ad 4,5 da 6 hadoŭ źniavoleńnia. 

Hanna Sakałoŭskaja

Pad sankcyi trapiła zasłužany juryst Biełarusi, sudździa Viarchoŭnaha suda Hanna Sakałoŭskaja. U 2017 hodzie jana była łaureatkaj najvyšešaj jurydyčnaj premii ŭ Biełarusi ŭ naminacyi «Pravasudździe».

Sioleta Sakałoŭskaja pryznała zakonnymi dziejańni Miniusta pa likvidacyi najstarejšaj pravabarončaj arhanizacyi — Biełaruskaha Chielsinkskaha kamiteta. Raniej udzielničała ŭ pracesach, nakiravanych na prypynieńnie dziejnaści Partyi BNF, Partyi kamunistaŭ biełaruskaj.

Dźmitryj Karsiuk

U sankcyjnym śpisie značycca adzin z rekardsmienaŭ pa spravach, źviazanych z palityčnaj pazicyjaj. Havorka pra Dźmitryja Karsiuka, jaki ŭ kastryčniku 2020 hoda staŭ sudździom u sudzie Centralnaha rajona, da hetaha pracavaŭ u prakuratury.

Na rachunku Karsiuka štrafaŭ na sumu bolš za 50 tysiač rubloŭ i pad 2,5 tysiačy «sutak» (majem na uvazie spravy, źviazanyja z vykazvańniem palityčnaj pazicyi).

Što da kryminalnych spravaŭ z palityčnym składnikam, to i tut Dźmitryj Karsiuk idzie na rekord — jak minimum 20 čałaviek atrymali ad jaho prysudy. 

***

Pa padlikach pravaabaroncaŭ, za apošnija dva hady bolš za 40 tysiač biełarusaŭ prajšli praz palityčna matyvavanyja rašeńni sudoŭ pa administratyŭnych spravach, pa kryminalnych spravach palitviaźniami pryznali 888 čałaviek (na 2 śniežnia pravaabaroncy viedajuć nie pra ŭsie kiejsy, tamu realnaja ličba moža być vyšejšaj).

Kolkaść apieratyŭnikaŭ, śledčych, ekśpiertaŭ, prakuroraŭ i sudździaŭ pa hetych spravach idzie na tysiačy. Faktyčna ŭ sudach nie zastałosia sudździaŭ, jakija pracujuć pa administracyjnych i kryminalnych spravach i jakija b nie mieli dačynieńnia da spravaŭ, źviazanych z vykazvańniem palityčnaj pazicyi.

Jeŭrasajuz nie tłumačyć, pa jakoj pryčynie ŭ sankcyjny śpis uklučanyja mienavita peŭnyja siłaviki i sudździ. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?