«Administracyja Mazyrskaj balnicy zvolnić z novaha hoda 23 supracoŭnika. Havorka idzie nie tolki pra miedrabotnikaŭ, ale miedykaŭ taksama zvolnili.
Stała taksama viadoma, što raniej u Mazyry vykonvalisia niekatoryja apieracyi ankałahičnaha profilu, ciapier — nie vykonvajucca, bo rabić hetyja apieracyi niama kamu. Pacyjentaŭ prychodzicca nakiroŭvać u Homiel, dzie vialikija čerhi na lačeńnie, choć raniej mahli apieryravać na miescy», — takoje paviedamleńnie hulaje pa roznych telehram-kanałach.
«Naša Niva» źviazałasia ź miascovymi miedykami, kab pravieryć infarmacyju. I pakul, vyhladaje, situacyja nie nastolki krytyčnaja, jak apisvajecca ŭ paviedamleńni.
«Tak, šerahi čyściać. U balnicy dakładna zvolnili niekalkich maładych uračoŭ. Ale pakul što ankaapieracyi ŭ Mazyry pravodziać, i jak minimum niekatorych daktaroŭ, jakich, skažam tak, raniej presavali za «palityku», dahetul nie čapali, — raskazaŭ nam adzin z ŭračoŭ. — Bolš za toje, u Mazyry jość ankadyspansier. Dziŭna, što havorka ŭ paviedamleńni idzie pra ankaapieracyi tolki ŭ balnicy».
Jość i inšaja infarmacyja, jakuju «Našaj Nivie» paćvierdzili krynicy z terytaryjalnaha miedycynskaha abjadnańnia horada. Faktyčna heta miascovaja miedadministracyja.
«Śpis tak zvanych niadobranadziejnych daktaroŭ sapraŭdy isnuje. Ale pakul vielmi rašučych dziejańniaŭ pa im nie było, bo rabić ankaapieracyi ŭ horadzie sapraŭdy mohuć tolki ličanyja śpiecyjalisty. I tyja pracujuć u niekalki źmien. Ich i ciapier nie chapaje. Zvolniš kahości — im budzie jašče ciažej. Kali tak pojdzie i dalej, historyja pra toje, što ŭ Mazyry sapraŭdy nie zastałosia ankaśpiecyjalistaŭ, moža spraŭdzicca», — raskazali našy krynicy.
«Śpisy spuskaje KDB». Čytačy z usioj krainy paviedamlajuć pra novyja «palityčnyja» zvalnieńni
