Ab svaim žyćci, mary, pracy, udziele ŭ konkursach pryhažości i pieramozie ŭ apošnim dla madelaŭ, Anžalika raspaviała błohu «Otražienije».

​U madelny biznes Anžalika Kuźmianok pryjšła ŭ 14 hadoŭ — spačatku ŭ rodnym horadzie, a potym zaklučyła kantrakt z profilnym ahienctvam u Maskvie. Z tych časoŭ dziaŭčyna pracavała madellu, abjeździła bolš za 30 krain śvietu i razmaŭlaje na siami movach.

— Maja samaja vialikaja mara była — pieramahčy ŭ konkursie pryhažości. Pieršuju sprobu ja raspačała ŭ 16 hadoŭ. Heta byŭ miascovy konkurs pryhažości ŭ Mahilovie, na jakim mnie zajavili, što šancaŭ pieramahčy ŭ mianie niama, maŭlaŭ, źniešnaść nie padychodzić — uspaminaje Anžalika pačatak svajoj karjery.

Potym było jašče šmat konkursaŭ, mižnarodnych i nacyjanalnych: dziaŭčynu zaŭvažali, ale pieramožcaj ź ich jana nie vychodziła.

Madelinh Anžalika sumiaščała z vučobaj u Akademii kiravańnia pry prezidencie, dzie atrymlivała prafiesiju jurysta. VNU jana skončyła, ale pa śpiecyjalnaści pracavać nie stała — kodeksam i narmatyvam addała pieravahu zdymkam i defile.

U 2019 hodzie na adnym z modnych pakazaŭ u Kitai da Anžaliki padyšła arhanizatar Mižnarodnaha konkursu Miss Model of the World i prapanavała pradstaŭlać na mierapryjemstvie Biełaruś. Na žal, z-za kavidnych abmiežavańniaŭ, skarystacca prapanovaj mahilaŭčanka zmahła tolki ŭ 2022-m.

— Hety konkurs vyklučna dla madelaŭ, zvyčajnaja dziaŭčynka, u jakoj niama partfolia, nie zmoža tudy patrapić. Pryčym, pryhažość — heta nie hałoŭny pakazčyk, pa jakim aceńvajuć udzielnic. Važna toje, što ty ź siabie pradstaŭlaješ jak madel: jak defiliruješ, źmianiaješ pazicyju i mnohaje inšaje — patłumačyła Anžalika.

Dla konkursu biełaruscy pryjšłosia schudnieć na try kiłahramy, i na finał u Dubai, jaki prachodziŭ z 3 pa 12 studzienia, jana pryjechała z paramietrami 88-59-90, pry roście 180 sm i vazie 58 kh. Razam ź joj za karonu pieramožcy spaborničali jašče 24 udzielnicy z roznych krain.

— Składana było toje, što dzień byŭ vielmi zapoŭnieny: rańni padjom, uvieś dzień repietycyi, zdymki, intervju. Pry hetym karmili nas takimi dyjetyčnymi stravami, što vielmi chaciełasia jeści. Udzielnica ź Italii, ź jakoj ja kantaktavała, navat płakała, što choča narešcie źjeści picu abo pastu. A jašče nas vielmi bierahli ad kavidu: usiudy ŭ maskach, kožny dzień zdavali testy.

Zatoje Anžalicy było kamfortna tamu, što udzielnicam treba było demanstravać svaje ŭmieńni jak madelaŭ, a naša ziamlačka ŭ hetym była jak ryba ŭ vadzie — bo za plačyma vosiem hadoŭ u madelnym biznesie.

— Makijaž i ŭkładku ja rabiła sama, a jašče inšym dziaŭčynkam dapamahała. Viačerni stroj u mianie byŭ dziakujučy sponsaram z Turcyi, a nacyjanalny, u vasilki, ja rabiła razam z mamaj. A voś vychadu ŭ kupalnikach nie było — usio ž arabskaja kraina. U biełaruskich dziaržviedamstvach nie viedali, što ja budu prymać udzieł u konkursie — ja sama nie paviedamlała, dapamohi nie prasiła.

Na konkursie Anžalika pasiabravała z ruskamoŭnymi dziaŭčatami — z Estonii, Hrecyi, Rasii. Biełaruska kaža, što ź imi było ŭtulna i ciopła, nie adčuvałasia fanaberystaści i supiernictva za karonu, jak heta było z udzielnicami z Amieryki, niekatorych krain Jeŭropy.

- Pradstaŭniki ź Biełarusi i raniej brali ŭdzieł u konkursie, ale ŭ piaciorku nie ŭvachodzili. I tut na apošnim etapie ja ŭśviedamlaju, što ja ŭ top-5. Dumała tady, nu nie daduć ža mnie pieršaje miesca. Ale mianie abviaścili pieramožcaj!

Anžalika ŭspaminaje, što pačuŭšy heta, u jaje zadryžali ruki, a paśla jana nie zmahła strymać ślozy — spraŭdziłasia jaje dziciačaja mara. Pra pieramohu jana adrazu paviedamiła svajmu chłopcu i mamie. U jakaści ŭznaharody padaryli karonu, skipietr i hrašovuju premiju. Taksama joj paabiacali dać mahčymaść zaklučyć kantrakt na pracu madeli ź jakim-niebudź brendam.

— Niekatoryja ŭmovy mnie taksama treba vykonvać: hod nielha vychodzić zamuž i abzavodzicca dziećmi. Zaraz usie kankursantki ŭžo źjechali, a zastajusia ŭ Dubai — praciahvaju davać intervju pa niekalki razoŭ na dzień.

Kali płany nie źmieniacca, to ŭ najbližejšy čas Anžalika źjedzie ŭ Italiju — tam ciapier jana žyvie i navat adkryła škołu madelaŭ. Dziaŭčyna kaža, što ŭ prafiesijnym płanie, jak madel, jana ŭžo adbyłasia, tamu «možna vychodzić na piensiju».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?