Na hetyja pytańni adkazvaje doktar-dyjetołah i endakrynołah Viktoryja Bołbat.
«Naša Niva»: Jak dyjetołahi staviacca da mody na bodzipazityŭ?
Viktoryja Bołbat: Ja b na hetu źjavu hladzieła nie tolki z punktu hledžańnia dyjetałohii, ale ŭ bolšaj stupieni z punktu hledžańnia psichałohii. Bo prablema lišniaj vahi vychodzić daloka za miežy dyscypliny i siły voli.
Tam našmat bolš psichasamatyki, čym my pryvykli dumać. U niezaležnaści ad taho, što było piarvična — nabor vahi z pryčyny pierajadańnia ci praz endakrynnuju patałohiju.
Chacia endakrynnaja patałohija, jakaja stymuluje vialiki nabor vahi, vielmi redkaja, zvyčajna heta plus 5-7 kiłahramaŭ na fonie pavieličeńnia aciočnaści i rezkaha zapavolvańnia abmienu rečyvaŭ. Jość, kaniečnie, sindrom Kušynha — pry im ludzi sapraŭdy pačynajuć raści jak na draždžach.
Viktoryja Bołbat. Fota: asabisty archiŭ
Papularnaja dyjetałohija časta tranśluje, što cieła musić być idealnym i ŭsio heta byccam dla zdaroŭja.
Ale ja da bodzipazityvu staŭlusia z vydycham. Bo ŭ hramadstvie źjaviŭsia kirunak, jaki daje šanc ludziam ź vializnaj prablemaj u ich žyćci ŭziać pieradyšku.
Źnižeńnie vahi — heta dzika ciažkaja prablema. Heta doŭhaterminovy prajekt. Tamu što ŭ fokusie, aproč pracy, dziaciej, doma, pastajanna musić znachodzicca kłopat pra siabie. Tolki kali my padychodzim da źnižeńnia vahi praz kłopat pra siabie, heta moža dać płady.
Ludzi, jakija nikoli z hetym nie sutykalisia, nie ŭjaŭlajuć, što takoje vialikaja lišniaja vaha. Ja kaliści važyła 94 kiłahramy (a ciapier 65). Toje, što ja napracoŭvała hadami, zajmajučysia miedycynaj, psichaterapijaj, moža dać ideja bodzipazityvu.
Jana daje čałavieku dazvoł nie paraŭnoŭvać siabie ź inšymi, a spynicca i zrazumieć, što mienavita jamu ciapier važna — nie hramadstvu. Tak, poŭnyja ludzi ŭsio adno sutyknucca z adrynańniem, ale zdorava, kali jany sami siabie nie buduć adrynać. Ideja bodzipazityvu pra toje, kab zastavacca siabram sabie, što b zvonku ni adbyvałasia.
Rekłama na opiernym teatry ŭ Paryžy. Fota: mobile-business.by
«NN»: Siarod pretenzij da takoj rekłamy — što jana ramantyzuje zališniuju vahu i chvaroby. Ci tak heta?
VB: Mnie zdajecca, heta mocna pryciahnuta za vušy. Ludziam ź vialikaj vahoj naohuł nie da ramantyki. Heta ciažkaja patałohija, jakaja skaračaje žyćcio na 10-20 hod. Heta ŭ vyniku kardyjałahičnyja pacyjenty. Niekatoryja sami siabie nienavidziać.
Ja tam była. U mianie było atłuścieńnie pieršaj stupieni, a jość ža našmat bolš — pacyjenty prychodziać sa 130, 150 kiłahramami. Tam vielmi šmat pracy, kab źnizić vahu, i ŭ niekatorych prosta ruki apuskajucca: a ci dažyvu ja da vyniku?
Cierpiać asabistyja adnosiny. Chtości pakutuje ad adzinoty, chtości vinavacić siabie ŭ prablemach u pary: maŭlaŭ, ja nie padabajusia partnioru z-za vahi. Choć prablemy chutčej našmat hłybiej, jany nie pra cieła. Cieła, jakoje pavialičvajecca, moža być simptomam unutranaha ci siamiejnaha niaščaścia.
Toje, što robić Victoria's Secret i inšyja brendy dla padtrymańnia roznaha vobrazu cieła, — heta jakraz pra toje, kab dazvolić sabie być roznym. Zadumacca, čaho ja chaču ad hetaha žyćcia. Bo kali ja čahości chaču, mnie raptoŭna i žyć chočacca. Pracavać nad vahoj nie dla taho, kab hramadstva mianie padtrymała, a dla siabie.
Časta ludzi ź lišniaj vahoj — heta pracaholiki, ludzi vielmi adkaznyja, jakija ciahnuć na sabie ŭsiu siamju. I adzinaje, na što jany mohuć apiercisia, — heta ich cieła
Darečy, zdaroŭje nie zaŭsiody roŭnaje idealnaj vazie. Isnuje mietabalična zdarovaje atłuścieńnie.
My nie možam kazać, nakolki jano doŭha moža nie zakranać unutranyja pracesy, ale takoje jość. Da mianie prychodziła pacyjentka ŭ 60 hod z atłuścieńniem druhoj stupieni — ale ŭ jaje idealnyja chalesteryn i cukar, dobry arteryjalny cisk. Jana try razy na tydzień chodzić u basiejn, nakolki moža sočyć za charčavańniem.
«NN»: Mnie zdajecca, kudy bolš škodnaja rekłamy koły i fastfudu.
VB: Sapraŭdy! Kali ŭsie tak kłapociacca pra čužoje zdaroŭje, to davajcie da minimumu źviadziem rekłamu koły, uviadziem niejkija padatki dla vytvorcaŭ sałodkaha.
Sałodkija napoi zabivajuć naš mietabalizm. Suśvietnaja arhanizacyja achovy zdaroŭja rekamienduje źnizić užyvańnie dabaŭlenych cukraŭ da 10% sutkavaj kałaryjnaści. Dla siaredniestatystyčnaha čałavieka heta kala 50 hramaŭ čystaha cukru.
Heta cełaja šakaładka i kubak sałodkaj harbaty. Heta šmat. A ŭ paŭlitry koły ŭtrymlivajecca 53 hramy cukru. U maleńkaj butelcy, ujaŭlajecie? Hetyja rečy bolš škodnyja dla zdaroŭja, čym rekłama bializny dla žančyn plus-sajz.
Rekłama «Miłavicy»
60 pracentaŭ biełarusaŭ majuć lišniuju vahu. I kali my rekłamujem majtki na zhrabnych dziaŭčatach, to 60 pracentaŭ žančyn zastajecca ŭ baku. A jany taksama nosiać bializnu i chočuć być pryhožymi i seksualnymi. Jość mužčyny, jakim padabajucca pyšnyja žančyny, jakich heta zavodzić.
Čałaviek moža vybirać atłuścieńnie, ale važna razumieć, što razam z hetym jon vybiraje mahčyma rańniaje raźvićcio chraničnych zachvorvańniaŭ i sardečna-sasudzistych katastrof, źmianšaje praciahłaść žyćcia.
Kali ŭ nas niama času na svajo zdaroŭje, značyć, jano čamuści ŭ płanie pryjarytetnaści syšło na apošniuju prystupku.
Kali ŭ čałavieka roŭny emacyjny stan, jon ščaślivy, to jamu lahčej budzie davacca pachudzieńnie. Kali jon pastajanna ŭ tryvozie, u pracy, nie moža rassłabicca, źnižajučy vahu, my tolki jašče bolš raskačajem tryvožnyja areli, što vyljecca ŭ zajadańnie.
«NN»: Jaki pamier dla žančyny ok?
VB: Tut ja budu zaŭziataj bodzipazityŭščycaj i skažu, što luby pamier dla žančyny — heta ok. U kanadskich pratakołach pa lačeńni atłuścieńnia jość važnaja paznaka: staŭciesia da ludziej z atłuścieńniem, jak da ankałahičnych pacyjentaŭ, z tym ža spačuvańniem.
Tut taksama moža pačacca chalivar, ale ŭ ludziej ź vialikaj lišniaj vahoj jakaść žyćcia taksama drennaja, i biaśsilla časta tam stolki ž, kolki i ŭ ankałahičnych pacyjentaŭ.
Važna, kab čałaviek, jaki ŭsio adno vyrašaje zastacca ŭ svajoj vazie, viedaŭ asnoŭnyja pryncypy charčavańnia, a nie dyjetałahičnyja mify pra toje, što nielha jeści sałodkaje i treba charčavacca tolki kurynymi hrudkami.
Rekłama «Miłavicy»
Ja prykładna 10 hod žyćcia patraciła na dyjety. I čym aktyŭniej ja starałasia chudzieć, tym bolš rasła vaha.
U niejki momant, pamiataju, viartajusia z pracy na chutkaj i dumaju: «Jak ža ja stamiłasia ad hetaj baraćby. Moža, ja prosta takaja? Ja bolš nie hatova tracić resursy na baraćbu z vahoj». I jak ni dziŭna, mienavita paśla hetaha maja vaha pačała sychodzić. Ja tady ž sabie kupiła palito 54 pamieru, i adnasiła jaho tolki adzin siezon, bo, adpuściŭšy situacyju, pastupova stała chudzieć.
«NN»: Kali da pytańnia zdaroŭja viarnucca — što ŭ svaim ciele žančynu pavinna naściarožyć?
VB: Jość prosty paramietr. Kali žančyna voźmie miernuju stužku, pamieraje abjom talii i atrymaje bolš za 84 sm (u mužčyn bolš za 90), to heta moža kazać pra najaŭnaść abdaminalnaha atłuścieńnia. To-bok tłušč źbirajecca ŭ vobłaści žyvata i ŭnutranych orhanaŭ. Mienavita jon samy mietabalična niebiaśpiečny — jon stymuluje insulinarezistentnaść, a jana ŭ vyniku pravakuje adkładańnie chalesterynavych blašak, parušeńnie arteryjalnaha cisku.
U analizach my chutčej za ŭsio ŭbačym vysokija chalesteryn i hlukozu. Cisk budzie časta pavyšacca. Na UHD možam pabačyć atłuścieńnie piečani — heta taksama prykmieta mietabaličnaha sindromu.
«NN»: A što horš — anareksija ci atłuścieńnie?
VB: I toj, i druhi stan pa sutnaści śmiarotny. Roźnica ŭ tym, što ad anareksii časta hinuć u maładym uzroście. Pry atłuścieńni čałaviek pražyvie daŭžej.
Ja nie kažu ŭžo pra toje, što anareksija — heta ciažki psichijatryčny dyjahnaz parušeńnia ŭnutranaj rehulacyi. Ad anareksii hinuć čaściej, čym ad inšych psichijatryčnych zachvorvańniaŭ razam uziatych, uklučajučy suicydalnuju depresiju.
Z atłuścieńniem našmat praściej pracavać.
Čytajcie taksama: Zasnavalnik «Anłajniera» Šuraŭka napisaŭ tvit pra bodzipazityŭnuju rekłamu žanočaj bializny. I tut pačałosia…
