Namieśnik premjer-ministra Łatvii Arcis Pabryks, jaki adnačasova zajmaje pasadu ministra abarony krainy, rezka raskrytykavaŭ pazicyju Bierlina ŭ kanflikcie vakoł Ukrainy.
«Ciapierašniaja palityka Hiermanii ŭ dačynieńni da Rasii ni ŭ jakoj stupieni nie adpaviadaje patrabavańniam NATA, ES i partnioraŭ FRH. Jaje niedastatkova i dla siońniašnich praciŭnikaŭ Zachadu, a da ich adnosicca i Rasija. Karaciej kažučy, palityka Hiermanii ŭ dačynieńni da Rasii nie ŭpisvajecca ŭ naš čas»,
— zajaviŭ Pabryks u intervju niamieckaj haziecie Bild.
Pabryks padkreśliŭ, što ličyć vialikaj pamyłkaj pazicyju pradstaŭnikoŭ Sacyjał-demakratyčnaj partyi Hiermanii, kab «pieradać Ukrainie palavy špital, ale nie ŭzbrajeńnie».
«Niamieckija palityki pierastali razumieć, što značyć palityka strymlivańnia», — skazaŭ ministr abarony Łatvii.
«Ja pavinien skazać, što błakada pastaŭki estonskich haŭbic va Ukrainu ŭsprymajecca jak haniebnaja pazicyja va ŭsich troch krainach Bałtyi, a taksama va ŭsich dziaržavach Paŭnočnaj Jeŭropy. My ličym, što kožnaja kraina maje prava na samaabaronu. Kali vy zabaraniajecie kamu-niebudź atrymlivać srodki abarony, vy nie padtrymlivajecie mir, a jakraz naadvarot»,
— dadaŭ łatvijski palityk.
Hiermanija 20 studzienia atrymała zapyt Estonii adnosna dačy zhody na pastaŭki va Ukrainu 122-milimietrovych haŭbic. Zhoda Bierlina na pastaŭku haŭbic savieckaj vytvorčaści patrabavałasia tamu, što ŭ svoj čas jany znachodzilisia na ŭzbrajeńni ŭ HDR, a potym byli pieradadzienyja Finlandyi, adkul i patrapili ŭ Estoniju. Na nastupny dzień amierykanskaja hazieta The Wall Street Journal sa spasyłkaj na krynicy va ŭradavych kołach Hiermanii i Estonii paviedamiła, što FRH adkazała na zapyt admovaj.
Sama Hiermanija raniej zajaviła, što nie budzie pastaŭlać Ukrainie ŭzbrajeńnie. «Śmiertanosnaja zbroja nie budzie pastaŭlacca», — zajaviŭ u hetaj suviazi pradstaŭnik urada FRH Štefan Chiebieštrajt. Admova Bierlina tyčycca i abarončaha ŭzbrajeńnia, kali jaho možna ŭžyvać jak śmiertanosnaje.
Čytajcie taksama:
Niemcy nie buduć dapamahać ukraincam zbrojaj. Dapamohuć tolki lačyć paranienych
Kancler Hiermanii Šolc: Rasija pavinna pryznać, što siła ŭ praŭdzie
Niamiecki palityk: «Miakkaja reakcyja budzie ŭspryniataja Pucinym jak słabaść»
