Dniom u aŭtorak niezvyčajnuju źjavu zaŭvažyli ŭ mikrarajonie Uručča. Kala raźviazki praśpiekt Niezaležnaści — vulica Rusijanava iskrylisia tralejbusnyja pravady. Paźniej «Minsktrans» paćvierdziŭ, što z-za adklučeńnia napružańnia spyniŭsia ruch tralejbusaŭ pa čatyroch maršrutach.
Adnym vypadkam sprava nie abmiažavałasia. Praź niekalki hadzinaŭ iskreńnie taksama adbyvałasia na praśpiekcie Dziaržynskaha, kala mieduniviersiteta. U internecie ŭžo paśpieli źjavicca memy z nahody reakcyi pasažyraŭ, jakich, zdavałasia, ničoha nie źbiantežyła — jany praciahvali čakać transpart.
U zvodcy MNS za 25 studzienia — siem zapisaŭ ab «zaharańni spražačnaha izalatara kantaktnaj sietki tralejbusaŭ», adnak try ź ich tyčacca adnaho adrasa — pr. Niezaležnaści 177 (vidać, tam iskryła nieadnojčy). Astatnija vypadki zafiksavanyja na pr. Pieramožcaŭ, pr. Dziaržynskaha i vuł. Jasienina.
«Z-za praboju izalacyi na śpiecčastkach kantaktnaj sietki zdarajecca karotkaje zamykańnie. Heta źjaŭlajecca vynikam asiadańnia paroŭ soli z-za bahataha pasypańnia prajeznaj častki reahientam», — prakamientavaŭ situacyju dyrektar filijała słužby enierhahaspadarki «Minsktransa» Viktar Damarad.
Adnak hetaje tłumačeńnie nie zadavolniła pasažyraŭ hramadskaha transpartu. Źjaviłasia infarmacyja, što sprava ŭ drennym stanie kantaktnaj sietki, jakaja «litaralna razvalvajecca».
«Naša Niva» źviarnułasia da śpiecyjalistaŭ: z adnaho boku nie vierycca, što infrastruktura stała raptoŭna razvalvacca, z druhoha, ścipły kamientaryj adkaznaha čynoŭnika vyklikaje nie mienš pytańniaŭ.
«Nakolki ja viedaju, stanu kantaktnaj sietki tralejbusaŭ u Minsku nadajecca šmat uvahi, — raskazaŭ nam śpiecyjalist, znajomy ź situacyjaj. — Isnujuć schiemy zamieny, kožny kvartał kiraŭnictva Minharvykankama vysłuchvaje spravazdaču ab stanie i znosie pravadoŭ. Praca viadziecca rehularna. Manitorynh taksama. Sietka — heta žyvy arhanizm, jaki patrabuje pastajannaha kantrolu. Ja nie vieru, što ałharytmy raptam źmianilisia».
Naš surazmoŭca źviarnuŭ uvahu na śpiecyfičnaje nadvorje, jakoje ŭstalavałasia ŭ Minsku ŭčora: «Było vielmi vilhotna, tuman, u pavietry nazirałasia zaviś. Kali kropielki traplali na chałodnuju pavierchniu, to źjaŭlaŭsia słoj nie toje inieju, nie toje śniehu. Heta mahło paŭpłyvać na stan kantaktnaj sietki ŭ krytyčnych miescach. Źviarnicie ŭvahu, što za niekalki hadzinaŭ było zafiksavana adrazu niekalki vypadkaŭ, što ciažka ličyć supadzieńniem. Kali b išła havorka ab chranična drennym stanie pravadoŭ, to zdareńni byli b raźniesienyja ŭ časie».
Druhi śpiecyjalist taksama zrabiŭ akcent na nadvorji: «Va ŭmovach vysokaj vilhotnaści možna ŭźnikać karonny razrad. Sprava ŭ enierhietycy zvyčajnaja, jość navat mietodyki, što ŭličvajuć takija straty na vysakavoltnych linijach elektrapieradačy. Ciapier ža heta nazirałasia ŭ bolš bytavych abstavinach».
«Zafiksavanaje na videa iskreńnie vyhladaje fiejeryčna i niebiaśpiečna dla pasažyraŭ, — dadaŭ surazmoŭca. — Adnak na samoj spravie, ryzyki nie było. Vy ž nie pužajeciesia, kali bačycie elektryčnuju duhu, što ŭźnikaje pry zvarcy?»
Taksama nie treba zabyvacca, što minskaja tralejbusnaja sietka adna z samych praciahłych u śviecie (daŭžej tolki ŭ Sankt-Pieciarburhu) i składaje amal što 500 km. To-bok vypadki iskreńnia bolš vierahodnyja mienavita ŭ Minsku prosta z-za abjomu infrastruktury.
Rašeńnie ab čarhovaj «budoŭli stahodździa» niaredka nosić palityčny, a nie praktyčny charaktar. Čamu abvał puciepravoda na Niamizie byŭ niepaźbiežnym
