Fota: skrynšot videa

Fota: skrynšot videa

Vital i Uładzisłaŭ Kuźniečyki ŭpieršyniu dali intervju telekanału «Nastojaŝieje vriemia». Na videa jany pakazali ŭmovy, u jakich žyvuć, i raskazali pra svaju situacyju.

«U vieraśni 2020 hoda, kali my apynulisia na terytoryi ambasady, kaniečnie, my nie dumali, što heta zaciahniecca tak nadoŭha, — kaža Uładzisłaŭ Kuźniečyk. — Ja ŭbačyŭ baćku (dumaŭ, jon razam sa mnoj — akazvajecca, nie). Heta jon tam znachodzicca. Ja heta ŭsio ŭbačyŭ (jak raspylali ślezaciečavy haz — zaŭv. «NN») i realna jak i ŭsiaki čałaviek pajšoŭ ratavać svajho baćku. Ja vyciahnuŭ jaho z hetych «abcuhoŭ».

Na terytoryju ambasady, tak, my patrapili niezakonna, pieraskočyli praz płot. Da hetaha my zvanili ŭ damafon ambasady, my patłumačyli svaju situacyju, skazali, što baimsia za siabie, nieviadoma, što moža być. Nas pasłuchali i adkazali: «My vam ničym nie možam dapamahčy». Nu, i ŭsio. U nas nie było inšaha vyjścia, jak pieraskočyć praz płot».

«My bajalisia pieraśledu, bo my ŭžo tady znachodziłsia ŭ vyšuku. U nas nie było inšaha vyjścia, — kaža Vital Kuźniečyk. — Ambasadu Šviecyi nam paraili siabry. Dy i ja sam čytaŭ u internecie, što Šviecyja — adna iz samych humannych krain Jeŭropy, što nam u lubym vypadku dapamohuć. Jak by tam ni było.

«Na dniach skazali: čakajcie adkazu ŭ krasaviku»

«My nie dumali, što nastolki ŭsio heta zaciahniecca, — dadaje Uładzisłaŭ. — I pa sutnaści na dadzieny momant Šviecyja ničoha nie robić dla taho, kab nam dapamahčy».

«U samoj ambasadzie da nas staviacca dobra, tut pretenzij nijakich niama, kaniečnie, — adznačaje Vital. — Usio, što treba… Nas zabiaśpiečvajuć».

«Tak, rabotniki ambasady da nas dobra staviacca, jany ŭsio razumiejuć, jany bačać, što adbyvajecca ŭ krainie, — pahadžajecca Uładzisłaŭ. — Ale što robiać ułady Šviecyi, niezrazumieła».

Juryst Vadzim Drazdoŭ dapamoh Kuźniečykam skłaści skarhu ŭ Kamitet AAN suprać katavańniaŭ.

«Z samaha pačatku pracedury ŭ Kamitecie suprać katavańniaŭ ułady Šviecyi sprabavali spynić razhlad i pryznać skarhu nieprymalnaj z-za taho, što Kuźniečyki znachodziacca nie pad jurysdykcyjaj Šviecyi, — havoryć Drazdoŭ. — 1 śniežnia 2021 hoda Kamitet suprać katavańniaŭ vyrašyŭ, što skarha zajaŭnikoŭ źjaŭlajecca prymalnaj i što Kuźniečyki znachodziacca pad jurysdykcyjaj Šviecyi. I skarhu patrebna razhledzieć.

Kamitet paprasiŭ taksama ŭłady Šviecyi na praciahu 4 miesiacaŭ pradstavić piśmovyja zaŭvahi pa sutnaści skarhi i vykazać svaju pazicyju pra ryzyku katavańniaŭ u Biełarusi».

«Nam dali na dniach adkaz nakont rašeńnia Kamiteta ab prymalnaści skarhi: čakajcie adkazu ŭ krasaviku, — kaža Uładzisłaŭ. — To-bok, na nastupnaj siesii. Jany nie źbirajucca vyrašać pytańnie chutka.

Kali my pakiniem terytoryju ambasady, z nami moža adbycca ŭsio što zaŭhodna. Jak minimum, nas pasadziać za kraty, tamu što na nas užo niekalki kryminalnych spraŭ, jak nam viadoma.

A ŭ turmie moža być usio što zaŭhodna: ludziej tam i zabivajuć, i katujuć, i nieviadoma što. Nichto nie viedaje, jak budzie nasamreč».

MZS Šviecyi adkazała na zapyt «Nastojaŝieho vriemieni»: «My ŭvieś čas pracujem nad hetym pytańniem i viadziem dyjałoh z hetymi dvumia ludźmi. My nie možam udavacca ŭ padrabiaznaści našaj pracy».

«Ja adčuvaju, što vahu zhubiŭ, u mianie častyja hałaŭnyja boli»

Miž tym, u Kuźniečykaŭ surjoznyja prablemy sa zdaroŭjem. Va Uładzisłava ankałohija.

«Nakont miedycynskaj dapamohi i miedycynskaha abśledavańnia — pa sutnaści nam dać hetuju dapamohu nie zmahli, — kaža Uładzisłaŭ. — Daktaroŭ tut niama i abstalavańnia siudy pastavić nie mohuć».

«Z takim zachvorvańniem, jak va Ułada niemahčyma pravieści abśledavańnie na terytoryi ambasady, — dadaje Vital. — Bo tam patrebna składanaje abstalavańnie: kampjutarnaja tamahrafija i jašče šmat čaho».

«Samaje hałoŭnaje — ja bolš za ŭsio pieražyvaju za ankałohiju, jakaja ŭ mianie była. Ja adčuvaju, što vahu zhubiŭ, u mianie častyja hałaŭnyja boli, — havoryć Uładzisłaŭ. — Šmat jość roznych simptomaŭ. I ŭsie viedajuć pra heta.

Rabotniki ambasady viedajuć — adpaviedna, i ŭłady Šviecyi pra heta viedajuć. Ale ničym, jak jany kažuć, dapamahčy nie mohuć. Tak, mohuć niejkija leki kupić. Ale jakija, kali my nie viedajem? Što i jak uvohule nieviadoma».

«U mianie paharšajecca zrok. Adzinaje, čym mnie mahli dapamahčy ŭ ambasadzie, — kupili akulary, kab ja moh čytać. Nu, i jašče serca niepakoić. U mianie časta balić serca, — kaža Vital. — My ciapier znachodzimsia ŭ biaśpiecy. Ale nazvać heta svabodaj nielha nijak. Tamu što my nie možam vyjści ŭ horad prahulacca. Sustrecca sa svaimi rodnymi. Ja b heta apisaŭ jak turemnaje źniavoleńnie, ale z bolš miakkimi ŭmovami».

«Samaje składanaje dla mianie tut — heta toje, što ja nie mahu bačyć svaich dziaciej, jak jany rastuć, — biare słova Uładzisłaŭ. — Nie mahu ź imi pobač znachodzicca».

«My nie možam bačyć svaich baćkoŭ, siabroŭ, ź jakimi my kožny dzień kamunikavali. Heta maralna ciažka. Chočacca padziakavać i pieradać pryvitańnie palitviaźniam, usim, chto znachodzicca ŭ źniavoleńni pa palityčnych matyvach. Ludzi nie zdajucca, navat siedziačy ŭ turmach. Heta stojkija i sapraŭdnyja patryjoty Biełarusi. My razumiejem, što im našmat horš, čym nam. I kali paraŭnoŭvać našu situacyiju ź imi, to ŭ nas situacyja našmat lepšaja. U nas usio jość».

«Heta budučynia našaj Biełarusi. Jany buduć na čale našaha ŭradu i buduć raźvivać krainu nadalej. Taksama pavaha i niezaležnym ŚMI, jakija pakazvali i pakazvajuć realnaje stanovišča ŭ krainie, pakul była mahčymaść. Žyvie Biełaruś!» — skazali na raźvitańnie Kuźniečyki.

Čytajcie taksama: «Kab my viedali, što heta zaciahniecca nadoŭha». Užo hod, jak baćka i syn Kuźniečyki žyvuć u šviedskaj ambasadzie ŭ Minsku

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?