Niamiecki ekśpiert u halinie avijacyjnaha prava Elmar Himuła ličyć važnym, što Rada ICAO nie stała mirycca z tym, što častka infarmacyi była schavanaja abo, mahčyma, źniščanaja. Naprykład, z tym, što nie chapaje zapisaŭ z kamier videanazirańnia i pakazańniaŭ śviedkaŭ.
Kali b ICAO praihnaravała prabieły ŭ dokazach, heta b aznačała zhodu ź dźviuma rečami, adznačaje ekśpiert. Pa-pieršaje, što zachop samalota i dziejańni Łukašenki možna było b pakinuć biez sankcyj. Pa-druhoje, što dokazy ŭ takoj situacyi mohuć być źniščanyja abo schavanyja.
«Rada zrabiła toje, što pavinna była zrabić, a mienavita zaklikała zacikaŭlenyja baki, pierš za ŭsio Biełaruś, dać dadatkovuju infarmacyju. Rada nie spyniaje rasśledavańnie i zastajecca pry svaim mierkavańni»,
— miarkuje Himuła.
Na dumku ekśpierta, rašeńnie nakiravać finalnuju spravazdaču ab rasśledavańni incydenta ŭ AAN možna ličyć palityčnaj eskałacyjaj, jakuju pačała Rada ICAO:
«Heta i jość nastupny krok. Havorka idzie ŭžo nie tolki pra techničnyja pytańni, ale i pra pavodziny dziaržavy — člena AAN, jakija palityčna nieprymalnyja».
Na pasiadžeńni Rady prysutničali ŭ tym liku pradstaŭniki Biełarusi. Heta śviedčyć pra žadańnie ICAO pradstavić abjektyŭnuju karcinu i pakazać, što, niahledziačy na abvinavačvańni ŭ adras Minska va ŭtojvańni infarmacyi i manipulacyi, Rada nie zacikaŭlenaja ŭ ačarnieńni Biełarusi abo vyklučeńni jaje z abmierkavańnia, ličyć ekśpiert.
«Heta nadaść jašče bolšuju vahu rašeńniu, jakoje ŭ vyniku budzie pryniata. A pryniata jano moža być tolki ŭ tym vypadku, kali było dasiahnuta sumlennym šlacham»,
— adznačaje Himuła.
Pazicyja Rady ICAO ŭpłyvaje na toje, što budzie adbyvacca z avijacyjnymi sankcyjami ŭ dačynieńni da Biełarusi, kaža prafiesar Himuła:
«Kali b ich pryznali niezakonnymi, jak taho patrabavała Biełaruś, to Łukašenka, vierahodna, interpretavaŭ by heta jak sihnał, što jon ničoha nie parušyŭ. Heta, viadoma, byŭ by dla jaho tryumf».
Pakul rasśledavańnie ICAO nie budzie daviedziena da kanca, nie varta čakać admieny avijacyjnych sankcyj i adnaŭleńnia palotaŭ u Biełaruś ź jeŭrapiejskich krain.
«Naadvarot, toj fakt, što Biełaruś ŭtojvaje infarmacyju, pa sutnaści, źjaŭlajecca znakam dla astatniaha śvietu, što jana nie ŭsprymaje inšyja dziaržavy surjozna i ličyć, što moža tak rabić. Kali maje miesca takaja vidavočnaja manipulacyja faktami, jak heta adbyłosia ŭ dadzienym vypadku, nielha prosta rabić vyhlad, što zhadžaješsia ź joj. Tut pavinien być dadzieny vyrazny sihnał»,
— kaža ekśpiert. Na jaho dumku, takim sihnałam z boku ICAO staŭ praciah rasśledavańnia i cisku na Biełaruś.
Napiaredadni avijakampanija Ryanair nazvała prymusovuju pasadku svajho łajniera ŭ Miensku «aktam mižnarodnaha piractva, spansavanaha dziaržavaj», i ahučyła ŭmovu, pry jakoj samaloty zmohuć znoŭ lotać nad Biełaruśsiu, — harantyi, što padobnyja incydenty bolš nie paŭtoracca.
Elmar Himuła nie ličyć hetu zajavu krokam nasustrač biełaruskim uładam. Na jaho dumku, heta standartnaje i vytłumačalnaje dziejańnie z boku avijapieravozčyka, pakolki jon niasie adkaznaść za svaich pasažyraŭ i piersanał.
«Navat kali ŭ padobnych vypadkach usie zastajucca žyvyja, heta ŭsio roŭna złačynstva. I situacyja zaŭsiody moža abvastrycca, nikoli nie viedaješ, nakolki mohuć zaniervavacca piłoty, ci zaŭvažać pasažyry niadobraje, ci pačniecca ŭ samalocie panika, — kaža Himuła. — Toje, što zrabiŭ Łukašenka, - heta ryzyka dla avijacyi, tamu hetyja patrabavańni zrazumiełyja. Pytańnie ŭ tym, ci majuć jany sens. Navat kali b Łukašenka daŭ takija harantyi, na sto adsotkaŭ spadziavacca na ich, chutčej za ŭsio, nie varta».
U studzieni 2022-ha Ministerstva justycyi ZŠA abvinavaciła čatyroch biełaruskich čynoŭnikaŭ u pavietranym piractvie. Elmar Himuła ŭpeŭnieny, što Łukašenka nie vydaść hetych ludziej ZŠA, i ŭ hetym sensie jany mohuć adčuvać siabie ŭ biaśpiecy.
«Ale jany pavinny razumieć, što vyjechaŭšy ŭ Litvu, Hiermaniju abo lubuju inšuju krainu, jany mohuć być ekstradavanyja. Inšymi słovami, jany, pa sutnaści, źjaŭlajucca viaźniami ŭ svajoj ułasnaj krainie. Tak što heta ŭžo važny krok, peŭnaje pakarańnie. Da taho ž heta papiaredžańnie inšym čynoŭnikam na budučyniu».
Čytajcie taksama:
Šerah krain zajaviŭ ab «prabiełach i nieadpaviednaściach» u infarmacyi Biełarusi nakont rejsa Ryanair
U Ryanair nazvali ŭmovy adnaŭleńnia palotaŭ nad Biełaruśsiu
Juryst: Sprava Ryanair nie maje terminu daŭniny, a ŭsich jaje fihurantaŭ zaraz čakajuć «vielmi niaprostyja časy»
«Insceniravali pahrozu vybuchu, kab aryštavać žurnalista-dysidenta». ZŠA raskazali novyja padrabiaznaści incydentu z Ryanair
U ZŠA čatyroch biełaruskich aficyjnych asob abvinavacili ŭ avijapiractvie
