Ukraina apošnija hady źbirała rekordnyja ŭradžai kukuruzy i pšanicy. Fota: depositphotos.com.
Ukraina — adzin z najbolšych u śviecie vytvorcaŭ sielhaspradukcyi. Kali tam pačniecca vialiki kanflikt, heta vykliča turbulentnaść na rynku praduktaŭ i rost cenaŭ na ježu. I heta pry tym, što śviet i tak maje spravu z poskavidnym skačkom inflacyi, piša Politico.
Ciapier Ukraina pastaŭlaje ŭ ES prykładna čverć jaho impartu ziernievych i aleju, u tym liku kala pałovy impartu kukuruzy. ES maje mocnuju charčovuju vytvorčaść, tamu, napeŭna, jon budzie zdolny adaptavacca da novaj realnaści biez pastavak z Ukrainy.
Zusim inšaja sprava — Blizki Uschod i Paŭnočnaja Afryka. Jehipiet, naprykład, zakuplaje šmat ukrainskaha ziernia. Livan vielmi zaležyć ad impartu pšanicy, i 55% usich jaje pastavak tudy ažyćciaŭlajecca z Ukrainy. Pry hetym prablemy z pastaŭkami ježy byli ŭ svoj čas siarod ruchavikoŭ padziej Arabskaj viasny, i ES pastajanna turbuje mahčymaść novaj niestabilnaści ŭ tym rehijonie.
I navat u ES pieraboi z charčovymi pastaŭkami z Ukrainy vykličuć karotkaterminovy šok. Vajna ŭ asnoŭnym paŭpłyvaje na aptovych imparcioraŭ i vytvorcaŭ ježy, jakija ŭžo vymušanyja padcisnucca ŭ suviazi z vysokimi cenami na enierharesursy i žorstkimi ekałahičnymi patrabavańniami ad jeŭrapiejskich rehulataraŭ. U dadatak, kukuruzu z Ukrainy šyroka vykarystoŭvajuć u karmavych metach, i jaje niedachop moža surjozna paškodzić vytvorčaści miasa i małaka ŭ ES. Naprykład, samy vialiki imparcior kukuruzy ŭ ES — Ispanija, tamu kanflikt va Ukrainie paŭpłyvaje nie tolki na canu bahietaŭ u Paryžy, ale i na jakaść ispanskaha chamonu.
U 2021 hodzie Ukraina sabrała rekordny za ŭsiu historyju krainy ŭradžaj ziernievych: 106 miljonaŭ ton. Rekord dasiahnuty dziakujučy rostu ŭradžajnaści, jakaja vyrasła proci minułaha hoda na 18 pracentaŭ. Pra heta paviedamiła Ministerstva ahrapalityki Ukrainy. Heta ŭ dva razy bolš, čym Ukraina źbirała ŭ samyja ŭdałyja hady ŭ saviecki čas, da 1991 hoda.
