Ścisły pierakaz: pili piva, potym rasstrelvali
Mierapryjemstva, jakoje doŭžyłasia niekalki hadzin, nahadvała anatacyju da drennaha bajevika. Ździŭlała, što darosłyja ludzi mohuć udzielničać u vidavočnaj fantasmahoryi, surjozna zadavać pytańni, nie staviačy pad sumnieŭ skazanaje.
Kali ścisła, to viersija Emila Čečki nastupnaja. U červieni 2021 hoda jon byŭ nakiravany da polska-biełaruskaj miažy i trapiŭ u padparadkavańnie da pamiežnikaŭ. Na słužbovym Land Rover jany jeździli, pili piva i razmaŭlali na roznyja temy. Heta nahadvała ci to patrulavańnie, ci to siabroŭski piknik, pakul 8 červienia ŭ lesie jany nie spynili niejkaha čałavieka, jakoha zabiŭ «łysy pamiežnik».
Dalej pačalisia masavyja rasstreły, u jakich prymaŭ niepasredny ŭdzieł hość pres-kanfierencyi. «Na zachadzie [sonca] ja rasstrelvaŭ hrupy mihrantaŭ u kolkaści prykładna dvaccaci čałaviek štodnia», — Emil Čečka začytvaŭ tekst z papiery na polskaj movie davoli budzionna, nie vykazvajučy emocyj.
Pa jaho słovach, rasstreły praciahvalisia z 9 pa 18 červienia, pakul vajskoviec znachodziŭsia ŭ prymiežnaj zonie. Na dumku Čečki, za hety čas im i inšymi sałdatami mahli być zabityja ad 200 da 700 čałaviek. Jon śćviardžaje, što zaŭvažyŭ fakty maradziorstva. A siarod zabitych «adzin raz bačyŭ žančynu, jašče adzin raz — dzicia».
Čamu čałaviek, jaki pryznaŭsia ŭ zabojstvach, znachodzicca na voli?
Arhanizatary pres-kanfierencyi zapeŭnili, što Emil Čečka sprabuje atrymać u Biełarusi status uciekača, u suviazi z čym prachodzić pahłybleny miedahlad, i ŭ jaho navat vyjavili niedachop białku.
Adnak samaje hałoŭnaje pytańnie, jakoje naprošvajecca: čamu hety čałaviek da hetaha času znachodzicca na svabodzie? U krainie, dzie asudžajuć za emodzi ŭ kamientaryjach i dajuć sutki za škarpetki «niapravilnaha» koleru, śledčyja orhany čamuści ihnarujuć publičnaje pryznańnie ŭ masavych zabojstvach.
Jurysty salidarnyja ŭ svaich acenkach: heta pryznańnie ŭ asabliva ciažkich złačynstvach. Čałavieka, jaki heta zrabiŭ, pavinny zaklučyć pad vartu. Jaho słovy nieabchodna praviarać, navat kali heta vidavočnaja chłuśnia.
Sam Čečka paćvierdziŭ, što ličyć siabie zabojcam. Pry hetym jon zaznačyŭ, što «maje śpiecyjalnaść zvarščyka, choča znajści pracu i žyć dalej».
Heta vidavočnaja supiarečnaść, mabyć, mała biantežyła zaprošanych na pres-kanfierencyju. U kamientaryjach ža da tranślacyi ŭ YouTube jaho navat padbadziorvali: «Možam i ŭ AMAP uziać».
Supiarečnaści i pytańni
Nijakich dokazaŭ, aproč słoŭ Čečki, na pres-kanfierencyi nie pradstavili: ni fota, ni zapisaŭ, ni imionaŭ zahinułych… Tolki śćviardžeńni deziercira z polskaj armii.
Akramia masy vidavočnych niestykovak, jakija kidajucca ŭ vočy, źviartaje na siabie ŭvahu charaktar pavodzin. Małady čałaviek raspaviadaŭ ab masavych zabojstvach, praktyčna nie vykazvajučy nijakich emocyj. Jon nie zhadvaŭ navat poł «rasstralanych» (zhadaŭšy tolki, što siarod ich była adna žančyna i adno dzicia), nie kažučy ŭžo pra inšyja detali.
A padčas siońniašniaj pres-kanfierencyi vyjaviłasia pramaja supiarečnaść u paraŭnańni z papiarednimi pryznańniami polskaha vajskoŭca.
U śniežni 2021 hoda jon zajaviŭ, što polskija vajskoŭcy na jaho vačach zastrelili vałancioraŭ, jakija chacieli dapamahčy mihrantam: «Ja byŭ u takoj situacyi, kali padjazdžaŭ vałancior i pačynaŭ kazać: «Kudy vy ich viedziacie?». A pamiežnik paprostu streliŭ jamu ŭ łob». Čečka śćviardžaŭ, što byŭ śviedkam dvuch takich vypadkaŭ.
Ale siońnia jon kazaŭ zusim inšaje. Akazvajecca, zabojstva dvuch aktyvistaŭ jon asabista nie naziraŭ, a tolki čuŭ pra jaho ad inšych. Dy i chto heta byŭ, jon dakładna skazać nie moža — ci to kantrabandysty, ci to vałanciory.
Polskija ŭłady davoli padrabiazna patłumačyli matyvy maładoha čałavieka, jaki ŭ vieraśni 2021 hoda byŭ asudžany na šeść miesiacaŭ abmiežavańnia voli. Sud abaviazaŭ jaho ŭstrymacca ad złoŭžyvańnia ałkaholem, ź jakim u chłopca naziralisia niaprostyja adnosiny.
Čytajcie jašče:
«Heta historyja nie pra situacyju na miažy, a pra kryvavyja fantazii dziaržprapahandy». Frydman — pra dziaržSMI i polskaha sałdata
