«Aŭtahrodna» raskazvaje, što tam adbyvajecca.
«Za 27 hadzin ja nie prajechaŭ nivodnaha santymietra, — aburajecca kiroŭca, jaki staić u čarzie hruzavikoŭ pablizu nasielenaha punkta Pahraničny. — U hety čas mima mianie ŭ bok miažy pastajanna prajazdžajuć biez čarhi inšyja hruzaviki. Heta treba spynić».
Na vulicach nasielenaha punkta Pamiežny hruzavikam stajać zabaroniena. Tamu čarha ciahniecca da nasielenaha punkta, zatym razryvajecca i praciahvajecca paśla jaho. Ahulnaja daŭžynia čarhi kala 20 kiłamietraŭ.
«Mnohija kiroŭcy prajazdžajuć mima našaj čahi, jeduć praz Pahraničny i spyniajucca ŭ chvaście pieršaj čarhi. Kali spytaješ, čaho jon prajechaŭ mima, kiroŭca skaža, što ŭ jaho jość propusk. Prablema ŭ tym, što ŭ 70% takich kiroŭcaŭ propusku niama, jany ŭvodziać u zman astatnich, kab tydzień nie stajać u čarzie», — raspaviadaje surazmoŭca.
Dalnabojščyki kažuć, što z-za takich kiroŭcaŭ ruchu «chvasta» čarhi nie było ŭžo kala 30 hadzin. Siońnia ranicaj kiroŭcy z «chvasta» nie vytrymali i vyjšli na darohu.
«Spačatku kiroŭcy padyšli da supracoŭnikaŭ DAI, jakija pryjechali pravieryć abstanoŭku ŭ čarzie. Ale inśpiektary skazali, što ich abaviazak kantralavać biaśpieku ruchu i praviarać, kab nichto nie stajaŭ uzdoŭž vulic u samym nasielenym punkcie. Tamu maje kalehi patelefanavali ŭ punkt propusku. Tam paabiacali, što da nas pryjedzie aficyjny pradstaŭnik», — kaža mužčyna.
— Jak mienavita možna ŭrehulavać situacyju? — źviartajemsia da mužčyny.
— Pa-pieršaje, treba pačać pierapisvać numary hruzavych aŭtamabilaŭ u čarzie i źviarać ich na ŭjeździe ŭ punkt propusku «Bierastavica». Parušalnikaŭ razvaročvać u kaniec čarhi, jak minimum. Jak maksimum, dziejničać jak palaki. Z polskaha boku hety momant kantralujecca: kali chtości jedzie mima čarhi, jaho spyniajuć i vypisvajuć štraf u 500 złotych. Pa-druhoje, hruzaviki z TŁC «Bierastavica» treba adpraŭlać u kaniec čarhi.
— Patłumačcie pra TŁC.
— La miažy jość łahistyčny centr «Bierastavica», kudy pryjazdžajuć mnohija hruzaviki. Naturalna, dziela hetaj pracedury jany prajazdžajuć mima ŭsioj čarhi i akazvajucca ŭ łahistyčnym centry. Ale raniej paśla hetaj pracedury ich nakiroŭvali ŭ kaniec čarhi, a ciapier jany zastajucca na terytoryi punkta propusku. U vyniku chutka prachodziać miažu. Heta niespraviadliva, — tłumačyć dalnabojščyk.
Ciapier kiroŭcy sprabujuć spyniać fury, jakija prajazdžajuć mima ich, i vyśviatlajuć u kiroŭcaŭ, na jakoj padstavie tyja jeduć u bok miažy.
