Viktar Čajčyc
Bijahrafija Viktara Čajčyca davoli typovaja dla byłoha savieckaha jurysta, jaki ŭ 1990-ja staŭ advakatam. Naradziŭsia ŭ Biarozaŭskim rajonie, na Bieraściejščynie i pačynaŭ svaju karjeru, ale maje vyraznyja prarasijskija pohlady.
Na pracoŭnym stale pobač ź biełaruskim ściaham u jaho stajaŭ i rasijski. A na ścienach pobač z prafiesijnymi dypłomami i hramatami visieŭ fotazdymak z Łukašenkam.
Jon pačynaŭ z rabočych śpiecyjalnaściaŭ, dalej pajšoŭ stažoram u sud, daros da sudździ, papracavaŭ u Miniuście, a ŭ 1997-m syšoŭ u advakaturu.
U 2002-m Čajčyc uznačaliŭ Minskuju abłasnuju kalehiju, a ŭ 2011 hodzie staŭ staršyniom Biełaruskaj kalehii advakataŭ. Tady, paśla vybaraŭ-2010, byŭ pieršy zaŭvažny štorm u advakatury, i Čajčyca pastavili ŭ nadziei załahodzić situacyju.
Jak pačynalisia represii suprać advakataŭ
Viktar Čajčyc zaniaŭ miesca Natalli Andrejčyk, jakaja kiravała advakaturaj faktyčna z 1991 hoda.
Prablemy pačalisia z palityčnych pracesaŭ pa spravie «Płoščy». Niekatoryja advakaty, jakija abaraniali ŭdzielnikaŭ pratestu, vystupili ŭ ŚMI z zajavami, što Kamitet dziaržbiaśpieki parušaje prava ich klijentaŭ na abaronu, nie puskaje advakataŭ u SIZA KDB.
Miniust, jaki pa fakcie kantralavaŭ advakaturu, zajaviŭ, što hetyja vykazvańni niekarektnyja, što jany niehatyŭna aceńvajuć pracu dziaržorhana i supiarečać zakonu «Ab advakatury». I zahadaŭ, kab Minskaja haradskaja kalehija pryciahnuła da adkaznaści advakataŭ, što dazvolili sabie takija vykazvańni.
Adnak prezidyum kalehii, što ciapier užo składana ŭjavić, nie padparadkavaŭsia Miniustu i pryniaŭ rašeńnie nie karać kaleh.
Aleh Ahiejeŭ (sprava) byŭ adnym z advakataŭ, jakich paśla vybaraŭ-2010 pazbavili prava na prafiesiju
Tady Miniust pa vynikach pravierki pa pradpisańni KDB pravioŭ pasiadžeńnie kvalifikacyjnaj kamisii i pazbaviŭ licenzii čatyroch advakataŭ, jakija abaraniali fihurantaŭ spravy «Płošča».
Praź niekalki miesiacaŭ bieź licenzii zastalisia jašče dva advakaty, jakija abaraniali eks-kandydataŭ u prezidenty. Tahačasnaja kiraŭnica kalehii advakataŭ Andrejčyk hałasavała suprać svaich kaleh.
Čajčyc, jak i papiaredni kiraŭnik, hałasavaŭ suprać advakataŭ
Nastupnym udaram pa advakatury stała sprava «Biełaha lehijona». Na fonie «Maršaŭ niedarmajedaŭ» u 2017 hodzie dziaržava raspačała novuju chvalu represij. Fihurantaŭ abvinavačvali ŭ padrychtoŭcy masavych biesparadkaŭ i stvareńni niezakonnaha ŭzbrojenaha farmavańnia.
Paŭtara dziasiatki abvinavačanych praviali pad vartaj kala sta dzion kožny. U vyniku vina ich nie była dakazanaja, spravu spynili za adsutnaściu składu złačynstva. Spačatku śledstva vioŭ KDB, zatym spravu pieradali ŭ SK.
Jość mierkavańnie, što tahačasny kiraŭnik Śledčaha kamiteta, nasupierak cisku, nie davioŭ spravu da suda, pakolki ŭ materyjałach byli vidavočnyja falsifikacyi — čatyry fihuranty źviarnulisia ŭ AAN, Kamitet pa pravach čałavieka zarehistravaŭ ich skarhu na dziejańni biełaruskich siłavikoŭ.
Advakat Hanna Bachcina, jakaja ŭ svoj čas abaraniała Łazoŭskaha, Palčysa i Chalip
Advakaty, jakija pracavali pa hetaj spravie, sutyknulisia ź ciskam — Miniust zapatrabavaŭ ad ich prajści pazačarhovuju atestacyju.
Adna z advakatak, Hanna Bachcina, u vyniku straciła licenziju. Kvalifikacyjnaja kamisija vyrašyła, što śpiecyjalist z 30-hadovym stažam niedastatkova daśviedčanaja, kab praciahnuć pracu.
Viktar Čajčyc na heta adkazvaŭ, maŭlaŭ, takoje sapraŭdy byvaje, što navat vopytnyja jurysty nie viedajuć usich zakonaŭ.
Abaraniŭ advakatku, na jakuju zaviali kryminałku
Jašče adzin pakazalny kiejs — «najezd» na advakatku Vieru Arešku, jakaja abaraniała hałoŭnaha inžyniera MZKT Andreja Hałavača. Taho abvinavačvali ŭ karupcyi, pratrymali pad vartaj čatyry hady, a ŭ vyniku dvojčy apraŭdali.
U hetaj spravie nie było palityki, ale stali vidavočnyja chiby ŭ pracy apieratyŭnikaŭ (HUBAZiK) i śledčych (SK).
Na pieratrus da Viery Areški, jakuju abvinavačvali ŭ razhałošvańni danych papiaredniaha śledstva, pryjšli tyja ž apieratyŭniki, jakija pracavali z Hałavačom, i navat śledčy byŭ toj ža. Doma ŭ advakatki znajšli stary pistalet.
Advakatka Viera Areška. Jaje kaleham pa abaronie hałoŭnaha inženiera MZKT byŭ kiraŭnik Minskaj kalehii advakataŭ Alaksiej Švakaŭ
Adnak dziakujučy rozhałasu i ŭmiašalnictvu Čajčyca (tut jon užo padklučyŭ usie svaje suviazi), sprava suprać Areški skončyłasia ničym, kali nie ličyć stračanych niervaŭ — advakatka navat trapiła ŭ balnicu.
Pa hetaj spravie Čajčyc zajaŭlaŭ, što kalehija budzie abaraniać svaich advakataŭ.
Dapamoh Prakapieniu vyjści na svabodu
Sam Čajčyc advakackaj dziejnaściu amal nie zajmaŭsia, ale viadoma, što abaraniaŭ IT-biznesmiena Viktara Prakapieniu. Da Čajčyca tady źviarnulisia nie tamu, što jon dobry advakat, a tamu, što ŭ jaho byli patrebnyja suviazi.
U 2015 hodzie biznesmiena abvinavačvali ŭ niezakonnaj pradprymalnickaj dziejnaści ŭ śfiery prodažu IT-technałohij (raźmiaščeńnie sajtaŭ i rekłamy bieź dziaržaŭnaj rehistracyi).
Pavodle SK, Prakapienia atrymaŭ niezakonny dachod u pamiery $650 tysiač. Pieršapačatkova paviedamlałasia, što jon nie pryznaje vinu i na supracoŭnictva sa śledstvam nie idzie.
Viktar Prakapienia sioleta zaniaŭ siomaje miesca ŭ rejtynhu samych upłyvovych biełaruskich biznesmienaŭ. U 2017-m jon asabista zapłaciŭ u biudžet Minska 7 młn rubloŭ
Prakapienia pravioŭ dzieviać miesiacaŭ u SIZA. Paźniej stała viadoma, što jon spłaciŭ uron i kampiensacyju, vyjšaŭ na svabodu, kryminalnuju spravu suprać jaho zakryli, paśla čaho jon źjechaŭ ź Biełarusi i pa siońnia žyvie ŭ Łondanie.
Staŭ palitykam, ale zabaraniaŭ inšym advakatam leźci ŭ palityku
U 2019-m Čajčyc staŭ sienataram, pracavaŭ u kamisii pa zakanadaŭstvie. U adroźnieńnie ad nižniaj pałaty parłamienta, pracu ŭ Saviecie respubliki možna sumiaščać z asnoŭnaj. Za sienatarstva dadatkova nie płaciać. Praŭda, sienatary chacia b naminalna, ale źjaŭlajucca ŭdzielnikami palityčnaha pracesu.
Pry hetym palityk Čajčyc nie stamlaŭsia paŭtarać, što advakaty nie pavinny zajmacca palitykaj. Takaja rytoryka źjaviłasia padčas vybarčaj kampanii ŭ 2020-m.
«Mahčyma, niekatoryja advakaty majuć namier pakinuć advakaturu, tamu dazvalajuć sabie pavodzić siabie nieprafiesijna, nie zadumvajučysia ab tym, što ich učynki niehatyŭna adabjucca na imidžy kaleh i advakatury ŭ cełym, — pieraścierahaŭ kiraŭnik BRKA. — Kali chočacie zajmacca palitykaj, sydzicie i zajmajciesia asobna ad advakatury».
Advakat Maksim Znak, jaki zaklikaŭ vyrašyć hramadska-palityčny kryzis šlacham pieramovaŭ z apazicyjaj, u vyniku apynuŭsia za kratami
U adroźnieńnie ad vybaraŭ-2010, u 2020-m pieršyja palitviaźni ź liku kankurentaŭ Łukašenki źjavilisia jašče da hałasavańnia. Da ich znoŭ nie dapuskali advakataŭ, pieratrusy i dopyty znoŭ pravodzilisia z parušeńniem zakona, zatrymanych palivali brudam z ekranaŭ dziaržTV i pałos dziaržaŭnych haziet, kiraŭniki siłavych orhanaŭ jašče da prysudaŭ nazyvali ich złačyncami.
Pry hetym sami abvinavačanyja adkazać nie mahli, zakryli raty i advakatam — ź ich uziali padpiski ab nierazhałošvańni. Ale navat farmalnyja kamientaryi ab parušeńni zakona niervavali i ŭłady, i kiraŭnika Biełaruskaj kalehii advakataŭ. Čajčyc danosiŭ i da ŚMI, i navierch, što kiraŭnictva kalehij sprabuje «pieravychavać» advakataŭ, što «zabłukali».
Kali ž advakaty pačali vykazvacca ab parušeńni zakonaŭ paśla vybaraŭ, naprykład, ab praźmiernym prymianieńni siły da ŭdzielnikaŭ pratestaŭ, niervovaść z boku ŭładaŭ i piersanalna Čajčyca ŭzmacniłasia.
I kali adrazu paśla 9 žniŭnia Viktar Čajčyc zajaŭlaŭ, što pa kožnym vypadku prymianieńnia siły treba raźbiracca, što advakaty buduć abaraniać ludziej, to chutka jaho rytoryka źmianiłasia. Jon usio čaściej staŭ paŭtarać ab niedapuščalnaści revalucyjnych scenaryjaŭ, ab škodzie niesankcyjanavanych akcyj, ab viernaści dziaržavie pad kiraŭnictvam Łukašenki. Apošnija jaho zajavy — suprać zachodnich sankcyj. Čajčyc abiacaje abaraniacca ad niezakonnych dziejańniaŭ zachodnich uładaŭ.
Čym zapomnicca Čajčyc najpierš?
Advakaturu ŭ Biełarusi nielha było nazvać niezaležnaj i da hramadska-palityčnaha kryzisu. U hramadstvie daŭno skieptyčna staviacca da abaroncaŭ, pasłuhi jakich kaštujuć doraha, a na vynik nijak nie ŭpłyvajuć.
Adnak u 2020-m było vyrašana jašče bolš zacisnuć hety instytut. Pazbaŭlać licenzii «niazhodnych» akazałasia niedastatkovym dla ŭładaŭ.
Advakat Dźmitryj Łaŭjeski abaraniaŭ Viktara Babaryku, jak i inšyja jaho abaroncy, byŭ pazbaŭleny licenzii
Abmiarkoŭvalisia roznyja varyjanty, jak źmianić zakon «Ab advakatury». U vyniku prajšoŭ samy žorstki varyjant. U krainie źničšyli ŭsie advakackija biuro, nie zvažajučy navat na toje, što heta byŭ biznes, u tym liku, svajakoŭ sudździaŭ i prakuroraŭ. Dla byłych siłavikoŭ i sudździaŭ źnizili paroh ustupleńnia ŭ advakaturu. Heta toje, z čym advakat Čajčyc zastaniecca ŭ historyi.
Kali stała viadoma, što siłaviki nie prosta prasłuchoŭvali razmovy Siarhieja Cichanoŭskaha z advakatam u SIZA, ale pieradali hety zapis Łukašenku, a paśla jašče i źlili ŭ dziaržaŭnyja ŚMI, Čajčyc zajaviŭ, što ŭ jaho niama paŭnamoctvaŭ hetym zajmacca.
Kali siłaviki brutalna zatrymali ŭ centry Minska advakata Maryi Kaleśnikavaj, paśla taho, jak taja padała zajavu na niezakonnyja dziejańni z vykradańniem klijentki, kalehija taksama prademanstravała svaju biazzubaść — advakatku ŭ vyniku aštrafavali za niepadparadkavańnie.
Prava na advakackuju dziejnaść stracili mnohija zaŭvažnyja śpiecyjalisty, ciapier užo nie tolki abaroncy eks-kandydataŭ u prezidenty, ale navat tyja, chto dazvoliŭ sab krytyčna vykazacca ab zakonnaści ŭ krainie ŭ sacsietkach.
Dvoje advakataŭ — Illa Salej i Maksim Znak — stali fihurantami kryminalnych spravaŭ, apošni asudžany na 10 hod pazbaŭleńnia svabody. I represiŭnaja mašyna nie spyniajecca. Dachodzić da kamičnaha: advakatka Karpušonak napisała artykuł pra toje, što advakatam nie treba vysoŭvacca. Na nastupny dzień jaje pazbavili licenzii.
Fota council.gov.ru
Pryčyny adstaŭki Čajčyca nie nazyvajucca, infarmacyja pra toje, što jon nie prajšoŭ pieraatestacyju, niepraŭdzivaja. Farmalna jon zastajecca i advakatam, i deputatam vierchniaj pałaty parłamienta.
Niahledziačy na ŭsie pieraturbacyi z advakaturaj, Čajčyca naŭrad ci možna nazvać adyjoznym prychilnikam režymu Łukašenki. Jon dziejničaŭ z ahladkaj na kanjunkturu i zaŭsiody staraŭsia być aściarožnym u vykazvańniach.
Znojdziecca niamała tych, chto budzie jaho abaraniać, maŭlaŭ, jak moh staraŭsia zachavać advakaturu. Ciapierašniaja aktyŭnaść advakataŭ u «dyjałohavych placoŭkach» pa abmierkavańni Kanstytucyi — adna sa sprobaŭ pakazać, što advakatura łajalnaja ŭładzie.
Ale kali kiraŭnikom Miniusta staviać byłoha milicyjaniera, jaki nie maje profilnaj jurydyčnaj adukacyi, to heta najlepšaja ilustracyja taho, jak siońniašniaja ŭłada ŭjaŭlaje sabie zakonnaść i efiektyŭnaje kiraŭnictva. Na hetym fonie i Čajčyc moža vyhladać niedastatkova łajalnym.
Čytajcie jašče:
«Ludzi akazalisia važniejšymi za ŭłasnyja strachi». Viadomaja advakatka Natalla Mackievič pra AAN i Cichanoŭskaha, spravu Babaryki i budučyniu prava ŭ Biełarusi
Prakuror Stoŭbcaŭ admoviŭsia płacić u restaranie, a kali vyklikali milicyju — dastaŭ «ksivu». Jon plamieńnik Čajčyca
