«Rekanstrukcyja vykliča pavialičeńnie aŭtamabilnaha trafiku. Što ź im buduć rabić?»

«Vulica Bahdanoviča płanujecca da pašyreńnia, što praduhledžana hienpłanam horada», — zajaviŭ namieśnik staršyni Minharvykankama Dźmitryj Mikulonak, čym vyklikaŭ čarhovuju chvalu razmoŭ ab znosie pryvatnych damoŭ u Sielhaspasiołku.

Chacia čynoŭnik abmoviŭsia ab tym, što rekanstrukcyja płanujecca paśla 2025 hoda, heta nie mahło nie vyklikać žyvoj reakcyi. Tym bolš, što «na hetym učastku» hienpłanam praduhledžanaje budaŭnictva mietro, a heta zaŭsiody supravadžajecca maštabnymi rabotami, pierakryćciom, źmianieńniem ruchu hramadskaha transpartu i hetak dalej.

U teoryi, praź niekalki hadoŭ Sielhaspasiołak čakajuć vialikija źmieny.

Ciapier na ŭčastku vulicy Bahdanoviča, jaki prachodzić pa Sielhaspasiołku, pa «paŭtary» pałasy ŭ kožnym kirunku. Tam prachodziać niekalki maršrutaŭ tralejbusaŭ, što robić ruch aŭtamabilaŭ niekamfortnym. Jak ličać ekśpierty, mienavita heta ratuje mahistral ad pierahruzki.

Paradoks: jak tolki palapšajucca ŭmovy darožnaha ruchu — praparcyjna pavialičvajecca trafik.

Kali ž płany pa pašyreńni buduć realizavanyja, to nahruzka taksama pavialičycca ŭ susiednich vuzłach — naprykład, na šmatpakutnaj płoščy Banhałor, na vulicach Šyrokaj, Mirašničenki, Łukjanoviča, Kalcova i inšych, što taksama zapatrabuje ŭniasieńnia karektyvaŭ.

Imknieńnie da pašyreńnia prajeznych častak vulic biełaruskija čynoŭniki demanstravali zaŭsiody, ale ekśpierty krytykavali hihantamaniju: «Heta nie vyrašaje prablemu aŭtamabilnych zatoraŭ, bo mašyny źbirajucca na śviatłaforach. Važniej karektna rehulavać ruch na pierakryžavańniach, a nie pašyrać pierahony, umiešvajučysia ŭ žyvy płast haradskoha asiarodździa».

«Pra heta kažuć ŭžo niekalki dziesiatkaŭ hadoŭ. Rekanstrukcyja i zabudova na «pieršaj linii» — abmiežavanyja»

Samaje balučaje, što rekanstrukcyja važnaj haradskoj mahistrali vymusić znosić pryvatnyja damy, jakija znachodziacca kala prajeznaj častki. Ci hatovyja da hetaha ludzi, jakija mohuć sutyknucca ź pierasialeńniem?

Mnohija, napeŭna, pamiatajuć, jakimi skandałami supravadžaŭsia znos pryvatnych damoŭ padčas budaŭnictva ŭzdoŭž praśpiekta Dziaržynskaha. Doŭhi čas na płocie adnaho ź ich visieli płakaty sa zvarotam z abureńniem. Kanflikt byŭ vyčarpany praź niekalki miesiacaŭ pieramovaŭ.

«Naša Niva» źviazałasia z žycharami Sielhaspasiołka. Na navinu jany reahujuć davoli spakojna:

«Razmovy chodziać bolš za dvaccać hadoŭ. Płany mianialisia nieadnarazova. Spačatku kazali, što buduć znosić damy z abodvuch bakoŭ ad prajeznaj častki. Potym byccam by adzin bok udałosia adstajać».

«Usie, chto žyvie ŭ Sielhaspasiołku, viedajuć pra hetaje pašyreńnie ŭžo vielmi-vielmi daŭno, — paćviardžaje adna z žycharak. — I tyja, čyje damy buduć znosić, da hetaha hatovyja. Ci ŭsprymajuć surjozna pierśpiektyvu znosu? Nie… Heta, vidavočna, budzie jašče nie chutka. Što tyčycca bahatych damoŭ, uzdoŭž vulicy Bahdanoviča ich niama, niaŭžo vy takija sustrakali?»

Adna z žančyn, što žyvie pobač, vykazvaje padobnaje mierkavańnie: «Kali b moj dom znosili, ja była b rada, bo maje materyjalnyja mahčymaści nie supadajuć z vydatkami, nieabchodnymi dla padtrymańnia pryvatnaha doma ŭ dobrym stanie. A jašče ŭ nas niama centralnaj kanalizacyi. Heta vielmi vialikaja prablema — davodzicca ekanomić na vadzie. Košt adpampoŭki vyhrabnoj jamy ŭ dziesiać razoŭ bolšy, čym płata za vodaspažyvańnie».

«Hadoŭ sorak kažuć pra znos na cotnym baku vulicy i dvaccać mietraŭ uhłyb. Maje rodnyja, da prykładu, praviali vadu tolki ŭ kancy 1980-ch, tamu što «źniasuć ža». Stamilisia čakać. U 1990-ch chto zmoh, zrabiŭ prybudovu, pavialičyŭ kolkaść pavierchaŭ. Chtości paśpieŭ uzakonić. Uletku 2020 hoda chadzili inžyniery, rabili zamiery dla prajekta znosu. Brali proby hruntu. Kožnyja try hady robiać acenku», — apisvaje asablivaści žyćcia ŭ mikrarajonie adzin ź minčukoŭ. 

Fota Onliner

Fota Onliner

Jon ža źviartaje ŭvahu na toje, što mnohija byli b rady pradać damy, ale heta zabaroniena: «Navat ramont zrabić ryzykoŭna. Jaho nie kampiensujuć (jon nie ŭvojdzie ŭ acenku ci heta buduć kapiejki), abo projdzieš usie koły piekła, kab unieśli ŭ techpašpart doma».

Adnak inšy naš surazmoŭca śćviardžaje, što jość i tyja, chto niezadavoleny płanami ŭładaŭ: «U kaho truchlavaje žyllo, napeŭna, i nie suprać pierajechać, ale bolšaść tych, chto žyvie ŭ prystojnych damach, vidavočna, nie vielmi chacieli b. Užo nie raz adbivalisia ad hetych prajektaŭ, źbirali podpisy, i sustrečy byli z pradstaŭnikami ŭłady. Dumaju, šmat chto hatovy zmahacca za svaje damy i ŭkład u žyllo, ale tam, dzie nie da zakonaŭ, heta nie tak i prosta».

Ułady Minska ab prapanovie zrabić Niamihu piešachodnaj: «Mohuć prynieści niazručnaści minčukam, jakija pierasoŭvajucca na aŭto»

Pieramieścimsia ŭ inšy kaniec vulicy Bahdanoviča. Tak, da puciepravoda, što byŭ adkryty na minułym tydni. Na važny abjekt byli nakiravany vialikija siły, i ruch byŭ adnoŭleny za miesiac.

A cikavaść u tym, što staršynia Minharvykankama Uładzimir Kucharaŭ usio ž taki vyrašyŭ adkazać na pietycyju, u jakoj prapanoŭvali admovicca ad adnaŭleńnia puciepravoda i pieranakiravać trafik ŭ abychod histaryčnaha centra.

Čynoŭnik zajaviŭ, što prapanovy byli pilna praanalizavanyja (a jak inakš?): «Adnak varta ŭličvać toje, što hetyja źmieny mohuć prynieści niazručnaści minčukam, jakija pierasoŭvajucca na aŭto».

U tradycyjnaj maniery čynoŭnik spasłaŭsia na niavyznačanuju hrupu hramadzian. Adnak, jak pravodziłasia daśledavańnie hramadskaj dumki i ci vyvučałasia mierkavańnie aŭtamabilistaŭ, nie ŭdakładniŭ. Heta da pytańnia ab prazrystaści pryniaćcia rašeńniaŭ i ŭdziele ŭ hetym haradžan.

Ekśpierty ž śćviardžali, što pieratvareńnie Niamihi ŭ piešachodnuju zonu z vyklučeńniem dla hramadskaha transpartu nadało b impuls raźvićciu histaryčnaha centra.

Raźliki pakazvajuć, što vuličnaje kafe na miescy parkoŭki nie tolki pryciahvaje turystaŭ, ale i prynosić u biudžet horada dachody ŭ dziasiatki razoŭ bolšyja, čym karotkaterminovaja arenda mašynamiesca (miechanizm zboru jakoj, darečy, da hetaha času nie adładžany).

Za prykładami daloka chadzić nie treba. Tak, rekanstrukcyja vulicy Kamsamolskaj prajšła nie idealna. Ale miesca ažyło, źjavilisia vuličnyja kaviarni, muzyki, mastaki. Tam stała pryjemna špacyravać i, zrazumieła, tracić hrošy. A što było raniej? Na vulicy ŭ try rady stajali aŭtamabili…

«Imavierna, byŭ uziaty stary prajekt. Sama kanstrukcyja vielmi prostaja»

Što ž tyčycca samoha puciepravoda i razmoŭ ab jaho nadziejnaści, to śpiecyjalisty, ź jakimi pahutaryła «Naša Niva», miarkujuć: «Imavierna, byŭ uziaty stary prajekt. Sama kanstrukcyja vielmi prostaja, praloty karotkija. Typovaje zbudavańnie».

Fota Onliner

Fota Onliner

Adnak ci dastatkova raniejšaha vopytu ekspłuatacyi viadomaj kanstrukcyi? Raniej zajaŭlałasia, što teściravańnie pravodziłasia z dapamohaj šaści samazvałaŭ masaj pa 35 ton kožny.

«Pa vialikim rachunku, treba teściravać z dapamohaj datčykaŭ na praciahu peŭnaha času. Uspomnicie, jak u 2018-m doŭha adkryvali puciepravod na MKAD (u rajonie Ihumienskaha haścinca). Tady takoj śpieški nie było i vyprabavać atrymałasia ŭ bolš-mienš spakojnym režymie», — havorać ekśpierty.

Ale vialikaj niebiaśpieki jany nie bačać: «Nahruzki na takich abjektach byli praličanyja i aprabavanyja daŭno. Treba vielmi pastaracca, kab pamylicca».

Kalco abo radyjalnaja mahistral?

Naršecie, minskija ŭłady zapeŭnili, što płanujuć zaviaršyć raboty pa budaŭnictvie pieršaha transpartnaha kalca ŭ ličanyja miesiacy i vyjści na vuł. Tałstoha. «Ja dumaju, što heta taksama daść mahčymaść značna źnizić transpartnuju nahruzku na centralnuju častku horada», — spadziajecca Uładzimir Kucharaŭ.

Skiepsis ekśpiertaŭ u tym, što kančatkovaj raźviazkaj stanie składany vuzieł z vychadam na Pryvakzalnuju płošču, jakaja i tak pierahružanaja ŭ hadzinu pik.

To-bok pryciahnuć peŭnuju kolkaść aŭtamabilaŭ zaŭsiody možna, a voś jak raźmierkavać ich u składanaj kropcy — dobraje pytańnie.

Po prahnozach śpiecyjalistaŭ, nahruzka na pieršaje kalco pavialičycca, što vykliča najpierš ciažkaści na źjezdach i vyjezdach z mahistralaŭ. Spačatku treba było b padrychtavać składanyja vuzły i tolki paśla inicyjavać pavieličeńnie patoku.

Uvohule ž, heta viartaje da adviečnaj sprečki: u jakoj z typaŭ vulic — kalca abo radyjalnaj mahistrali — pavinien być pryjarytet. Pakul što vyjhrajuć darohi, jakija viaduć u centr horada. Zialony sihnał śviatłafora haryć mienavita dla ich.

Čytajcie jašče:

Čamu ŭ Biełarusi nie buduć budavać novyja darohi? Mierkavańnie

Rašeńnie ab čarhovaj «budoŭli stahodździa» niaredka nosić palityčny, a nie praktyčny charaktar. Čamu abvał puciepravoda na Niamizie byŭ niepaźbiežnym

Čamu škodna maryć, abo Čym niebiaśpiečnyja pražekty pa adradžeńni staroha Minska?

Клас
0
Панылы сорам
0
Ха-ха
0
Ого
0
Сумна
0
Абуральна
0