«Premija ciapier štomiesiac, ale ad čaho jana zaležyć, nie viedaje nichto»

Alaksandru 32 hady, jon pracuje ŭračom na chutkaj dapamozie. Za studzień mužčyna atrymaŭ 1065 rubloŭ z ulikam adnoj kavidnaj źmieny. Dapłata za jaje skłała 240 rubloŭ.

«Kali pačaŭsia kavid, nam stali narmalna płacić, — havoryć jon. — Na praciahu hetych dvuch hadoŭ my atrymlivali pa 3000 rubloŭ, časam navat i pa 3500. Ale ciapier znoŭ viarnulisia da taho, što było. U doktara na chutkaj dapamozie akład u siarednim 300 rubloŭ.

Ilustracyjnaje fota

Ilustracyjnaje fota

Dadatkova jašče płaciać 100 rubloŭ za kantrakt, 70 premii, 30 za intensiŭnaść i hetak dalej. U vyniku atrymlivajecca 700. Premija ciapier u nas štomiesiac, ad čaho jana zaležyć, nie viedaje nichto. Jana moža być 17 rubloŭ, a moža i 70.

Što tyčycca kavidnych nadbavak. Za miesiac pa hrafiku kavidnych źmien moža być nie bolš za čatyry pa 12 hadzin. Ale možna vypadkova narvacca na kavid na vykliku, i tady taksama pierachodziš u ranh kavidnych bryhad.

Tut nie ŭhadaješ, kolki razoŭ na miesiac ty «złoviš» hety virus vypadkova. Moža i adna kavidnaja źmiena być, a moža i 5, i 8. Dvanaccać hadzin na kavidzie — 120 rubloŭ plus, 24 hadziny — 240. Ale kažuć, što vyjšaŭ novy ŭkaz, i praviły źmieniacca. Jakim čynam, daviedajemsia ŭ nastupnym miesiacy».

Alaksandr kaža, što z červienia minułaha hoda ŭ ich źmianiłasia sistema apłaty, i ciapier nie zusim zrazumieła, z čaho składajecca zarobak.

«Da hetaha ŭsio było prosta. Niejkaja suma vydzialałasia z našaj buchhałteryi na padraździaleńnie, i niepasredna zahadčyk pa vynikach pracy raźmiarkoŭvaŭ hrošy, — kaža mužčyna. — To-bok, jon bačyŭ, što kali ty šmat pracavaŭ, to dadavaŭ zarobak. I supracoŭnik chacia b viedaŭ, za što ŭ jaho premija. A ciapier sumy prychodziać źvierchu, z našaj administracyi.

Ilustracyjnaje fota

Ilustracyjnaje fota

Uvieś minuły hod premija nie pavialičvałasia. Maksimalnaja — 25 rubloŭ. A da Novaha hoda dali pa 72 rubli. Skazali, što z fondaŭ ekanomii.

U minułym hodzie, kali atrymlivaŭ 3000-4000 u miesiac, mianie hetyja 25 rubloŭ nie cikavili. A ciapier viarnulisia da taho, što heta maje značeńnie. Ja ŭ našaj buchhałteryi čuŭ, što da Novaha hoda hrošy kavidnyja vydzialalisia ź Ministerstva achovy zdaroŭja, a z 2022-ha jany vydzialajucca z arhanizacyj na miescy. Maŭlaŭ, tamu ŭsio viarnułasia na ŭzrovień 2019 hoda».

Alaksandr miarkuje, što pieršapačatkova, kali pačaŭsia kavid, sistema vypłat była niedyfierencyravanaja. Heta i pryviało da prablem.

«Kavid ža pačaŭsia jašče da ŭkaza ab vypłatach nadbavak. Za sakavik nam pryjšoŭ zarobak na 500 rubloŭ bolšy. Potym stali atrymlivać pa 2000—3000 rubloŭ. Takim čynam, pieršapačatkova ŭsie hrošy patracili na hetyja vypłaty i ciapier viarnulisia da svaich 700 rubloŭ», — miarkuje doktar.

Što tyčycca mahčymaści padpracavać, to pa słovach Andreja, jana jość, ale zarabić vialikija hrošy na hetym nie ŭdajecca. Bo pierapracoŭki apłačvajucca nie nadta dobra.

«Atrymlivaju 700 rubloŭ na staŭku, paŭstaŭki źvierchu — jašče 300. Zvyšnormy apłačvajecca mienš, čym asnoŭny čas, — raskazvaje jon. — Mahčyma, tamu, što kožny novy hod usie supracoŭniki arhanizacyi achovy zdaroŭja pišuć zajavu na imia hałoŭnaha ŭrača z prośbaj dazvolić pracu zvyš ustalavanaha pracoŭnaha času ŭ miežach 900 hadzin za hod [ź listapada 2021 hoda — u miežach 1800 hadzin za hod, — zaŭv. «NN»]. Heta značyć, ja sam prašu ŭ ich padpracoŭku, a nie jany ŭ mianie».

Kab mieć bolš-mienš adekvatny zarobak, Alaksandr pracuje na dźviuch pracach. U adpačynku mužčyna nie byŭ užo vosiem hod. U hety čas zvyčajna taksama padpracoŭvaje na chutkaj, ale ŭ inšym horadzie.

«Zarobak u sumie ź dźviuma pracami —1200-1300. Heta na dźvie staŭki pa 12 hadzin u dzień biez vychadnych, abo pa 16 hadzin, z 8:00 da 24:00, piać dzion na tydzień», — kaža mužčyna.

«Idzieš u «Vitalur» pa rybu, bo jana tańniejšaja, a potym u «Jeŭraopt» pa chleb, bo tam jon mienš kaštuje»

Alaksandr žyvie ŭ kvatery razam ź cieściem i žonkaj, jakaja taksama pracuje ŭračom. Zarobak mužčyna tracić na bazavyja rečy i časam moža adkłaści nievialikuju sumu.

«Kožnyja dva tydni z zarobku i avansu ja zapraŭlajusia da poŭnaha baka. Heta prykładna pa 100 rubloŭ. Značyć, 200 u miesiac, — raskazvaje mužčyna. — Apłačvaju mabilnuju suviaź — dva telefony. Heta 100 rubloŭ. Kamunałku my nie płacim, bo žyviem ź cieściem, tamu astatniaje ŭsio idzie na pradukty i adzieńnie. Adkłaści mahu. U najlepšym vypadku sto dalaraŭ. Heta byvaje, kali žonka atrymlivaje krychu bolš. Takaja hulnia na vyžyvańnie».

Mužčyna kaža, što ciapier zaroblenych hrošaj na bujnyja pakupki nie chapaje. Pryznajecca: moža niešta nabyć tolki tady, kali svajaki padorać hrošy na dzień naradžeńnia.

Ilustracyjnaje fota

Ilustracyjnaje fota

«Dva hady ŭsio było dobra, — kaža mužčyna. — Ludzi pazakryvali kredyty, addali daŭhi. Ciapier idzieš u «Vitalur» pa rybu, bo jana tańniejšaja tam, a potym u «Jeŭraopt» pa chleb, bo tam jon mienš kaštuje».

U 2017 hodzie Alaksandr pracavaŭ na chutkaj ŭ Rasii. Tamu moža paraŭnać umovy dla daktaroŭ u Biełarusi i ŭ Rasii. Kaža, što zarobak byŭ choć i nie samy vialiki, ale hodny.

«Atrymlivaŭ tam 80 tysiač rasijskich rubloŭ (2736 biełaruskich), — zhadvaje jon. — Chaj ja 10 tysiač (342 biełaruskija rubli) traciŭ na arendu žylla, ale ž mnie chapała i było narmalna žyć tady. Mnie tam kalehi ŭvieś čas kazali, što ŭ Biełarusi ŭsio dobra.

Ja ŭ ich pytaŭsia, z čaho raptam tak vyrašyli. Kazali, maŭlaŭ, čysta i małočka dobraja. Adnak ad hetaha ŭ mianie ž u kišeni nie dadasca! U Paŭnočnaj Karei taksama čystyja vulicy, ale ž heta ničoha nie značyć. Bo ŭ Minsku rabotnik chutkaj dapamohi nie moža dazvolić sabie zdymać kvateru».

«Dla narmalnaha žyćcia ŭ Biełarusi ja b chacieŭ zarablać 3000 rubloŭ na adnoj pracy, — razvažaje mužčyna. — Ciapier dyk zusim pracy ŭ try razy bolš, chvarejuć supracoŭniki, i hrošaj u try razy mienš płaciać. My ŭvohule z žonkaj źbirajemsia chutka źjadžać u Jeŭropu. Tam urač sam stavić umovy, kolki jon choča atrymlivać jak śpiecyjalist. I žyllo dajuć».

«Za hod zarobak pavialičyŭsia tolki z-za kavidu»

Aniestiezijołah-reanimatołah Alaksandr pracuje ŭ adnym z rajcentraŭ Minskaj vobłaści. U studzieni 24-hadovy chłopiec atrymaŭ 1000 rubloŭ zarobku. 

«Za śniežań było 2000 rubloŭ biez uliku padatku, — kaža jon. — Ja jak małady śpiecyjalist atrymlivaju adpaviednuju nadbaŭku — kala 100 rubloŭ. Nievialikuju, ale pryjemna. Aniestezijołaham-reanimatołaham taksama dadatkova płaciać za napružanaść pracy. My ličymsia ekstranaj słužbaj. Jość jašče i nadbaŭka za vysokatechnałahičnyja apieracyi i viadzieńnie pacyjentaŭ paśla hetych apieracyj.

Zarobak Alaksandra za studzień

Zarobak Alaksandra za studzień

Umovy pracy ŭ siarednim narmalnyja. Svaje plusy i minusy. Nahruzka roznaja. Adzin dzień moža być spakojnym, a nastupny ŭžo vielmi nahružanym. Nikoli nie viedaješ, kali ludzi zachvarejuć, pakalečacca ci napjucca da stanu paŭtrupa. Patrabavańniaŭ šmat, usio ž za žyćcio čałavieka adkazvajem. Ale i biurakratyi šmat».

Pa słovach Alaksandra, kab jamu zarabić bolš, treba pracavać za traich. Chłopiec dadaje: u biełaruskich realijach miedyk nie vyžyvie, kali budzie «siadzieć» na adnoj staŭcy.

«Za hod zarobak pavialičyŭsia tolki z-za kavidu. Kali jon jość, tady možna pra hrošy nie dumać, — kaža chłopiec. — Ale kali jaho niama, užo davodzicca ekanomić».

Mienavita kavidnyja vypłaty Alaksandr adkładvaje na bujnyja pakupki. A «hoły» zarobak tracić na bazavyja rečy.

«Žyllo zdymać nie treba, i heta vielmi dobra, — raskazvaje chłopiec. — Pachod u kramu z zakupkaj prykładna na tydzień abychodzicca ŭ 100-150 rubloŭ minimum. Pamnažajem na čatyry, vychodzić 400-600 u miesiac. Kamunałka — heta jašče 150. Bienzin — 100-200 rubloŭ. Ja žyvu ŭ inšym horadzie i na pracu jezdžu na mašynie.

Adzieńniem zakuplaŭsia ŭ listapadzie, nie pamiataju, kolki syšło. Taksama raz na tydzień starajusia vybracca kudy-niebudź raźviejacca. U pab, kino, biljard, kviz. Ad režymu «praca-dom-praca» zharyš umomant. Nu i na adpačynku taksama ekanomlu.

Zrazumieła, što miedyk z takim zarobkam u žyćci nie nabudzie i nie pabuduje sabie žyllo. Kali nie było kavidnych hrošaj, ekanomiŭ na ježy. Bolš tannyja pradukty kuplaŭ».

Alaksandr ličyć, što doktaru ŭ Biełarusi pavinny płacić 4000 rubloŭ. Takuju sumu jon nazyvaje dastatkovaj dla žyćcia ŭ krainie. 

«I na nieabchodnyja traty, i na adzieńnie, i adpačyć, i adkłaści na bujnyja pakupki, — razvažaje jon. — Surjozna, reanimatołahi — heta vyratavalnaje koła luboj balnicy. Kali pacyjentu horš — vyklikajecca reanimatołah, jon ahladaje, kansultuje. Abo naohuł zabiraje pacyjenta ŭ adździaleńnie intensiŭnaj terapii dla stabilizacyi stanu.

Kali pastupiŭ vielmi ciažki pacyjent, reanimatołah jaho adrazu zabiraje ŭ adździaleńnie, kiruje ŭsim pracesam lačeńnia i dyjahnostyki. Biez aniestezijałahičnaj słužby nie budzie i chirurhičnaj. Ni płanavaj, ni ekstranaj. Tak što 3000-4000 — heta minimum.

U nas praca ŭrača ni ŭ što nie stavicca. Chtości pracuje za ideju, navat z takim zarobkam. Astatnija prosta adpracoŭvajuć svoj dypłom i źjazdžajuć z krainy, bo z takim zarobkam nie pabuduješ sabie kamfortnaha žyćcia. A pracavać 30 hadoŭ dla stabilnaha žyćciovaha stanovišča heta zusim drennaja pierśpiektyva».

«Pakul što mnie chapaje tolki na bazavyja patreby»

Hańnie 20 hadoŭ. Jana skončyła miedycynski kaledž pa śpiecyjalnaści «Lačebnaja sprava». Ciapier dziaŭčyna pracuje fielčaram vyjaznoj bryhady chutkaj dapamohi. Akład u jaje 225 rubloŭ, a zarobak całkam za śniežań 2021 skłaŭ 1124 rubli.

«U vieraśni ja atrymała 934 rubli, u kastryčniku — 1270, u listapadzie — 1600. Dapłata za kantakt z karanavirusnymi chvorymi — 140 rubloŭ za 12 hadzin, — kaža jana. — Ciapier na vizity da karanavirusnych chvorych adpraŭlajuć bryhadu, u jakoj supracoŭniki pryščeplenyja.

U mianie ŭ miesiac u siarednim vychodzić pa 3-4 kantakty. Nadbaŭka maładomu śpiecyjalistu — 45 rubloŭ. Dapłačvajuć za składanaść i napružanaść, ale heta vielmi roznyja sumy, dakładna skazać nie mahu. Darečy, u śniežni dali hadavuju premiju — 130 rubloŭ, i na azdaraŭleńnie 37».

Pa słovach Hanny, na pracy možna zarabić bolš, kali ŭziać padpracoŭku. Dziaŭčyna tak rabiła ŭ žniŭni 2021 hoda. Ale za 24 hadziny pracy joj dapłacili 32 rubli.

«Ja i ciapier pracuju dniom ci nočču pa 12 hadzin. Na staŭku ŭ siarednim vychodzić try źmieny za tydzień, — raskazvaje jana. — Časta vychodžu pa śviatach i vychadnych. Sa składanaha ŭ pracy toje, što mnie niaprosta nasić miedycynski čamadančyk i sumku z kardyjohrafam, asabliva na piaty pavierch, dzie niama lifta.

Składana pracavać unačy, bo vielmi chočacca spać. Uzimku pracavać chałodna, a ŭletku horača. U mašynie mnie časta stanovicca młosna. A jašče strašna patrapić na joj u avaryju, kali my jedziem na mihałkach».

«Nabyć žyllo ja dakładna nie zmahu za svoj zarobak. Tamu budu mianiać prafiesiju»

Adkładvać u Hanny atrymlivajecca — prykładna 150 rubloŭ u miesiac. Usiaho astatniaha zarobku, jak ličyć dziaŭčyna, chapaje tolki na zakryćcio bazavych zapatrabavańniaŭ.

«Navat, kali pracavała sanitaram z zarobkam 230 rubloŭ, sprabavała adkładvać. Mianie tak vychavali baćki, — tłumačyć dziaŭčyna. — Kali kazać pra raschody, to na arendu žylla ŭ mianie sychodzić 230 rubloŭ. Žyvu ja ŭ pakoi ŭ dvuchpakajovaj kvatery. U druhim pakoi dźvie dziaŭčyny. Kamunalnyja kala 30 rubloŭ. Ježa — 300. Prajazny — 70 rubloŭ. Heta z maršrutkami.

Dohlad za źniešnaściu — prykładna 120 rubloŭ. Adzieńnie — 80, ale heta nie kožny miesiac. Ja jašče inviestuju, kuplaju akcyi na amierykanskim fondavym rynku. Na heta sychodzić prykładna 100 rubloŭ. Dachod pakul što vielmi maleńki.

Raźlikovy listok Hanny za śniežań

Raźlikovy listok Hanny za śniežań

Treba čas, kab na hetym zarablać. Na niejkija zabavy, kino, teatr, viečarynki — 80 rubloŭ. Padarunki na dni naradžeńnia, Novy hod, 8 sakavika i inšyja śviaty — 150. Jašče chadžu ŭ spartyŭny zał za 80 rubloŭ u miesiac. Lublu samaraźvićcio, knihi, kursy. Niadaŭna vydzieliła 1000 rubloŭ na kurs pa SMM. Za piać miesiacaŭ paŭnavartasnaj pracy była tolki adzin raz u restaranie. U kino i kafe zvyčajna byvaju z chłopcami, jakija častujuć».

Sabie na padarunak dziaŭčyna adkładvała čatyry miesiacy. Jana choča kupić novy telefon, stary ŭžo drenna pracuje.

«Paśla hetaj pakupki budu adkładvać na mora, — razvažaje jana. — Sa svaim zarobkam nabyć žyllo ja dakładna nie zmahu. Tamu budu mianiać prafiesiju. Voś ciapier kursy pa SMM skonču i chaču pajści pracavać u hetaj śfiery. Jość žadańnie pracavać dystancyjna.

Vielmi chočacca padarožničać, kupić kvateru, chadzić na tancy, płavańnie i vakał, a na heta ŭsio treba bolš hrošaj. Pakul što mnie chapaje tolki na bazavyja patreby. Liču, što dla narmalnaha žyćcia ŭ Biełarusi mnie treba 3000 rubloŭ. A dla fielčara vyjaznoj bryhady minimalny zarobak pavinien składać 1500 rubloŭ. Z karanavirusnaj nadbaŭkaj mnie jašče narmalna płaciać. Ale što rabić, kali heta skončycca? Budzie niespraviadliva».

Čytajcie jašče:

«Kavidnyja nadbaŭki płaciać, ale ludzi ŭsio roŭna sychodziać». Niekatoryja biełaruskija balnicy i palikliniki šukajuć pa 100 i bolš śpiecyjalistaŭ

Doktaru hatovyja płacić 700 rubloŭ, aharodniku — 1200. Jakija zarobki prapanujuć na rynku pracy

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?