Jak Dziaržpamiežkamitet Biełarusi dbaje ab prapusknoj zdolnaści litoŭskich i polskich pamiežnych punktaŭ

U rehularnych paviedamleńniach Dziaržpamiežkamitet źviartaje ŭvahu, jakuju častku hruzavych transpartnych srodkaŭ aformili litoŭskija i polskija kantrolnyja słužby.

Tak, pavodle jahonych źviestak, za 16 lutaha ŭ Litvu prajšło 63% hruzavikoŭ ad ustanoŭlenaj normy, u Polšču — 64%. «Hetyja krainy praciahvajuć ihnaravać damoŭlenaści pa propusku ciažkahruzaŭ», — infarmujuć biełaruskija pamiežniki.

Taksama na sajcie viedamstva možna ŭbačyć infarmacyju pra archiŭ čerhaŭ, jana ŭražvaje. Miarkujučy pa źviestkach, na hetym tydni ŭ Kamiennym Łozie — samym ažyŭlenym punkcie propusku na biełaruska-litoŭskaj miažy — u čarzie znachodzilisia ad 580 da 640 hruzavikoŭ.

Kiroŭcy čakajuć pa 10—12 dzion. Biznes niasie straty

Niešta padobnaje nazirałasia pry kancy 2021 hoda, kali fiksavalisia čerhi z hruzavikoŭ na miažy. Adnak pierad Novym hodam chvasty źnikli. Kažuć, heta było źviazana z nadychodam śviataŭ — na punkty propusku stała pryjazdžać mienš aŭtamabilaŭ, što źniziła napružańnie.

U pačatku 2022 hoda prablema znoŭ nahadała pra siabie. Kiroŭcy ciažkahruzaŭ paviedamlajuć, što stajać na biełaruska-litoŭskaj miažy pa 10—12 dzion. Čarha z fur raściahvajecca na niekalki kiłamietraŭ. Transpartnyja kampanii niasuć straty: vydatkoŭvajecca paliva, vychodziać z ładu sistemy aciapleńnia, pastupajuć štrafy ad zakazčykaŭ i hetak dalej, paviedamlaje Delfi.lt.

A ŭ minuły paniadziełak, 14 lutaha, kala n. p. Pahraničny (pablizu ad biełaruska-polskaj miažy) adbyŭsia kanflikt pamiž dalnabojščykami. Niekatoryja kiroŭcy abjazdžali čarhu, čym istotna zapavolvali ruch.

U vyniku sami pieravozčyki vyrašyli ŭziać situacyju pad kantrol. Jany zładzili impravizavany narodny patrul i praviarali, jakija padstavy majucca ŭ tych, chto sprabuje praskočyć pa-za čarhoj.

Fota autogrodno.by

Fota autogrodno.by

Pavodle ich słoŭ, heta pryniesła efiekt: za paru hadzin udałosia zaviarnuć kala 30 hruzavikoŭ i praces afarmleńnia paskoryŭsia.

Słužby achovy dziaržmiažy Litvy: «Jość šerah abjektyŭnych abstavinaŭ, jakija dobra viadomyja biełaruskamu boku»

Pamiežsłužby Litvy i Polščy zachoŭvajuć maŭčańnie, nie ŭstupajuć u palemiku ź biełaruskim bokam. Adnak hradus napružańnia pavyšajecca i «Naša Niva» źviarnułasia pa kamientar da litoŭskich pamiežnikaŭ: što adbyvajecca na samaj spravie? Ci sapraŭdy sprava ŭ marudnaści, na što namiakaje Dziaržpahrankamitet RB?

«Infarmacyja pra toje, što čerhi ŭźnikajuć z-za marudnaści litoŭskaha boku nie adpaviadaje rečaisnaści, — kaža pradstaŭnik Słužby achovy dziaržmiažy Litvy Rokas Pukinskas. — Jość šerah abjektyŭnych abstavinaŭ, jakija dobra viadomyja biełaruskim pamiežnikam».

U pryvatnaści, jon nahadaŭ, što ź listapada 2020 hoda ŭ punkcie propusku Miedniki (ź biełaruskaha boku — Kamienny Łoh) prachodzić rekanstrukcyja. Jak čakajecca, raboty buduć praciahvacca dva z pałovaj hady, to-bok, da maja 2023 hoda.

Fota gpk.gov.by

Fota gpk.gov.by

«Ab praviadzieńni ramontu zahadzia byli painfarmavanyja jak biełaruski bok, tak i pieravozčyki. Raboty pravodziacca Ministerstvam transpartu Litvy, jakoje adkazvaje za infrastrukturu ŭ punktach propusku», — adznačaje Rokas Pukinskas.

Inšaja pryčyna — abnaŭleńnie mytnaj infarmacyjnaj sistemy Litvy, ab čym paviedamlali sami biełaruskija pamiežniki. Heta taksama adbivałasia na afarmleńni hruzavych aŭtamabilaŭ. Pracy pavinny byli skončycca 15 lutaha.

A jašče mihranty i cyharety…

Adnak nielha zabyvać pra ahulny charaktar adnosin pamiž dźviuma krainami i pra toje, što adbyvałasia na zachodniaj miažy Biełarusi za apošni hod.

Litoŭskija słužby sutyknulisia z surjoznymi vyklikami i vymušanyja byli reahavać. Uzmacnieńnie žorstkaści kantrolu — całkam pradkazalny krok na fonie mihracyjnaha kryzisu, masavaj kantrabandy cyharet i inšych incydentaŭ.

Rokas Pukinskas nahadvaje, što ŭ dadzieny momant pierakryty pamiežny punkt Kuźnica Biełastockaja (ź biełaruskaha boku — Bruzhi), jaki zaŭsiody prymaŭ vialikuju častku hruzavikoŭ.

Paśla šturmu mihrantami ŭ listapadzie 2021 hoda palaki pryniali rašeńnie nie adkryvać ruch.

«Adbyłosia pieraraźmierkavańnie transpartnych patokaŭ, častka jakich pryjšłasia na litoŭskija pamiežnyja punkty, — kaža Rokas Pukinskas. — Kiroŭcy ruchajucca ŭ našu krainu tranzitam, kab potym prajechać u Polšču i dalej u Zachodniuju Jeŭropu».

Ale heta daloka nie ŭsie nastupstvy. Litva sutyknułasia z masavymi sprobami nielehalnaha pierasiačeńnia jaje miažy.

«Mihracyjny kryzis pryvioŭ da ŭzmacnieńnia kantrolu, — paćviardžaje pradstaŭnik Słužby achovy dziaržmiažy Litvy. — Jon pravodzicca nie tolki na tak zvanaj zialonaj pałasie (pali, lasy, reki, aziory), ale taksama ŭ punktach propusku».

Pradstaŭnik Słužby achovy dziaržaŭnaj hranicy Litvy nahadaŭ pra vypadak, jaki adbyŭsia ŭ kancy listapada 2021 hoda akurat u Miednikach.

U pryčepie hruzavika, jaki jechaŭ ź Biełarusi, vyjavili čaćviarych irakcaŭ. Kali pamiežniki adkryli dźviery furhona, adtul vyskačyli mužčyny, što chavalisia pamiž skrynkami. Kiroŭca (za rulom znachodziŭsia hramadzianin RB) vyhladaŭ vielmi ździŭlenym.

Jak paviedamiŭ Rokas Pukinskas, paśla hetaha zdareńnia byŭ zafiksavany anałahičny vypadak. U toj raz nielehalna miažu ŭ punkcie propusku sprabavali pierasiekčy dzieviać čałaviek.

«Ciapier usie hruzavyja aŭtamabili praviarajucca bolš pilna, što taksama adymaje čas i resursy, — padkreślivaje pradstaŭnik Słužby achovy dziaržmiažy Litvy. — Chacia aktyŭna vykarystoŭvajucca techničnyja srodki. Naprykład, my možam vymierać uzrovień vuhlakisłaha hazu ŭ aŭtamabili. Taksama majem abstalavańnie, jakoje dazvalaje vyjavić čałavieka pa sercabićci».

Pahraničniki adznačyli, što bolš za ŭsio času sychodzić na mytnuju pravierku, jakaja moža zajmać niekalki hadzin navat u zvyčajnych umovach.

Ci možna nazvać zvyčajnymi ciapierašnija ŭmovy? Viadoma, nie.

Za apošni hod litoŭskimi kantrolnymi słužbami kanfiskoŭvałasia biesprecedentnaja kolkaść kantrabandnych cyharet. I heta vymusiła pamiežnikaŭ i mytnikaŭ uzmacnić kantrol, što taksama adymaje čas.

Fota delfi.lt

Fota delfi.lt

«Ličym, što z ulikam abstavin ciapierašniaja situacyja rabočaja»

Jak ličać u Słužbie achovy dziaržaŭnaj miažy Litvy, z ulikam vyšejzhadanych abstavinaŭ ciapierašniaja situacyja pracoŭnaja: «My nie schilnyja dramatyzavać jaje».

Pa słovach Rokasa Pukinskasa, źmianić paradak afarmleńnia abo paskoryć čas prachodžańnia miažy niemahčyma: «Pavieličeńnie kolkaści pahraničniku ničoha nie źmienić. Bo kožnamu patrabujecca pracoŭnaje miesca z kampjutaram, dostupam da baz dadzienych. Vialikaha efiektu naroščvańnie štatu nie daść. Pryviadu taki prykład. U punkcie propusku jość čatyry pałasy: dźvie dla lehkavych, adna — dla hruzavych, jašče adna — dla aŭtobusaŭ. Možna pieravieści pamiežnikaŭ na dźvie inšyja pałasy, ale situacyja nie źmienicca — jak było dva pracoŭnych miescy na dźviuch pałosach, tak jano i zastajecca».

Jon taksama źviarnuŭ uvahu, što Dziaržpamiežkamitet Biełarusi akcentuje ŭvahu na prapusknuju zdolnaść litoŭskich i polskich punktaŭ, chacia na ŭjezd u RB taksama fiksujucca čarhi.

Pavodle jahonych źviestak, na ranicu 17 lutaha ŭ punkcie propusku Miedniki (Kamienny Łoh) ujezdu ŭ Biełaruś čakali 160 hruzavych aŭtamabilaŭ, u Salečnikach (Bieniakoni) — 120, u Rajhradzie (Pryvałka) — 170.

Čytajcie jašče:

«Sa mnoj było piać biełarusaŭ, nie prajšoŭ nichto». Mikita Miełkazioraŭ raskazaŭ, jak jaho nie puścili va Ukrainu

«U Biełarusi byli žudasnyja dni». Jak kurdski chłopčyk biez noh, jaki žyŭ u Bruzhach, apynuŭsia ŭ Italii

Hod, jak biełaruskaja miaža začynienaja na vyjezd. Ci buduć pasłableńni?

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?