Fota: parliamentlive.tv
«Pucin nikoli nie zmoža admyć ruki ad kryvi Ukrainy. I choć Vialikabrytanija i našy sajuźniki da apošniaha sprabavali znajści dypłamatyčnaje rašeńnie, ja vymušany zrabić vysnovu: Pucin z samaha pačatku źbiraŭsia napaści na susiedniuju krainu, što b my ni rabili. Ciapier my viedajem, chto jon: kryvavy ahresar, jaki vieryć u impierskija zachopy», — skazaŭ Džonsan.
Kab pakarać Pucina za ahresiju suprać Ukrainy, vialikaja siamiorka damoviłasia maksimalna pavialičyć ekanamičny cisk na Rasiju. Vialikabrytanija sa svajho boku ŭvodzić nastupnyja sankcyi:
- usie najbujniejšyja rasijskija banki buduć vyklučanyja ź finansavaj sistemy Vialikabrytanii. Heta pazbavić ich dostupu da funtaŭ sterlinhaŭ i klirynhavych płaciažoŭ praz Łondan,
- płanujecca poŭnaje i nieadkładnaje zamarožvańnie aktyvaŭ banka VTB. Bujnym rasijskim kampanijam i dziaržavie budzie zabaroniena pryciahvać finansy abo pazyčać hrošy na rynkach Vialikabrytanii,
- pad zamarozku aktyvaŭ patrapiać jašče sto fizičnych i jurydyčnych asobaŭ z Rasii,
- avijakampanii «Aerafłot» zabaroniać lotać u Vialikabrytaniju,
- budzie prypynienaje dziejańnie ekspartnych licenzij padvojnaha vykarystańnia, kab achapić tavary, jakija možna vykarystoŭvać u vajennych metach,
- za niekalki dzion Vialikabrytanija spynić ekspart vysokatechnałahičnych tavaraŭ i abstalavańnia dla naftapierapracoŭki,
- budzie ŭviedzieny limit na depazity, jakija rasijanie mohuć trymać na bankaŭskich rachunkach Vialikabrytanii.
Padobnyja finansavyja sankcyi buduć raspaŭsiudžanyja i na Biełaruś za jaje rolu ŭ napadzie na Ukrainu.
Pry hetym Džonsan padkreśliŭ, što pytańnie ab adklučeńni Rasii ad mižbankaŭskaj płaciežnaj sistemy Swift «nie zdymajecca z paradku dnia».
