Fota z archiva «Našaj Nivy».

Fota z archiva «Našaj Nivy».

Z redakcyjaj Delfi źviazaŭsia adzin z pastaŭščykoŭ rasijskich i biełaruskich tavaraŭ Kosmolat Baltic, jaki pracuje amal z usimi miascovymi handlovymi sietkami i aptekami. Pa słovach pradstaŭnika kampanii Tomasa Mikučonisa, biznes znachodzicca ŭ krytyčnym stanoviščy — partniory ŭ adnabakovym paradku viartajuć tavary, kampanija niasie straty, na składach nazapašvajucca tavary, jakija niemahčyma viarnuć vytvorcam.

Pradprymalnik adznačyŭ važnuju detal: za hetyja tavary ŭžo zapłačanyja hrošy rasijskim i biełaruskim kampanijam. Značyć naŭprost ich prodaž užo nie moža padtrymlivać režymy Łukašenki i Pucina. Novyja tavary nichto nie zamaŭlaje. Tamu takija dziejańni škodziać tolki litoŭskamu biznesu. Jon prosić dać mahčymaść raspradać reštu hetych tavaraŭ.

«Našy tavary pastupajuć nie tolki ŭ kramy, ale i na rynki. Pakul tam nie zaŭvažna, kab ludzi z varožaściu stavilisia da hetych tavaraŭ. Adzin-druhi pytaje, ale ahułam kuplajuć. Pakolki my pracujem va ŭsich krainach Bałtyi, u Łatvii, dzie ŭ nas jość nievialikaja sietka, byŭ taki paradoks: kali skazali, što tavary nie buduć pradavać, ludzi stajali ŭ čarzie mienavita za tymi, jakija płanavali vyniać», — zaŭvažyŭ Mikučonis.

Jon zhodny, što pakupnik «vybiraje» tavary i ad jaho zaležać prodažy, tamu ciapier kampanija zamaŭlaje ŭkrainskija tavary i prapanuje ich handlovym sietkam.

«Prapanavanyja ŭkrainskija tavary nieabaviazkova prymajuć ź vialikaj radaściu. Tamu, kali vy ŭžo padtrymlivajecie Ukrainu, davodźcie spravu da kanca. <…> Vyklučyć rasijski tavar možna za noč, a na ŭviadzieńnie ŭkrainskaha času treba bolš. Ahulny paradak u sietkach taki: pierahlad niekatorych katehoryj tavaraŭ pravodziać 1-2 razy na hod. Nam kažuć, maŭlaŭ, čakajcie pierahladu, tady budziem vybirać, zachočam — voźmiem. Salidarnaści z boku našych klijentaŭ nie vidno», — skazaŭ Mikučonis.

Ab hetaj prablemie pisaŭ i ekśpiert pa kamunikacyjach Andrus Baranaŭskas. Pavodle jaho słoŭ, jość šerah kampanij, na składach jakich nazapasilisia biełaruskija i rasijskija tavary na miljony jeŭra.

«Vynik — hrošy zamarožanyja, tavary kaštujuć, zarobki i padatki płacić usio roŭna treba, zachoŭvańnie tavaraŭ taksama kaštuje hrošaj. Plus škoda reputacyi: čamu na składzie zachoŭvajecca rasijskaja armatura abo biełaruskaja plitka? Možna razarvać kantakty. Ale što rabić z pradukcyjaj, jakaja ŭžo jość na składach i pryłaŭkach, u furach u Litvie? (…) Tak, možam usio vykinuć, ale pacierpiać nie ahresary, jakija ŭžo ŭziali hrošy napierad, a litoŭskija kampanii», — pisaŭ jon, prapanavaŭšy dapamahčy Ukrainie «rasijskimi i ŭkrainskimi hrašyma».

«Možam za ich košt finansavać ukrainskaje vojska. Pradać toje, što ŭžo pryvieźli. I prybytak, naprykład, 20% — pieradać Ukrainie. Bo hrošy za tavary ŭžo zapłacili, tavary ŭ Litvie, tolki ciapier usie ŭ šalenstvie, nie chočuć ni kuplać, ni pradavać tavary hetych krain. Tak davajcie damo biznesu šaniec viarnuć hrošy i dapamožam Ukrainie za košt vyručki. Bo nieskładana ŭsio heta razumna arhanizavać», — pisaŭ Baranaŭskas.

Miž tym prezident Vilenskaj asacyjacyi pramysłovaści i biznesu Sihitas Biesahirskas ličyć, što heta fors-mažor. A handal rasijskimi i biełaruskimi tavarami byŭ by ciapier jak minimum nieetyčny, navat kali režym hetyja hrošy ŭžo nie atrymaje.

Mikučonis padniaŭ jašče adno pytańnie. Pa jaho słovach, pad zachodnimi etykietkami chavajecca niamała tavaraŭ kampanij rasijskaha kapitału. «Što lepš: kali zachodni kapitał karystajecca rasijskaj prastoraj i resursami, vyrablaje tam tavary i realizuje ŭ Jeŭropie ci kali rasijski kapitał «robić» biznes u nas u dvary, i na hetym nažyvajucca aliharchi? Dyk čamu my admaŭlajemsia ad zachodnich tavaraŭ, vyrablenych u Biełarusi i Rasii, ale nie admaŭlajemsia ad tavaraŭ, vyrablenych u JEZ na rasijskija hrošy? Z-za kirylicy? Ci zručna padtrymlivać raijejskich aliharchaŭ u Litvie, kali jany vykarystoŭvajuć jeŭrapiejskija etykietki? Abo handlovym sietkam niavyhadna, bo pryjdziecca vyklučyć nie 2-3%, a 30% tavaraŭ?» — pytaŭsia jon, nazvaŭšy takija brendy, jak Natura siberica, Recepty babuski Agafi, Rigas Balzams, Rigas piens.

Biesahirskas ličyć, što heta zaŭvaha pradprymalnika łahičnaja, pakolki ŭ Jeŭropie nie pavinna zastavacca tavaraŭ, jakija padtrymlivajuć rasijskich aliharchaŭ. Tolki jon adznačyŭ, što niekatoryja rasijskija aliharchi tajemna padtrymlivajuć i apazicyjnyja siły ŭ Rasii.

«Režym u Biełarusi i Rasii nie moža finansavacca, i niavažna, što ŭ vyniku mohuć paciarpieć pracoŭnyja miescy ŭ Jeŭropie, heta sprava pryncypu», — zaŭvažyŭ jon.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?