Pra heta «Narodnaj Voli» raspaviała dačka žurnalistki Iryny Leŭšynaj Hanna.
— Hłabalnych navin ad mamy niama, — kaža Hanna. — Jana ciapier znajomicca sa spravaj, a paśla 21 sakavika sprava pojdzie ŭ sud, i kolki jašče čakać suda — tołkam nie viadoma. Mama ŭzradavałasia, što choć niešta ssunułasia ź miortvaj kropki.
— Naviny da jaje dachodziać?
— Nu tak… sprabuje filtravać infarmacyju pra Ukrainu, jakuju atrymlivaje z aficyjnych krynic. Nu choć niejak!
— Inšych krynic infarmacyi ŭ jaje niama? Haziety niejkija dachodziać?
— Mama vypisvała rasijskaje vydańnie, zdajecca, «Niezavisimuju hazietu». Ale nie viedaju, ci atrymlivaje jana jaje. Tamu pakul tolki televizar.
— Kolki čałaviek u kamiery, dzie jana siadzić? Jakija ŭmovy?
— Nie viedaju, jana nie moža pra heta napisać u listach.
— U vas pierapiska idzie biez zbojaŭ?
— Mnie jaje listy dachodziać, a niekatorym, ja hladžu, pierastali prychodzić.
— Kali nie sakret, pra što jana piša vam?
— Mama čaściej za ŭsio reahuje na toje, što ja joj pišu, — u mianie ž padziej bolš.
— Nie kaža, kab vy źjazdžali z krainy?
— Nie. Nu i kudy ja pajedu? Ja jaje nie kinu. Mama kaža, što rychtujecca da surovaha vyniku spravy. A jak budzie — pahladzim…
— Spatkańniaŭ u vas za ŭvieś hety čas nie było?
— Nie. Ja pisała zajavu śledčamu, ale jon ličyć, što heta niemetazhodna.
— A sa zdaroŭjem u mamy jak?
— Advakat kaža, što ŭsio ŭ paradku.
***
Dyrektara BiełaPANa Irynu Leŭšynu zatrymali 18 žniŭnia 2021 hoda. Paźniej Śledčy kamitet zajaviŭ, što jaje abvinavačvajuć va ŭchileńni ad vypłaty padatkaŭ u bujnym pamiery, a zatym — u stvareńni ekstremisckaha farmavańnia. 12 listapada BiełaPAN byŭ pryznany ekstremisckim farmavańniem. Razam ź Irynaj Leŭšynaj byŭ zatrymany eks-dyrektar BiełaPAN Dźmitryj Navažyłaŭ, u studzieni 2021 hoda zatrymali byłoha namieśnika hiendyrektara Andreja Alaksandrava.