Rasijskija bajavyja mašyny, źniščanyja ŭkrainskimi bieśpiłotnikami. Fota: Ministerstva abarony Ukrainy.

Rasijskija bajavyja mašyny, źniščanyja ŭkrainskimi bieśpiłotnikami. Fota: Ministerstva abarony Ukrainy.

Rasijskija vojski niasuć kałasalnyja dla vajny XXI stahodździa straty. Rasijskaja armija statystyki nie publikuje, ale, miarkujučy pa ŭsim, za try tydni vajny va Ukrainie rasiejcy stracili bolš ludziej zabitymi, čym amierykancy za 20 hadoŭ u Iraku i Afhanistanie razam uziatych. Ekśpierty źviartajuć uvahu na toje, što pytańnie nie tolki ŭ bajavym duchu. Niekatoryja ź vidaŭ uzbrajeńnia va ŭkraincaŭ — lepšyja, čym u Rasii. Heta, u pryvatnaści, bieśpiłotniki. Nieŭzabavie z ZŠA pastaviać sto dronaŭ-kamikadze Switchblade. Ci mohuć bieśpiłotnyja latajučyja aparaty pierałamić chod hetaha kanfliktu na karyść Ukrainy?

Pavodle aficyjnych źviestak Kramla, na hety momant rasiejcy źbili 160 ukrainskich bieśpiłotnikaŭ. Ukraincy ž kažuć, što źbili tolki 11 rasiejskich mašyn hetaha typu.

Viadoma, treba stavicca krytyčna da dadzienych z abodvuch bakoŭ, ale takaja dyspraporcyja jaskrava śviedčyć ab tym, što ŭkraincy vykarystoŭvajuć bieśpiłotniki ŭ bajach značna čaściej za rasijskija vojski. Heta pryznajuć vajennyja ekśpierty, jakija nazirajuć za vajnoj.

Ukrainskija siły nanosiać rasiejcam značnyja straty, asabliva z dapamohaj bieśpiłotnikaŭ «Bajraktar», pra jakija va Ukrainie ŭžo pačali składać pieśni. Dakładna nie viadoma, kolki va Ukrainie takich bieśpiłotnikaŭ i jakija straty jany nanosiać. Adnak vyhladaje, što drony źniščyli ŭžo dziasiatki rasijskich tankaŭ i inšaj bronietechniki.

Usiaho, pa acenkach zachodnich analitykaŭ na asnovie najaŭnych videa, fota i dadzienych spadarožnikaŭ, ukraincy źniščyli kala 230 braniravanych mašyn praciŭnika. Heta najbolšyja straty braniatechniki za taki karotki čas ad momantu vajny ŭ Iraku ŭ 1991 hodzie.

Hienierał Miečysłaŭ Bieniek, były namieśnik kiraŭnika stratehičnaha kamandavańnia NATA, ličyć, što bieśpiłotniki taksama stajać za inšymi pośpiechami ŭkraincaŭ.

— Čamu ŭ hetaj vajnie tak časta hinuć rasijskija kamandziry? Adnym z tłumačeńniaŭ moža być vykarystańnie dronaŭ. Jany mohuć vyjaŭlać miescy vysokaha elektramahnitnaha vypramieńvańnia. A heta moža aznačać, što ŭ hetym miescy znachodziacca šmatlikija srodki suviazi, jakimi karystajucca kamandziry, — raskazvaje hienierał Bieniek.

Hienierał Miečysłaŭ Bieniek.

Hienierał Miečysłaŭ Bieniek.

Na siońnia Rasija straciła ŭ vajnie jak minimum čatyroch hienierałaŭ. Ukraincy — nivodnaha.

Čamu Rasija nie vykarystoŭvaje bieśpiłotniki ŭ hetym kanflikcie tak šyroka, jak ukraincy? Adkaz moža być prosty — mahčyma, prosta ŭ ich bieśpiłotnych aparataŭ nie tak šmat.

— U apošnija hady rasijskaja armija inviestavała ŭ elitnyja padraździaleńni, takija jak desant i śpiecnaz. Trochi ŭ jadzierny arsienał, trochi ŭ pavietrana-kaśmičnyja siły i fłot, — kaža hienierał.

Adnak vialikich układańniaŭ u bieśpiłotniki nie było. Jak i ŭvohule nie było vialikaha pieraŭzbrajeńnia suchaputnych i pavietranych sił u Rasii. Vojski Rasii śpiecyjalizavalisia na «śpiecapieracyjach» i byli pierakananyja, što takim kanfliktam budzie i vajna va Ukrainie. Adnak jany nie padazravali, što kanflikt pieraraście ŭ kanviencyjnuju vajnu, u jakoj bieśpiłotniki vielmi darečnyja.

— Rasijskaja stratehija praduhledžvała ŭ asnoŭnym ataki atradaŭ śpiecnaza i pavietranyja desanty. Tak było, naprykład, u Siryi, — padkreślivaje hienierał.

Mahčyma, niaŭvaha rasijan da bieśpiłotnikaŭ taksama moža być źviazana z tym, što Rasieja mieła poŭnuju pieravahu ŭ pavietry nad Ukrainaj, — taksama źviartaje ŭvahu Miečysłaŭ Bieniek. — Adnak bieśpiłotniki, biezumoŭna, prablema dla rasiejcaŭ. Źbić ich niaprosta. — Drony zvyčajna dziejničajuć na siarednich vyšyniach, tamu tearetyčna ich mahli b źbivać rasijskija viertaloty. Adnak heta ryzykoŭna. Na takich vyšyniach viertaloty padviarhajucca ahniu ŭkraincaŭ. Tamu, napeŭna, rasiejcy prosta bajacca tudy latać, — tłumačyć hienierał.

Zusim inšaj była stratehija ŭkraincaŭ. Ułady hetaj krainy z momantu akupacyi Kryma rychtavalisia da mahčymaj maštabnaj vajny. Tamu jany nie pabajalisia inviestavać u sučasnaje abstalavańnie i vyvučali dośvied niadaŭnich suśvietnych kanfliktaŭ, u jakich usio čaściej vykarystoŭvalisia bieśpiłotniki.

— Pieršaj vajnoj, u jakoj drony vykarystoŭvalisia ŭ bajavych dziejańniach u vielmi vialikich maštabach, byŭ armiana-azierbajdžanski kanflikt, vajna ŭ Nahornym Karabachu ŭ 2020 hodzie.

Bačycie, ukraincy zrabili pravilnyja vysnovy i atrymali licenziju na vytvorčaść bajraktaraŭ. Heta ciapier akuplajecca na poli boju, — kaža hienierał Bieniek.

Ale ci moža šyrokaje vykarystańnie bieśpiłotnikaŭ vyrašyć los kanfliktu? Nieŭzabavie va Ukrainu z ZŠA pavinny pastupić až 100 kamplektaŭ sučasnych bieśpiłotnikaŭ Switchblade. Jany viadomyja jak «drony-kamikadze», tamu što jany mohuć paražać cel niepasredna. Rasieja ž nie maje dostupu da takoj techniki.

Sankcyi nie dazvolać Maskvie kupić sučasnyja zachodnija bieśpiłotniki. Pavodle nieaficyjnaj infarmacyi, ciapier Kreml choča nabyć kitajskija bieśpiłotniki. Piekin, adnak, admaŭlaje, što takija zapyty byli. Ciažka skazać, ci rašycca Kitaj u vyniku na takija pastaŭki.

Ekśpierty nie mohuć skazać adnaznačna ci mohuć sučasnyja bieśpiłotniki vyjhrać vajnu. Adnak jany amal napeŭna paŭpłyvajuć na jaje vynik. Asabliva kali ŭ vyniku atak ukraincy takimi ž tempami praciahnuć źniščać rasiejskuju techniku i hienierałaŭ.

Tym bolš, što rasiejcy pakul šyroka nie vykarystoŭvajuć svaju avijacyju — čaho taksama nie razumiejuć ekśpierty.

— Kali vieryć aficyjnaj statystycy, to ŭ Rasii niekalki tysiač vajskovych samalotaŭ. Čamu ŭ varvarskich atakach na Ukrainu pakul zadziejničanyja tolki niekalki socień? Tut ciažka znajści adnaznačny adkaz. Mahčyma, značnaja častka arsienała VPS Rasiei prosta niaspraŭnaja. Vidavočna, što ŭ Rasii taksama minimum vysokadakładnych bojeprypasaŭ, tamu i pačalisia terarystyčnyja bambiožki haradoŭ, — dadaje hienierał.

Hienierał Bieniek padkreślivaje, adnak, što drony sami pa sabie ŭ vojnach nie pieramahajuć i nie buduć pieramahać jašče doŭha. Vielmi važna pravilna ich upisvać u ahulnuju sistemu siłaŭ.

— Sučasnaje pole boju — heta spałučeńnie mnostva bajavych sistem, apieratyŭnaha majsterstva i ŭmiełaj taktyki padčas bajavych dziejańniaŭ. Bieśpiłotniki zjaŭlajucca častkaj hetaj sistemy i vykarystoŭvajucca dla raźviedki, vyznačeńnia celaŭ i kiravańnia artyleryjskim ahniom, — dadaje hienierał.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?