Skivičnaha chirurha, jaki 18 hadoŭ adpracavaŭ u dziciačaj balnicy ŭ Minsku i byŭ vałancioram kala Akreścina, zatrymali 4 maja 2021 hoda.
U čym abvinavačvajuć chirurha?
Śledčy kamitet kvalifikavaŭ dziejańni Andreja Lubieckaha pa čatyroch artykułach Kryminalnaha kodeksa:
- art. 342
- art. 130
- art. 369
- č. 1, 2 art. 368
Pa viersii śledstva, chirurh «publična vykazvaŭsia ab pryniatym rašeńni parušyć dadzienuju im miedycynskuju klatvu… i ŭsialak pieraškadžaŭ akazańniu miedycynskaj dapamohi supracoŭnikam milicyi i členam ich siemjaŭ, zaklikaŭ svaich kaleh da padobnych supraćpraŭnych dziejańniaŭ». Taksama jaho abvinavačvajuć va ŭdziele ŭ vaśmi pratesnych akcyjach (13, 17, 20, 23, 27 i 30 vieraśnia, a taksama 4 i 25 kastryčnika 2020 hoda) i napisańni paviedamleńniaŭ u sacsietkach, jakija kvalifikavali jak abrazy i raspalvańnie varožaści.
Što Lubiecki kazaŭ na pieršym pasiadžeńni?
Palitviazień pryznaŭ vinu pa ŭsich punktach abvinavačvańnia.
«Ja rastłumaču, što padšturchnuła mianie na ahučanyja sudździoj dziejańni. Padziei, jakija byli da vybaraŭ, sami vybary i pieryjad paśla vybaraŭ byli, miakka kažučy, nie zusim pravilnyja. Ja sacyjalna aktyŭny čałaviek, i tyja ličby, jakija byli ahučanyja, mnie zdalisia nie zusim dakładnymi.
Padziei, jakija byli paśla, usio, što ja rabiŭ paśla Akreścina… Ja viedaju asabista mnohich kaleh, jakija zajmalisia hetymi ludźmi. Ja viedaŭ mała śledčych na toj pieryjad. Paznajomiŭsia vielmi ščylna ciapier, ich vielmi šmat u SIZA, jakija bačyli i viedajuć, što rabili ź ludźmi. 17 vieraśnia 2020 hoda ludzi pryjšli na vulicu Vaładarskaha, kab akreślić svaju pazicyju».
Lubiecki adznačyŭ, što błakavańnie raboty hramadskaha transpartu nie było jahonaj metaj.
— Kožny adkaz na majo pytańnie vyklikaje sumnieŭ, što vy pryznajecie vinu, — prakamientavała sudździa.
— Ja zrazumieŭ. Kali miarkujecca pravilnym adkazam toje, što ja…
— Pravilnym adkazam miarkujecca praŭda.
— U mianie nie było mety spynić transpart. Niemahčyma było znachodzicca na tratuary praź vialikuju kolkaść ludziej.
Padčas abmierkavańnia viny palitviaźnia pavodle art. 369 Kryminalnaha kodeksa sudździa Čarapanava spytała:
— A jak heta, abvinavačany, źviazvajecca z vašaj intelihientnaściu, pasadaj, paklikańniem? Vy ličycie heta narmalnym?
— Ja liču heta narmalnym, — adkazaŭ chirurh. — I mahu patłumačyć, čamu. Ja kamunikuju z kalehami, dachodziła infarmacyja, što paciarpieła vielmi šmat ludziej. Pierałomy kaniečnaściaŭ… Ja nie budu pieraličvać. I jak prystojny čałaviek — heta nie zaležyć ad pasady, — ja nie mahu maŭčać. Tamu ja vykazaŭsia.
Sudździa Čarapanava adznačyła, što taksama 22 listapada 2020 hoda Andrej Lubiecki na svajoj staroncy ŭ sacyjalnaj sietcy naŭmysna publična abraziŭ Łukašenku.
— Mienavita tak, — prakamientavaŭ Lubiecki.
— Inšych srodkaŭ vykazać svaju niazhodu z palitykaj kiraŭnika dziaržavy nie było?— udakładniła Čarapanava.
— Na žal, nie było,— adkazaŭ palitviazień. — U našym vypadku ŭ čałavieka jość nohi i mova — to-bok, słova. Ja paŭtaru: u nas, u mianie nie było inšaj mahčymaści vykazać svaju pazicyju, akramia jak vyjści, skazać i pakazać: «Nas šmat. Pasłuchajcie nas». Na dyjałoh nichto nie pajšoŭ. Što tyčycca abraz: ja abražaŭ, ale heta byli emocyi paśla peŭnych padziej. Havorka idzie ab zabojstvie Ramana Bandarenka.
— Ale jość ludzi, jakija dumajuć inakš, — nie pahadziłasia sudździa.— I ich vielmi šmat. Zabojstva! Vy takija słovy ŭžyvajecie — i vy ŭ heta vierycie. Hatovyja apuścicca da abrazaŭ vyšejšych čynoŭ ułady.
— Ja vielmi šmat razoŭ čuŭ abrazy z boku vyšejšych čynoŭ ułady ŭ dačynieńni da naroda, — adkazaŭ palitviazień.
Taksama Čarapanava adznačyła, što jašče adzin epizod pavodle art. 368 Lubieckamu stavicca za publikacyju ad 23 studzienia 2021 hoda, u jakoj chirurh «abraziŭ prezidenta, abvinavaciŭšy jaho va ŭčynieńni zabojstva». Pavodle č. 1 art. 130 Kryminalnaha kodeksa, pa viersii abvinavačvańnia, Lubiecki «padbuchtorvaŭ da padziełu hramadstva… Karajeva, Kubrakova, Karpiankova. Vykazvańni, jakija abhruntoŭvajuć i śćviardžajuć nieabchodnaść nieakazańnia miedycynskaj dapamohi pradstaŭnikam nazvanaj hrupy».
— Ja nieadnarazova kazaŭ: ja nie budu hladzieć, što za čałaviek źvierniecca da mianie z ekstranaj nieadkładnaj situacyjaj, — rastłumačyŭ Lubiecki. — Heta biezumoŭna i biassprečna. Ale kali da mianie pryjdzie čałaviek i ja raptam ci nie raptam daviedajusia, što jon źjaŭlajecca saŭdzielnikam jakoha b tam ni było złačynstva i jon nie panios pakarańnia… Ja taksama čałaviek, u mianie mohuć prosta dryžać ruki, i ja mahu naškodzić. Maje słovy byli vyrvanyja z kantekstu.
Sudździa adznačyła, što ŭ dziaržavie pavinien być paradak, a milicyja znachodzicca na słužbie abranaha kiraŭnika dziaržavy z metaj zabieśpiačeńnia hramadskaj biaśpieki.
— Milicyja budzie patrebnaja zaŭsiody, pry luboj uładzie. Hroš cana hetym supracoŭnikam milicyi, jakija nie buduć abaraniać svaju ŭładu, — skazała Čarapanava.
— Milicyja narod abaraniać pavinna, — adkazaŭ słuchač u zale.
— Ustańcie, vyjdzicie! Kamientavać svaje słovy ja nikomu nie dazvalała.
«Ščaślivy, što žoncy ŭdałosia źjechać. A ja vytrymaju». Chirurh Andrej Lubiecki daŭ intervju ź SIZA
Skivičny chirurh Andrej Lubiecki vałancioryŭ pad Akreścina, a jaho žonka Natalla trapiła ŭ «špijonski» film ANT — vialikaja hutarka
