«Ja tolki što havaryŭ z prezidentam Zialenskim i skazaŭ jamu, što administracyja daje dadatkovyja 800 młn dalaraŭ dapamohi ŭ vyhladzie zbroi, bojeprypasaŭ i inšaj dapamohi, patrebnaj dla biaśpieki Ukrainy», — havorycca ŭ zajavie, apublikavanaj Biełym domam.
Bajden adznačyŭ, što ŭkrainskija vajskoŭcy vielmi efiektyŭna vykarystoŭvajuć užo dadzienuju im zbroju. A ŭličvajučy toje, što Rasija rychtujecca ŭzmacnić nastupleńnie na Danbasie, ZŠA praciahnuć akazvać Ukrainie ŭzbrajeńnie dla samaabarony.
«Novy pakiet dapamohi budzie ŭklučać mnohija z efiektyŭnych sistemaŭ uzbrajeńnia, jakija my ŭžo davali raniej, i novyja — prystasavanyja da bolš šyrokaha nastupleńnia Rasii, jakoje my čakajem na ŭschodzie Ukrainy.
Hetaje novaje ŭzbrajeńnie ŭklučaje artyleryjskija sistemy, bojeprypasy i bronietransparciory. Ja taksama ŭchvaliŭ tranśfier dadatkovych viertalotaŭ.
Da taho ž my praciahniem sadziejničać pieradačy ciažkoha ŭzbrajeńnia ad sajuźnikaŭ i partnioraŭ va ŭsim śviecie», — zajaviŭ Džo Bajden.
Jon adznačyŭ, što stabilnyja pastaŭki zbroi ad zachodnich chaŭruśnikaŭ adyhrali krytyčna važnuju rolu ŭ tym, kab Ukraina mahła paśpiachova supraciŭlacca rasijskamu ŭvarvańniu.
«Heta dapamahło zabiaśpiečyć, kab Pucin prajhraŭ pačatkovuju vajennuju zadumu — zavajavać i kantralavać Ukrainu. My nie možam źmienšyć namahańni ciapier. Ja zapeŭniŭ prezidenta Zialenskaha, što amierykanski narod praciahnie padtrymlivać advažny ŭkrainski narod u jaho baraćbie za svabodu», — padsumavaŭ prezident ZŠA.
Raniej Uładzimir Zialenski apublikavaŭ videazvarot, u jakim raskazaŭ, jakaja mienavita zbroja patrabujecca dla supraćstajańnia rasiejskaj armii. Jon abjaviŭ taki śpis nieabchodnaha ŭkraincam:
- artyleryjskija ŭstanoŭki (kalibr 155 mm) i bojeprypasy;
- artyleryjskija snarady (kalibr 152 mm);
- reaktyŭnyja sistemy załpavaha ahniu: «Hrad», «Urahan» abo amierykanski M142 HIMARS;
- tanki (T-72, amierykanski abo niamiecki anałahi);
- sistemy supraćpavietranaj abarony (S-300, «Buk» abo padobnyja zachodnija sučasnyja sistemy SPA);
- bajavaja avijacyja.
