Padčas «uroka dobraachvotnictva» dzieciam, pavodle dakumienta, pavinny raskazać pra zahinułych padčas vajny va Ukrainie rasijskich sałdat i aficeraŭ, a taksama prapanavać napisać listy padtrymki «vajskoŭcam, jakija pravodziać śpiecapieracyju na terytoryi Ukrainy».
Akramia hetaha, vučniam musiać raskazać, jak pravieści «dobraachvotnickuju akcyju» z chešteham ZA_MIR.
U razasłanym dakumiencie adznačałasia, što pravieści ŭrok nieabchodna ŭ metach «stvareńnia ŭmoŭ dla hramadzianska-patryjatyčnaha i duchoŭna-maralnaha vychavańnia dziaciej».
U dakumiencie, jaki źjaviŭsia ŭ Siecivie, spasyłalisia na list Biełaruskaha «Respublikanskaha centra ekałohii i krajaznaŭstva». Taksama prykładałasia spasyłka na mietadyčnyja materyjały ab praviadzieńni ŭroka dobraachvotnictva ŭ Rasii.
U hetaj prezientacyi raskazvajecca pra hierojaŭ Rasii. Naprykład, pra kamandzira roty 247-ha hvardziejskaha desantna-šturmavoha Kaŭkazskaha kazackaha pałka PDV Rasii Nurmahamieda Hadžymahamiedava, jaki zahinuŭ 24 lutaha padčas vajny va Ukrainie.
Jość i chatniaje zadańnie: raspracavać i pravieści mierapryjemstva i padzialicca vynikami, vykłaŭšy ich u sacsietkach pad cheštehami #ZA_MIR, #dobrovolcyrośsii #diełajdobro, #vołontier, #dobrota.
Spravazdaču ab praviedzienaj pracy, pavodle lista ź minskaha rajvykankama, nieabchodna było raźmiaścić u Google-dakumiencie.
Spačatku jon byŭ adkryty dla redahavańnia, tam značylisia škoły Minskaha rajona. Adnak vielmi chutka chtości zapoŭniŭ dakumient znakamitaj frazaj pra rasijski vajskovy karabiel, paśla čaho fajł pieramiaścili ŭ košyk.
Žurnalisty patelefanavali ŭ «Respublikanski centr ekałohii i krajaznaŭstva» pad vyhladam adnaho z vučniaŭ škoły, u jakoj prapanoŭvałasia pravieści ŭrok. Tam im adkazali, što nie źjaŭlajucca arhanizatarami akcyi, a prosta akazvajuć infarmacyjnuju padtrymku i naohuł pravodzić zaniatak nieabaviazkova:
— U nas z rasijskim «Fiederalnym centram dadatkovaj adukacyi i arhanizacyi adpačynku i azdaraŭleńnia dziaciej», a taksama «Fiederalnym centram dziciača-junackaha turyzmu i krajaznaŭstva» jość pahadnieńni ab supracoŭnictvie. Jany rekłamujuć našy mierapryjemstvy, my — ichnyja.
— U mietadyčnych rekamiendacyjach, jakija vykładzienyja ŭ Internecie, napisana ab padtrymcy rasijskich vajskoŭcaŭ. Navošta biełaruskim dzieciam takija ŭroki?
— Vy nie bačyli tyja mietadyčnyja rekamiendacyi. Tam inšyja. Jany vykładzienyja na sajcie rasijskich centraŭ i tam možna ź imi aznajomicca, — paraiła śpiecyjalistka «Respublikanskaha centra ekałohii i krajaznaŭstva».
Jakija «inšyja» mietadyčki musili być, śpiecyjalistka nie ŭdakładniła.
Na sajcie «Fiederalnaha centra dadatkovaj adukacyi i arhanizacyi adpačynku i azdaraŭleńnia dziaciej» vykładzienyja mienavita tyja mietadyčnyja rekamiendacyi, jakija fihurujuć u liście ź Minskaha rajvykankama.
A na sajcie rasijskaha «Fiederalnaha centra dziciača-junackaha turyzmu» žurnalisty znajšli tolki mietadyčnyja rekamiendacyi pa arhanizacyi tematyčnaj źmieny, tematyčnaha dnia i tematyčnaha mierapryjemstva pa dobraachvotnictvie. Tam niama zhadak pra vajnu va Ukrainie, bo jany byli składzienyja ŭ 2020 hodzie.
Sioleta ŭ samoj Rasii ŭrok dobraachvotnictva prachodzić u ramkach Usierasijskaha marafonu «Ruskaja viasna». U im pryniali ŭdzieł bolš za 2,7 miljonaŭ čałaviek sa śfiery adukacyi (u tym liku i piedahohi) z 67 rehijonaŭ Rasii. Pra heta paviedamlała rasijskaje Ministerstva aśviety.
