Nurłan Saburaŭ
U Čykaha kancert Saburava pieranieśli z 16 krasavika na niavyznačany termin paśla zvarotu pradstaŭnikoŭ ukrainskaj dyjaspary, paviedamili ŭ pres-słužbie kancertnaj placoŭki North Shore Center. U pryvatnaści, admieny kancerta patrabavaŭ Hienieralny konsuł Ukrainy ŭ Čykaha Siarhiej Kaladaŭ.
Padstavaj dla zvarotu stała reakcyja komika na ŭkrainskuju mastačku Juliju Kasiŭčuk, jakaja na adnym ź jaho kancertaŭ vybiehła na scenu ŭ sukiency, zapeckanaj čyrvonaj farbaj.
«Prabačcie, heta miesiačnyja? Što adbyvajecca? Darma ja, viadoma, žančynu paklikaŭ», — pažartavaŭ Saburaŭ, kali Kasiŭčuk vyvodziła achova.
Saburaŭ sutyknuŭsia z krytykaj praz toje, što nie staŭ publična vykazvacca suprać vajny va Ukrainie, raźviazanaj prezidentam Rasii Uładzimiram Pucinym. Maŭčańnie zachoŭvajuć i kalehi Saburava ŭ šoŭ «Što było dalej».
U internecie takoje pavodziny artystaŭ patłumačyli tym, što aŭtaram prajekta źjaŭlajecca Viačasłaŭ Dusmuchamietaŭ, kreatyŭny pradziusar TNT. Hety telekanał naležyć dziaržaŭnamu chołdynhu «Hazprom-Miedyja».
Niahledziačy na krytyku, Saburaŭ nie admoviŭsia ad zapłanavanaha na krasavik tura pa ZŠA z kancertam «Pryncypy». Pieršy vystup adbyŭsia 8 krasavika ŭ Łos-Andželesie, dzie niekalki hledačoŭ adrazu pierapynili Saburava i spytalisia, čamu jon nie vykazvajecca publična pra toje, što adbyvajecca va Ukrainie.
Spačatku artyst sprabavaŭ adžartoŭvacca, ale potym rastłumačyŭ: «U mianie jość siamja, vy pavinny razumieć. U mianie jość taksama svaje strachi. Vy kaho ź mianie robicie?»
Kala kancertnych placovak, na jakich vystupaŭ Saburaŭ, źbiralisia ludzi z ukrainskimi ściahami, jakija kryčali «Hańba!»
