U dakumiencie kanstatujecca, što «ŭ ciapierašni čas u Biełarusi praciahvajucca masavyja pratesty ŭ bujnych nasielenych punktach respubliki z metaj arhanizacyi paŭtornych vybaraŭ i pryvodu da ŭłady «prazachodnie» aryjentavanaha ŭrada na čale sa Śviatłanaj Cichanoŭskaj (u ciapierašni čas znachodzicca na terytoryi Litvy i viadzie padryŭnuju dziejnaść adtul)».
Pratesty, pavodle aŭtaraŭ, spravakavanyja Zachadam.
U dakumiencie havorycca, što «praciŭnik u metach stvareńnia spryjalnych umoŭ dla praviadzieńnia apieracyi pa zachopie terytoryi Respubliki Biełarusi, vychadzie da zachodniaj miažy Rasijskaj Fiederacyi pravodzić šyrokamaštabnuju infarmacyjnuju kampaniju, nakiravanuju na farmavańnie ŭ zachodnim hramadstvie adzinych pohladaŭ i poŭnaj padtrymki dziejańniaŭ kiraŭnictva pa hvałtoŭnaj źmienie režymu» Biełarusi, «akazańni dapamohi jeŭrapiejskamu rehijonu» Rasii i jaho vyvadzie z-pad jurysdykcyi Maskvy ŭ suviazi z praviadzieńniem «nielehitymnych» vybaraŭ Prezidenta Respubliki Biełaruś».
Havorycca, što ŭ vypadku niemahčymaści praduchilić pieramieny ŭ Biełarusi «RF moža być uciahnutaja ŭ Jeŭrapiejskim kantynientalnym rajonie ŭ rehijanalnuju abo šyrokamaštabnuju vajnu z krainami — členami NATA na Zachadzie».
Analiz stanovišča pakazvaje, havorycca ŭ dakumiencie, što ŭ Biełarusi zachoŭvajecca niestabilnaść.
«Pry dalejšaj eskałacyi abstanoŭki najbolš vierahodny scenaryj, pry jakim Alaksandr Łukašenka źvierniecca pa vajennuju dapamohu da RF, u tym liku dla naviadzieńnia «kanstytucyjnaha paradku» na terytoryi krainy.
Hetaje rašeńnie, na dumku aŭtaraŭ dakumienta, «umacuje aŭtarytet Łukašenki siarod pradstaŭnikoŭ siłavych struktur krainy i kansiervatyŭnaj častki nasielnictva, a taksama źnizić pratesnuju aktyŭnaść u suviazi ź niežadańniem bolšaści hramadzian respubliki (u tym liku pratestoŭcaŭ) iści na kanflikt z Rasijskaj Fiederacyjaj».
Paśla atrymańnia rasparadžeńnia rasijskija orhany kiravańnia, uzmocnienyja padraździaleńni, jakija ŭvachodziać u skład złučeńniaŭ i voinskich čaściej armii, padraździaleńni achovy i zabieśpiačeńnia pryvodziacca ŭ hatoŭnaść da vykanańnia bajavych (śpiecyjalnych) zadač.
Vysoŭvańnie ŭ rajon apieratyŭnaha pryznačeńnia płanujecca ažyćciavić pad lehiendaj prykryćcia ab udziele ŭ sumiesnym vučeńni z Uzbrojenymi siłami Respubliki Biełaruś.
«U dalejšym, zychodziačy ź situacyi, być u hatoŭnaści da vykanańnia śpiecyjalnych zadač na terytoryi Respubliki Biełarusi».
U dakumiencie pryvodzicca śpis patencyjnych vajennych pierasoŭvańniaŭ hrup vojskaŭ.
Zakančvajecca dakumient punktam «Ideja padmanu praciŭnika». U im havorycca, što «vykanańniem kompleksu mierapryjemstvaŭ pa ŭtojvańni, dezynfarmacyi i ŭkaranieńni lehiendy prykryćcia pierakanać supiernika ŭ pierahrupoŭcy złučeńniaŭ i voinskich čaściej armii na terytoryju Smalenskaj vobłaści dla ŭdziełu ŭ płanavym sumiesnym apieratyŭnym vučeńni ŭ ramkach praviadzieńnia vučeniaŭ «Kaŭkaz-2020».
Stratehičnaje kamandna-štabnoje vučeńnie «Kaŭkaz-2020» sapraŭdy prachodziła ŭ Rasii z 21 pa 26 vieraśnia 2020 hoda. U stratehičnych manieŭrach uziali ŭdzieł u tym liku i vajskoŭcy Biełarusi.
Pakul nieviadoma, ci sapraŭdny heta dakumient. Ale ŭ žniŭni 2021 hoda na «Vialikaj razmovie» Łukašenka apisvaŭ padobny scenar.
«Biełaruś znachodzicca na skryžavańni daroh. Kali b my padčas pratestaŭ prajavili słabinu, nas by pałasavali. U vyniku pačałasia b novaja suśvietnaja vajna. Ja razumieŭ, što na druhim baku štyki točać, tamu padniaŭ vojska, vyvieŭ «Pałanez». Adna maja kamanda, i my b nanieśli ŭdar, ale jany nie pierajšli rysu. Kali b adbyłosia inakš, Rasija b nikoli nie adstupiła i nie straciła Biełaruś. Pačałasia b zavarucha, a heta jadziernaja dziaržava. Voś ad čaho my tady syšli», — skazaŭ Łukašenka.
Kali praŭdzivaść dakumienta budzie paćvierdžanaja, značyć, Rasija ŭ 2020-m była hatovaja da akupacyi Biełarusi ŭ vypadku kali narod dabiŭsia b svabodnych vybaraŭ.
