Baćkam paviedamili, što Siarhiej źnik bieź viestak. Karespandent «Nastojaŝieho vriemieni» Cimafiej Ražanski pahavaryŭ z maci maraka Tamaraj Hrudzininaj.
«My adpravili SMS z danymi syna, nam u adkaz pryjšło: «Vaš syn źnik bieź viestak, spačuvaju». Potym nam patelefanavaŭ Vakuła (Pavieł Vakuła, namieśnik kamandzira karabla). Skazaŭ, što syn naš zastaŭsia na karabli. Ja spytała: «Jak ža tak? My ž davieryli vam syna svajho. Jak vy tak mahli?» Jon kaža: «Vinavaty. Jon nie adzin, ich tam šmat».
Potym patelefanavaŭ kamandzir našaha Siarožy. Jon skazaŭ, što, kali pačałasia hetaja ŭsia… pažar na karabli, jon ich niby vyvodziŭ, moj Siaroža stajaŭ u łancuhu, łancužkom jon ich vyvodziŭ. Łancuh razarvaŭsia, i Siaroža i jašče niekalki chłopcaŭ zastalisia tam. Jon nie zmoh ich vyvieści.
Ja kažu: «Jak ža tak, usie kamandziry vyratavalisia, a chłopčyki terminovaj słužby tam zastalisia?» — «Nu voś tak». «Ci jość niejkaja nadzieja, što mahli chłopcy vyratavacca?» — «Nu jość. 80%». Potym jon skazaŭ: 99 pracentaŭ. Niejak tak kruciŭ i kruciŭ. Niejak tak jany z nami razmaŭlajuć, viedajecie, byccam «dy što vy nam tut niejkija sopli razvodzicie?» — raspaviadaje Tamara Hrudzinina.
«A ź Minabarony nam telefanujuć i kažuć: «Usio ŭ paradku. Vaš syn žyvy, zdarovy». Ja telefanuju ź pieršaha dnia, siońnia šosty ci siomy dzień, ja telefanuju na haračuju liniju ŭ 10 hadzin pa Maskvie. Tamaka ž uvieś čas abnaŭlajucca śpisy. Mnie kažuć: «Žyvy, zdarovy, pry pieršaj ža mahčymaści patelefanuje», — praciahvaje jana.
Siarhiej, jak i inšyja sałdaty terminovaj słužby, z baćkami jakich užo parazmaŭlała «Nastojaŝieje vriemia», taksama nie źbiraŭsia padpisvać kantrakt.
«Kali ja jamu apošni raz telefanavała 10 krasavika, ja jamu kazała: «Tolki nie kantrakt!» Jon i sam nie chacieŭ, jon dadomu ŭžo vielmi chacieŭ. Jon nie padpisvaŭ nijakich kantraktaŭ, heta 100%. A pra vajnu ničoha nie kazaŭ. «Usio dobra», — jon zaŭsiody tak nas supakojvaŭ. «Mam, usio dobra, usio narmalna, viarnusia dadomu». Ci razumieła ja, što jon sa słužby patrapiŭ na vajnu?.. Nie», — kaža žančyna.
Tamara była ŭpeŭnienaja, što Siarhiej nie budzie prymać udzieł u «śpiecapieracyi» va Ukrainie, i tamu nie patrabavała viarnuć jaho z karabla ŭ port: «Voś mienavita, što nie sprabavała. Kazali, što «Maskva» nie ŭdzielničaje ŭ vajennych dziejańniach. Što heta taki abaronieny karabiel i jany nie ŭdzielničajuć. I ŭsiudy ž pisali, što sałdaty terminovaj słužby nie ŭdzielničajuć u hetym. Voś i nie pasprabavała. Kali b ja viedała, to — viadoma. Ja nie viedaju, chto maje racyju, a chto vinavaty. Heta ŭ lubym vypadku drenna, vajna. Nu ci śpiecapieracyja. Toje, što tam adbyvajecca. Ja nie viedaju, ščyra vam skažu».
Siarhiej Hrudzinin — šosty člen ekipaža krejsiera «Maskva», jaki ličycca źnikłym bieź viestak i čyju asobu ŭdałosia paćvierdzić. Pavodle źviestak «Mieduza», 37 členaŭ ekipažu patanułaha sudna zahinuli, kala 100 atrymali ranieńni, kolkaść źnikłych bieź viestak nieviadomaja.
13 krasavika na krejsiery «Maskva» adbyŭsia pažar. Ukrainskija ŭłady paviedamili, što atakavali karabiel rakietami «Niaptun». 14 krasavika Minabarony RF zajaviła, što krejsier zatanuŭ pa pryčynie detanacyi bojeprypasaŭ va ŭmovach štormu. Aficyjna rasijski bok nie pryznaje straty i śćviardžaje, što ŭvieś ekipaž vyratavany.
