«Afarmleńnie idzie vielmi marudna, spačatku treba vystajać u čarzie»
Supracoŭnica firmy-pieravozčyka z Bresckaj vobłaści raspaviała, što ich fury adnymi ź pieršych adpravilisia ŭ transpartna-łahistyčny centr (TŁC) u Kazłovičach na pieračepku hruzu ad jeŭrapiejskaha pieravozčyka. Jana adznačyła, što ad firmaŭ ź ES prychodzić dastatkovaja kolkaść zapytaŭ na pieračepku. «Palakam treba niejak dastavić choć by tyja hruzy, jakija ŭžo ŭ pracy, tamu adpraŭniki, ekśpiedytary telefanujuć ciapier šmat», — kaža pradstaŭnica firmy-pieravozčyka. Surazmoŭnica sama zajmałasia hetaj praceduraj, jeździła kantralavać praces na miescy.
— Praca pa pieračepcy vyhladaje tak: pavodle papiaredniaj damoŭlenaści, fura ź ES i biełaruski ciahač zajazdžajuć na TŁC, kiroŭca ź Biełarusi padaje zajavu na pieračepku. Paŭpryčep ad zamiežnaj fury adłučajuć i dałučajuć da biełaruskaha ciahača, jaki viazie jaho da miesca pryznačeńnia. Tut ža hruz prachodzić praceduru mytnaj ačystki, vydajecca dekłaracyja.
Surazmoŭnica vydańnia kaža, što schiema pracy pa pieravałcy hruzaŭ u pieršyja dni kontrsankcyj vyklikaje niamała pytańniaŭ. Jak jana śćviardžaje, pierad składam časovaha zachoŭvańnia (SČZ) u Kazłovičach sabralisia čerhi z fur.
— Praces idzie vielmi marudna, bo spačatku treba vystajać u čarzie na SČZ, potym asobnyja čerhi na padaču zajavy, dakumientaŭ, afarmleńnie dazvołu, vydaču rachunku za stajanku, jość navat čarha na vyjezd. U TŁC tłumačać: «Zanadta šmat pracy, čakajcie».
«Poŭny chaos, kožny supracoŭnik prymaje rašeńni intuityŭna»
Pradstaŭnik firmy-pieravozčyka z Bresckaj vobłaści raspaviadaje, što jak minimum adzin punkt mytnaha afarmleńnia ŭ TŁC u Kazłovičach pieraviali na kruhłasutačny režym pracy, «ale hetaha ŭsio roŭna nie chapaje», kab spravicca z napłyvam hruzavikoŭ. Kali ŭ pieršy dzień dziejańnia kontrsankcyj, kali patok fur byŭ adnosna nievialiki, na afarmleńnie adnoj mašyny patrabavałasia mienš za 24 hadziny, to ŭ nastupnyja dni na heta sychodziła da sutak z pałovaj. Pry hetym rascenki na pasłuhi SČZ padnialisia z 16 krasavika: raniej zajezd na terytoryju kaštavaŭ 50 rubloŭ, ciapier — krychu bolš za 150, za kožny dzień prastoju — takaja ž suma.
— Ciapier u «Biełmytservisie» poŭny chaos, infarmacyi ad uradavych arhanizacyj (čynoŭnikaŭ) mała, kožny supracoŭnik i načalnik na svaim miescy prymaje rašeńni bolš intuityŭna, bo situacyi ŭ mnohich kiroŭcaŭ roznyja. Datelefanavacca ŭ transpartna-łahistyčnyja centry dla atrymańnia infarmacyi niemahčyma, — raskazvaje surazmoŭca.
Jana kaža, što pry pracy ŭ novych umovach jość šmat niuansaŭ i drobiaziaŭ, jakija nidzie nie abhavoranyja ŭ novych pastanovach, davodzicca «praryvacca, jak u ciarnistym lesie, dziejničać svaimi siłami mietadam prob i pamyłak». Pavodle jaje źviestak, niekatoryja momanty mianiajucca litaralna kožnuju hadzinu, naprykład, spačatku biełaruskamu ciahaču treba było stajać usiu čarhu z mašyn na skład, a paźniej abviaścili, što jaho buduć zapuskać razam z furaj ES.
— Dla biełaruskich hruzapieravozčykaŭ usie hetyja kontrsankcyi ŭ takim vyhladzie, jak ich abviaścili, — poŭny kałaps. Kali ničoha nie źmieniać, nie dadaduć i nie vypraviać, to mytnia sama patonie ŭ kolkaści pracy.
Čym bolš sutak idzie afarmleńnie — tym bolš hrošaj treba zapłacić
Biełarus Daniła (imia źmienienaje) pracuje łahistam u biełaruskaj firmie pa pieravozcy hruzaŭ. U kampanii jość aŭto na biełaruskich i polskich numarach, tamu šukać pasiarednikaŭ dla pieračepki joj nie treba.
— 18 krasavika my aformili ŭ TŁC «Bierastavica» adnu pieračepku. Tady jašče nie było vialikaha napłyvu mašyn i na ŭsio chapiła sutak, — raspavioŭ Daniła.
Učora jaho kampanija afarmlała jašče dźvie pieračepki na tym ža TŁC, na heta spatrebiłasia ŭžo bolš za 24 hadziny. Chłopiec kaža, što raniej u hetym pracesie nie było ciažkaściaŭ: afarmlałasia adna mytnaja dekłaracyja, u jakuju ŭnosilisia źviestki pieršaha i druhoha pieravozčykaŭ, mašyna zajazdžała ŭ Biełaruś i jany pieračaplalisia.
— Ciapier ža polskuju mašynu afarmlajuć da zajezdu na TŁC — na jaje asobnaja dekłaracyja — a na druhuju mašynu, biełaruskuju, afarmlajuć druhuju dekłaracyju, ale ŭžo prosta na TŁC, — rastłumačyŭ łahist.
Za kožnuju mašynu za sutki treba zapłacić pa 155 rubloŭ. Čym bolš sutak idzie afarmleńnie, tym bolš hrošaj treba zapłacić. Pa słovach Daniły, u TŁC «Bierastavica» źjaviłasia mahčymaść zekanomić: ciapier tam možna rabić pieračepku ŭ zonie čakańnia, biez zajezdu na SČZ — heta kaštuje 100 rubloŭ u sutki za adno aŭto.
— Na polski ciahač i pryčep viešajuć navihacyjnyja płomby. Dziesiać dzion dajuć na toje, kab polski hruzavik vyjechaŭ nazad ź Biełarusi, — infarmuje Daniła.
Dźvie mašyny pieravozčyka siońnia ranicaj pierasiekli miažu ŭ litoŭskim punkcie «Pryvałka», a adtul adpravilisia na pieračepku ŭ TŁC «Bruzhi».
— Z dobraha jość adno: kiroŭcy, jakija jechali ź Jeŭropy, kazali, što čarhi na miažy niama abo jany nievialikija, tamu pierajechać na biełaruski bok im udałosia davoli chutka.
«Biełmytservis»: «Čarhu nie adsočvajem»
Dla pierahruzki i pieračepki tavaraŭ z fur ES adviali asobnyja miescy. Pasprabavali taksama daviedacca, dzie čarha na praceduru mienšaja, dla hetaha źviarnulisia ŭ koł-centr «Biełmytservisu». Adnak u vajbier-čacie adkazali, što arhanizacyja «čarhu nie adsočvaje».
Što tyčycca koštu znachodžańnia fur u zonie mytnaha kantrolu (siudy adnosicca i terytoryja składa časovaha afarmleńnia, i zona čakańnia), to nam paviedamili, što jana składaje 99 rubloŭ.
— Ź siońniašniaha dnia ceny byli pierahledžanyja — paviedamiła śpiecyjalist, dadaŭšy, što prajs-list na pasłuhi možna zapytać niepasredna na TŁC.
***
15 krasavika Biełaruś uviała zabaronu na pieramiaščeńnie praz mytnuju miažu Jeŭrazijskaha ekanamičnaha sajuza ŭ Biełaruś aŭtamabilaŭ (i ciahačoŭ), zarehistravanych u Jeŭrapiejskim Sajuzie. Jon pačaŭ dziejničać 16 krasavika. Vyklučeńnie zrabili dla mašyn, jakija ŭjechali ŭ Biełaruś raniej — jany pavinny pakinuć našu krainu da 23 krasavika.
Da hetaha, z 9 krasavika, ES zabaraniŭ aŭtamabilnyja hruzapieravozki, u tym liku tranzitnyja, dla biełaruskich i rasijskich kampanij. Abmiežavańni byli pryniatyja «ŭ suviazi ź situacyjaj u Biełarusi i datyčnaściu Biełarusi da rasijskaj ahresii suprać Ukrainy». Vyklučeńnie zrabili dla pieravozki pošty i hruzaŭ dla humanitarnych metaŭ.
