Žančyna ź niemaŭlom u mietro — heta kijaŭlanka Taćciana Bliźniuk z dačkoj Maryčkaj, jakoj na momant, kali była zroblenaja fatahrafija, tolki-tolki spoŭniłasia dva miesiacy. 25 lutaha Taćciana z mužam Michaiłam, dačkoj i mopsam Fibi spuścilisia ŭ mietro, kali ŭ Kijevie pačałasia pavietranaja tryvoha.
Fota Taćciany, jakaja kormić niemaŭla, prychinuŭšysia da chałodnaj marmurovaj ściany mietrapalitena, zrabiŭ vienhierski žurnalist vydańnia Teleks Andraš Fieldeš. Jon apublikavaŭ jaho ŭ siabie ŭ «Instahramie». Zdymak imhnienna staŭ virusnym.
Ilustratar Maryna Sałomieńnikava z Dniapra ŭbačyła fatahrafiju Taćciany, hartajučy stužku navin.
«U majoj hałavie adrazu skłalisia ŭsie pazły ŭbačanaha i pračytanaha — hetaja žančyna ź dziciem była simvałam usich ukrainskich maci, jakija pavinny chavacca ad rasijskaj zbroi ŭ bambaschoviščach», — raspaviadaje Maryna.
Jana pakazała Taćcianu na fonie schiemy ruchu ciahnikoŭ Kijeŭskaha mietrapalitena — nibyta z załatym nimbam nad hałavoj.
«Ukrainskija žančyny samyja advažnyja i mocnyja», — padpisała svaju pracu Maryna.
Paśla hetaha ilustracyju Maryny apublikavaŭ u siabie na staroncy kansultant Vatykanskaha Sakrataryjata pa suviaziach z hramadskaściu Džejms Marcin.
Vyjavu žančyny ź nimbam nazvali Kijeŭskaj Madonnaj, a Maryna Sałomieńnikava ścipła kaža, što prosta zrabiła dobruju ilustracyju.
Niadaŭna Kijeŭskaja Madonna stała abrazom u chramie italjanskaha Nieapala, jana znachodzicca ŭ kaplicy pry škole siaścior-franciškanak.
Fota abraza ŭ siabie apublikavaŭ ukrainski śviatar-jezuit Viačasłaŭ Okuń, jaki ciapier vučycca ŭ Rymie.
